MS Dhoni: ఐపీఎల్‌కు గుడ్ బై చెప్పనున్న ‘తలా’.. ఎప్పుడు, ఎక్కడంటే?

MS Dhoni IPL Retirement: భారత క్రికెట్ చరిత్రలో ఎంఎస్ ధోని పేరు ఒక సంచలనం. మైదానంలో ఆయన అడుగుపెడితే వచ్చే ఆ కేకలు, ఆ ఉత్సాహం మాటల్లో వర్ణించలేం. ఈక్రమంలో, 18 ఏళ్ల సుదీర్ఘ ప్రయాణానికి ముగింపు పలకనున్నాడా? ఈ నిర్ణయం వెనుక ఉన్న కారణాలేంటి? అనే ఆసక్తికర విషయాలను ఇప్పడు తెలుసుకుందాం..

Ms Dhoni Ipl Retirement

Venkata Chari |
Updated on: May 14, 2026 | 4:57 PM

MS Dhoni IPL Retirement: 2008లో ఐపీఎల్ మొదలైనప్పటి నుంచి ధోని చెన్నై సూపర్ కింగ్స్‌కు సారథిగా వ్యవహరిస్తూ వస్తున్నాడు. ఈ సుదీర్ఘ కాలంలో ఆయన తన జట్టుకు ఐదుసార్లు ఐపీఎల్ ట్రోఫీని అందించి, అత్యంత విజయవంతమైన కెప్టెన్‌గా రికార్డు సృష్టించాడు. కేవలం ఒక ఆటగాడిగానే కాకుండా, ఒక వ్యూహకర్తగా, మెంటార్‌గా చెన్నై జట్టును అగ్రస్థానంలో నిలబెట్టాడు. ధోని సారథ్యంలో సిఎస్కే ఒక కుటుంబంగా ఎదిగిందని చెప్పడంలో అతిశయోక్తి లేదు.

వయసు, ఆరోగ్య సమస్యలు..

క్రికెట్ వంటి శారీరక శ్రమతో కూడిన క్రీడలో వయసు అనేది ఒక కీలక అంశం. సాధారణంగా ఏ ఆటగాడైనా 38 ఏళ్లు వచ్చేసరికి రిటైర్మెంట్ గురించి ఆలోచిస్తారు. కానీ ధోని తన 40వ పడిలో కూడా యువకులకు పోటీనిస్తూ ఆడుతూ వచ్చాడు. అయితే, ప్రస్తుత పరిస్థితుల్లో ఆయన ఆరోగ్యం సహకరించడం లేదని తెలుస్తోంది. ముఖ్యంగా గత ఏడాది మోకాలి గాయానికి శస్త్రచికిత్స చేయించుకున్నప్పటికీ, ఆ గాయం మళ్ళీ తిరగబెట్టిందని సమాచారం. ఐపీఎల్ 2026 సీజన్ ఆరంభానికి ముందే ధోని మళ్ళీ గాయపడటం, ఆయన ఫిట్‌నెస్‌పై సందేహాలను పెంచుతోంది.

గాయాల ప్రభావం, రిటైర్మెంట్ నిర్ణయం..

ధోని తన ఆరోగ్య పరిస్థితిని దృష్టిలో ఉంచుకుని ఇక రిటైర్మెంట్ తీసుకోవడమే ఉత్తమమని భావిస్తున్నట్లు సన్నిహిత వర్గాల సమాచారం. ఫిట్‌నెస్ లేకపోయినా కేవలం అభిమానుల కోసం ఆడుతున్న ధోని, ఇక తన స్థానాన్ని యువకులకు అప్పగించాలని యోచిస్తున్నారట. గాయాలతో బాధపడుతూ మైదానంలో పడరాని పాట్లు పడటం కంటే, గౌరవప్రదంగా రిటైర్ అవ్వడమే మేలని ఆయన నిర్ణయించుకున్నట్లు తెలుస్తోంది.

ధోని లేని సీఎస్కే.. కొత్త వ్యూహాలు..

ప్రస్తుత సీజన్‌లో ధోని పూర్తిస్థాయిలో అందుబాటులో లేకపోయినా, చెన్నై సూపర్ కింగ్స్ అద్భుతంగా రాణిస్తోంది. ఆరంభంలో కొన్ని మ్యాచ్‌ల్లో తడబడినప్పటికీ, ఆ తర్వాత వరుస విజయాలతో దూసుకుపోతోంది. ముఖ్యంగా వికెట్ కీపర్ స్థానంలో సంజు శాంసన్ వంటి ఆటగాళ్ళు సీఎస్కే కోసం మెరుగ్గా పనిచేస్తుండటం జట్టుకు సానుకూల అంశం. జట్టు ప్రస్తుతం ప్లేఆఫ్ దిశగా సాగుతుండటం చూస్తుంటే, ధోని లేని లోటును భర్తీ చేసేందుకు పీఎస్కే సిద్ధంగా ఉందని అర్థమవుతోంది.

చెన్నై జట్టులో ధోని భవిష్యత్తు..

ఒకవేళ ధోని ఆటగాడిగా రిటైర్మెంట్ ప్రకటించినా, ఆయన చెన్నై సూపర్ కింగ్స్ కుటుంబం నుంచి విడిపోరని అభిమానులు నమ్ముతున్నారు. ఆయన అనుభవాన్ని దృష్టిలో ఉంచుకుని జట్టు యాజమాన్యం ఆయనను ‘హెడ్ కోచ్’ (Head Coach) లేదా ‘మెంటార్’ (Mentor) గా నియమించే అవకాశం ఉంది. మైదానంలో కాకపోయినా, డ్రెస్సింగ్ రూమ్‌లో ధోని ఉంటే ఆ ప్రభావం జట్టుపై సానుకూలంగా ఉంటుందని యాజమాన్యం భావిస్తోంది.

ఎంఎస్ ధోని రిటైర్మెంట్ అనేది కేవలం ఒక వ్యక్తికి సంబంధించిన విషయం కాదు, అది కోట్ల మంది అభిమానుల భావోద్వేగం. ఆయన ఆట చూడటానికి లక్షలాది మంది ఇప్పటికీ స్టేడియాలకు తరలి వస్తున్నారు. అయితే, క్రీడాకారుడిగా ఆయన ప్రయాణం ముగిసినా, ఒక లెజెండ్‌గా ఆయన పేరు క్రికెట్ చరిత్రలో చిరస్థాయిగా నిలిచిపోతుంది. ‘తలా’ నిర్ణయం ఏదైనా, అభిమానులు ఆయనకు ఎల్లప్పుడూ అండగా ఉంటారు.