Video: వామ్మో.. క్యాచ్ పట్టబోయి మైదానంలో కుప్పకూలిన స్టార్ బౌలర్.. వీడియో చూస్తే గజ్జుమనాల్సిందే..

ఢిల్లీ క్యాపిటల్స్ వర్సెస్ పంజాబ్ కింగ్స్ మధ్య జరుగుతున్న 35వ లీగ్ మ్యాచ్‌లో ఈ హృదయ విదారక ఘటన చోటుచేసుకుంది. పంజాబ్ బ్యాటర్ కొట్టిన బంతిని గాలిలో ఎగిరి క్యాచ్ పట్టే క్రమంలో ఎన్గిడి నియంత్రణ కోల్పోయాడు. క్యాచ్ జారవిడవడమే కాకుండా, అతను వెనుకకు పడిపోవడంతో తల వెనుక భాగం నేలకు బలంగా తగిలింది. దెబ్బ తగిలిన వెంటనే ఎన్గిడి కదలకుండా మైదానంలోనే పడిపోయాడు. ఇది చూసిన స్టేడియంలోని వారంతా ఒక్కసారిగా నిశ్శబ్దంలో మునిగిపోయారు.

వెంటనే స్పందించిన వైద్య బృందం..

పరిస్థితి తీవ్రతను గమనించిన ఫిజియోథెరపిస్ట్ వెంటనే మైదానంలోకి పరుగెత్తుకొచ్చారు. ఎన్గిడి స్పందన లేకుండా పడి ఉండటంతో స్ట్రెచర్‌ను పిలిపించారు. తోటి ఆటగాడు ట్రిస్టన్ స్టబ్స్, రిజర్వ్ ప్లేయర్ అశుతోష్ శర్మ ఎన్గిడి దగ్గరకు వెళ్లి ధైర్యం చెప్పాడు. కొద్దిసేపటి తర్వాత ఎన్గిడి కళ్ళు తెరిచి వైద్యులతో మాట్లాడటం ప్రారంభించడం అందరికీ ఊరటనిచ్చింది. వైద్యుల సూచనల మేరకు అతను వేళ్లను కదిలిస్తూ స్పందించాడు. ఢిల్లీ బౌలింగ్ కోచ్ మునాఫ్ పటేల్ కూడా మైదానంలోకి వచ్చి పరిస్థితిని సమీక్షించాడు.

Lungi Ngidi Injury #lungingidi #dcvspbks pic.twitter.com/05ofZT8l9f

— Syed Umaiyd (@SyedUmaiyd) April 25, 2026

కన్‌కషన్ సబ్‌స్టిట్యూట్ వచ్చే అవకాశం..

ప్రస్తుతం ఎన్గిడిని స్ట్రెచర్‌పై మైదానం వెలుపలికి తీసుకెళ్లారు. తలకు దెబ్బ తగలడంతో ‘కన్‌కషన్’ నిబంధనల ప్రకారం అతనికి వైద్య పరీక్షలు నిర్వహిస్తున్నారు. ఒకవేళ అతను తదుపరి మ్యాచ్ ఆడలేని పరిస్థితి ఉంటే, నిబంధనల ప్రకారం ఢిల్లీ జట్టు మరో ఆటగాడిని మైదానంలోకి పంపే అవకాశం ఉంది. ఎన్గిడి వంటి కీలక బౌలర్ దూరం కావడం ఢిల్లీ జట్టు విజయవకాశాలపై ప్రభావం చూపే ప్రమాదం ఉంది.

ఆందోళనలో అభిమానులు..

లుంగీ ఎన్గిడి త్వరగా కోలుకోవాలని సోషల్ మీడియా వేదికగా నెటిజన్లు ప్రార్థిస్తున్నారు. ఈ సీజన్‌లో ఎన్గిడి అద్భుతమైన ఫామ్‌లో ఉన్నాడు. అతనికి తగిలిన గాయం తీవ్రతపై జట్టు యాజమాన్యం త్వరలోనే అధికారిక ప్రకటన చేయనుంది. క్రీడాకారుల భద్రత దృష్ట్యా మైదానాల్లో ఇలాంటి ప్రమాదాలు జరిగినప్పుడు అత్యవసర వైద్య సదుపాయాలు ఎంత ముఖ్యమో ఈ ఘటన మరోసారి నిరూపించింది.