Asia Cup 2025 : ఆసియా కప్ నుంచి పాకిస్థాన్ అవుట్.. జై షా అంటే పీసీబీకి ఎందుకంత భయం? 

Asia Cup 2025 : ఆసియా కప్ 2025లో పాకిస్థాన్ జట్టు పేలవమైన ప్రదర్శన కనబరుస్తోంది. ఇప్పుడు ఒక వివాదాస్పద నిర్ణయం కారణంగా ఇరుకున పడింది. ఇటీవల భారత్‌తో జరిగిన మ్యాచ్ తర్వాత భారత ఆటగాళ్లతో కరచాలనం చేయకపోవడంపై వివాదం మొదలైంది. పాకిస్థాన్ ఈ ఘటనపై మ్యాచ్ రెఫరీ ఆండీ పైక్రాఫ్ట్‌పై ఫిర్యాదు చేసింది. పాకిస్తాన్ క్రికెట్ బోర్డు ఆరోపణల ప్రకారం.. ఆండీ పైక్రాఫ్ట్ రెండు జట్లను కరచాలనం చేయకుండా అడ్డుకున్నారని పేర్కొంది. అయితే, ఐసీసీ మ్యాచ్ రెఫరీకి క్లీన్ చిట్ ఇచ్చింది. ఒకవేళ మ్యాచ్ రెఫరీపై చర్యలు తీసుకోకపోతే ఆసియా కప్ నుంచి పాకిస్థాన్ తప్పుకుంటుందని వార్తలు వచ్చాయి. కానీ, తాజా నివేదిక ప్రకారం.. పాకిస్థాన్ క్రికెట్ బోర్డు (పీసీబీ) ఈ నిర్ణయం తీసుకోదు. దీని వెనుక ప్రధాన కారణం జై షా అని తెలుస్తోంది.

జై షా అంటే పీసీబీకి భయం ఎందుకు?

టైమ్స్ ఆఫ్ ఇండియా నివేదిక ప్రకారం.. పాకిస్థాన్ క్రికెట్ బోర్డు తన జట్టును ఆసియా కప్ నుంచి ఉపసంహరించుకోదు. పీసీబీ వర్గాలు తెలిపిన సమాచారం ప్రకారం, ఒకవేళ పాకిస్థాన్ ఆసియా కప్ నుంచి తప్పుకుంటే, జై షా నేతృత్వంలోని ఐసీసీ భారీ జరిమానా విధించే అవకాశం ఉంది. ఈ ఆర్థిక జరిమానా చాలా ఎక్కువగా ఉండవచ్చు, దీనిని పీసీబీ భరించలేదు. పీసీబీ వర్గాల ప్రకారం.. ఛాంపియన్స్ ట్రోఫీ తర్వాత పాకిస్థాన్‌లోని అన్ని స్టేడియాలను సరిచేయడానికి చాలా డబ్బు ఖర్చు అయింది, దీంతో పీసీబీ ఆర్థిక పరిస్థితి అంతగా బాగాలేదు.

పాకిస్థాన్ తదుపరి మ్యాచ్ ఎప్పుడు?

ఆసియా కప్‌లో పాకిస్థాన్ జట్టు తదుపరి మ్యాచ్ సెప్టెంబర్ 17న యూఏఈతో ఆడనుంది. ఈ మ్యాచ్‌లో పాకిస్థాన్ గెలవడం చాలా ముఖ్యం, ఎందుకంటే యూఏఈ గెలిస్తే పాకిస్థాన్ సూపర్-4 రౌండ్‌కు చేరుకోలేకపోవచ్చు. ఒకవేళ పాకిస్థాన్ యూఏఈని ఓడించినట్లయితే, సెప్టెంబర్ 21న భారత్, పాకిస్థాన్ మధ్య మరోసారి పోరు ఉంటుంది. భారత్, పాకిస్థాన్ జట్లు మంగళవారం ఐసీసీ అకాడమీలో ప్రాక్టీస్ చేయనున్నాయి. ఈ రెండు జట్ల ప్రాక్టీస్ సమయం వేరుగా ఉన్నప్పటికీ ఒక గంట పాటు రెండు జట్లు ఒకే చోట ఉంటాయి. భారత్ సాయంత్రం 6 గంటల నుంచి రాత్రి 9 గంటల వరకు శిక్షణ తీసుకోనుంది, పాకిస్థాన్ రాత్రి 8 గంటల నుంచి 11 గంటల వరకు ప్రాక్టీస్ చేయనుంది.

మరిన్ని క్రీడా వార్తల కోసం ఇక్కడ క్లిక్ చేయండి..