Video: ఇది రా రోహిత్ అంటే.. లేడీ ఫ్యాన్‌కి సారీ చెబుతూ వీడియో.. అసలు మ్యాటర్ తెలిస్తే సెల్యూట్ చేస్తారంతే..!

Rohit Sharma Fan Girl at Eden Gardens Kolkata: ఐపీఎల్ 2026 సీజన్‌లో భాగంగా ముంబై ఇండియన్స్, కోల్‌కతా నైట్ రైడర్స్ జట్ల మధ్య ఈడెన్ గార్డెన్స్ వేదికగా మ్యాచ్ జరిగింది. ఈ సందర్భంగా ముంబై జట్టు బస చేసిన హోటల్ వెలుపల తమ అభిమాన ఆటగాడు రోహిత్ శర్మను ఒక్కసారైనా చూడాలని, సెల్ఫీ దిగాలని వందలాది మంది అభిమానులు గుమిగూడారు. ఆ రద్దీలో ఓ ఫ్యాన్ గర్ల్ చాలా సేపటి నుంచి నిలబడి ఎదురుచూసింది. అయితే, విపరీతమైన జనం, భద్రతా కారణాల దృష్ట్యా రోహిత్ ఆమెను గమనించకుండానే ముందుకు సాగిపోయాడు.

ఆ క్షణంలో తన ఆరాధ్య దైవాన్ని కలిసే సువర్ణావకాశాన్ని కోల్పోయానని సదరు యువతి తీవ్ర ఆవేదనకు గురైంది. హోటల్ కారిడార్‌లోనే కన్నీళ్లు పెట్టుకుంటూ, తన బాధను వ్యక్తం చేసిన వీడియో నెట్టింట వైరల్‌గా మారింది. రోహిత్‌ను కలవలేకపోయాననే బాధ ఆమె ముఖంలో స్పష్టంగా కనిపించింది.

అభిమాని కోసం ప్రత్యేక వీడియో పంపిన రోహిత్ శర్మ..

I may have made many mistakes in my life, but I did not make even the slightest mistake in choosing Rohit Sharma as my idol. 💙 pic.twitter.com/XTTPQuSV9K

— Dedicated_Pics (@SeemsOver) May 23, 2026

సాధారణంగా ఎంత పెద్ద స్టార్ ఆటగాడైనా ఇలాంటి చిన్న చిన్న సంఘటనలను పెద్దగా పట్టించుకోరు. కానీ రోహిత్ శర్మ మనసు చాలా పెద్దదని ఈ ఘటనతో మరోసారి రుజువైంది. సామాజిక మాధ్యమాల్లో ఆ యువతి ఏడుస్తున్న వీడియోను చూసిన వెంటనే రోహిత్ స్పందించాడు. ఆమె బాధను అర్థం చేసుకుని, నేరుగా ఒక భావోద్వేగ భరితమైన వీడియో సందేశాన్ని విడుదల చేశాడు. ఆ వీడియోలో రోహిత్ చూపించిన సానుకూలత నెటిజన్ల మనసులను గెలుచుకుంది.

“నన్ను క్షమించు.. ఆ సమయంలో ఈడెన్ గార్డెన్స్‌లో నిన్ను కలవలేకపోయాను. నేను నీ వీడియోను చూశాను. మైదానం వెలుపల, హోటల్ వద్ద కొన్నిసార్లు విపరీతమైన రద్దీ, గందరగోళం, పెద్దగా శబ్దాలు ఉంటాయి. అందుకే నా దృష్టి నీపై పడలేదు. కానీ నేను నీకు మాట ఇస్తున్నాను, వచ్చేసారి నేను ఎప్పుడు కోల్‌కతాలోని ఈడెన్ గార్డెన్స్‌కు వచ్చినా ఖచ్చితంగా నిన్ను కలిసి తీరుతాను” అని రోహిత్ శర్మ ఆ వీడియోలో ఎంతో వినమ్రంగా మాట్లాడాడు.

నెట్టింట హిట్‌మ్యాన్‌పై ప్రశంసల జల్లు..

ఒక అంతర్జాతీయ స్థాయి ఆటగాడు, కోట్లాది మంది అభిమానులు ఉన్న వ్యక్తి.. కేవలం ఒక సాధారణ అభిమాని కన్నీళ్ల కోసం ప్రత్యేకంగా సమయం కేటాయించి, క్షమాపణలు కోరడం సాధారణ విషయం కాదు. రోహిత్ శర్మ చేసిన ఈ అద్భుతమైన పనికి క్రికెట్ ప్రపంచం ఫిదా అవుతోంది. “అందుకే నిన్ను అందరూ హిట్‌మ్యాన్ అని, ఒక మంచి నాయకుడని పిలుస్తారు” అంటూ అభిమానులు సామాజిక మాధ్యమాల్లో కామెంట్ల వర్షం కురిపిస్తున్నారు. ఆ యువతి కన్నీళ్లను తుడిచేలా రోహిత్ ఇచ్చిన ఈ హామీ ఆమె జీవితంలో ఒక మధుర జ్ఞాపకంగా నిలిచిపోతుందనడంలో ఎలాంటి సందేహం లేదు.

ఆటగాళ్లకు అసలైన బలం అభిమానులే అని రోహిత్ శర్మ ఈ చర్య ద్వారా నిరూపించారు. ఐపీఎల్ మ్యాచ్‌ల ఒత్తిడిలోనూ తనను ప్రాణంగా భావించే అభిమానుల ఎమోషన్స్‌కు విలువ ఇవ్వడం రోహిత్ గొప్పతనానికి నిదర్శనం. వచ్చేసారి ఈడెన్ గార్డెన్స్‌లో ఈ అభిమానికి, హిట్‌మ్యాన్‌కు మధ్య జరిగే ఆ అద్భుతమైన భేటీ కోసం ఇప్పుడు క్రికెట్ ప్రపంచమంతా ఆసక్తిగా ఎదురుచూస్తోంది.