BCCI: బీసీసీఐ అధ్యక్షుడికి జీతమే రాదు.. కానీ, లక్షల్లో సంపాదన.. ఎలాగో తెలుసా?
Interim BCCI President Rajeev Shukla: బీసీసీఐ అధ్యక్షుడి పదవి క్రికెట్ ప్రపంచంలో అత్యంత శక్తివంతమైనదిగా పరిగణిస్తుంటారు. ఎందుకంటే, ఆయన అత్యంత ధనిక క్రికెట్ బోర్డు అధిపతి మాత్రమే కాదు, ప్రపంచ క్రికెట్ను ప్రభావితం చేసే సామర్థ్యం కూడా కలిగి ఉంటారు. కానీ, ఆయనకు ఎలాంటి జీతం రాదని తెలిస్తే కచ్చితంగా షాక్ అవ్వాలసిందే.
Updated on: Aug 30, 2025 | 7:38 AM
Interim BCCI President Rajeev Shukla: ప్రపంచంలోనే అత్యంత ధనిక, అత్యంత శక్తివంతమైన క్రికెట్ బోర్డు, భారత క్రికెట్ నియంత్రణ మండలి అధ్యక్షుడిగా మారడం మాములు విషయం కాదు. ఈ బోర్డులో ఎవరు బాధ్యతలు స్వీకరిస్తారో వారికి భారత క్రికెట్ను మాత్రమే కాకుండా ప్రపంచ క్రికెట్ను కూడా ప్రభావితం చేసే శక్తి ఉంటుంది. కానీ, భారత బోర్డు అధిపతికి ప్రతిఫలంగా ఎంత డబ్బు లభిస్తుంది? ఈ ప్రశ్న తరచుగా సాధారణ క్రికెట్ ప్రేమికుల మనస్సులలో తలెత్తుతుంది. కానీ, బీసీసీఐ అధ్యక్షుడికి నెలవారీ జీతం ఏమీ రాదని తెలిస్తే మీరు ఆశ్చర్యపోతారు. అయినప్పటికీ, అతను భారీగానే సంపాదిస్తాడు.
బీసీసీఐ ప్రతిరోజూ ఏదో ఒక కారణం చేత ముఖ్యాంశాల్లో ఉంటుంది. ప్రస్తుతం అధ్యక్ష పదవి మార్పు కారణంగా వార్తల్లో నిలుస్తోంది. మాజీ అనుభవజ్ఞుడైన ఆల్ రౌండర్ రోజర్ బిన్నీ తన పదవీకాలం ముగిసిన వెంటనే బీసీసీఐ అధ్యక్ష పదవి నుంచి వైదొలిగారు. ఇప్పుడు 2025 సెప్టెంబర్లో కొత్త అధ్యక్షుడి నియామకం కోసం ఎన్నికలు జరగనున్నాయి. అప్పటి వరకు ఉపాధ్యక్షుడు రాజీవ్ శుక్లా ఈ బాధ్యతను తాత్కాలికంగా చేపట్టారు. ఇటువంటి పరిస్థితిలో, అప్పటి వరకు బోర్డు నిర్ణయాలు ఆయన అనుమతితో మాత్రమే తీసుకోనున్నారు.
ఛైర్మన్కు జీతం రాదు..
ఇప్పుడు ప్రశ్న ఏమిటంటే, ఈ కాలంలో రాజీవ్ శుక్లాకు బీసీసీఐ నుంచి ఎక్కువ డబ్బు వస్తుందా? వాస్తవానికి బీసీసీఐ రాజ్యాంగంలో అధ్యక్షుడు, ఉపాధ్యక్షుడు, కార్యదర్శి, జాయింట్ సెక్రటరీ, కోశాధికారి పదవులు కేవలం గౌరవ పదవులు అని స్పష్టంగా ఉంది. అంటే, వారు బీసీసీఐ జీతంతో పనిచేయరు. కానీ, వేర్వేరు పనులలో పాల్గొన్నందుకు బీసీసీఐ వారికి చెల్లిస్తుంది. బోర్డు ఈ అధికారులందరికీ వేర్వేరు సమావేశాలు, ఇతర పనులకు హాజరు కావడానికి లేదా ఎక్కడికైనా వెళ్లడానికి భత్యాలు ఇస్తుంది.
అధికారులు డబ్బు ఎలా సంపాదిస్తారంటే..
బీసీసీఐ నిబంధనల ప్రకారం, భారతదేశంలో బీసీసీఐకి సంబంధించిన ఏదైనా సమావేశానికి హాజరైనందుకు అధ్యక్షుడు, ఉపాధ్యక్షుడు, కార్యదర్శి వంటి అధికారులు రోజుకు 40 వేల రూపాయలు పొందుతారు. అదేవిధంగా, విదేశాలలో జరిగే ఏదైనా సమావేశానికి హాజరైనందుకు రోజుకు 1000 డాలర్ల భత్యం ఇస్తుంది. సమావేశాలతో పాటు, దేశంలో బీసీసీఐకి సంబంధించిన ఏదైనా పనికి హాజరైనందుకు రోజుకు 30,000 రూపాయలు ఇస్తారు. అధ్యక్షుడుతో సహా ఈ అధికారులకు బిజినెస్ క్లాస్ టిక్కెట్లు, లగ్జరీ హోటళ్లలో బస ఖర్చులను బీసీసీఐ స్వయంగా భరిస్తుంది.
మరిన్ని క్రీడా వార్తల కోసం ఇక్కడ క్లిక్ చేయండి..
