Gas Stove: మీ గ్యాస్ స్టవ్‌లో ఎర్ర మంట వస్తోందా.? ఇలా చిటికెలో ఈజీగా రిపేర్ చేసుకోవచ్చు..

వంటగదిలో గ్యాస్ స్టవ్ అనేది మన నిత్య జీవితంలో అంతర్భాగం. అయితే, చాలామంది ఎదుర్కొనే ప్రధాన సమస్య స్టవ్ మంట ఎర్రగా రావడం. మంట నీలం రంగులో కాకుండా ఎర్రగా వస్తే, అది కేవలం పాత్రలను నల్లగా మార్చడమే కాదు, గ్యాస్ భారీగా వృథా అవుతోందని అర్థం. ఈ సమస్యను గుర్తించి, చాలా తక్కువ ఖర్చుతో ఇంట్లోనే ఎలా సరిచేసుకోవాలో ఇప్పుడు చూద్దాం.

గ్యాస్ సిలిండర్‌లో గ్యాస్ తక్కువగా ఉండటం:

గ్యాస్ స్టవ్‌లో ఎర్ర మంట రావడానికి ఒక ప్రధాన కారణం గ్యాస్ సిలిండర్‌లో గ్యాస్ పరిమాణం తగ్గిపోవడం. సిలిండర్ చివరి దశకు చేరుకున్నప్పుడు, అందులోని గ్యాస్ ఒత్తిడి తక్కువగా ఉండటం వల్ల మంట పూర్తి నీలం రంగులో కాకుండా ఎర్రగా లేదా పసుపు రంగులో వెలుగుతుంది. సాధారణంగా, సిలిండర్‌ను బిగించిన వెంటనే ఈ సమస్య రాదు, కానీ 20 రోజుల వినియోగం తర్వాత ఇది గమనించవచ్చు. ఈ పరిస్థితిలో, సిలిండర్‌ను మార్చడం ద్వారా సమస్య పరిష్కారం అవుతుంది.

బర్నర్‌లు మురికిగా ఉండటం లేదా సరిగా అమర్చకపోవడం:

చాలా మంది గ్యాస్ స్టవ్‌ను శుభ్రం చేసినప్పటికీ, బర్నర్‌లను పట్టించుకోరు. బర్నర్‌ల రంధ్రాలలో దుమ్ము, ధూళి, లేదా నూనె మరకలు చేరినప్పుడు, గ్యాస్ ప్రవాహం సరిగా ఉండదు. ఇది ఎర్ర మంటను కలిగిస్తుంది. అలాగే, బర్నర్‌లను సరైన స్థానంలో అమర్చకపోతే, మంట పక్కల నుంచి రావడం లేదా సరిగా వ్యాపించకపోవడం జరుగుతుంది. బర్నర్‌లను సరిగా అమర్చడానికి, వాటిని గాడిలో సరిగ్గా కూర్చోబెట్టి, కొద్దిగా తిప్పడం ద్వారా సెట్ చేయాలి. బర్నర్‌లను నెలకు ఒకసారి శుభ్రం చేయండి. వాటిని శుభ్రం చేసిన తర్వాత, స్టవ్‌పై అమర్చేటప్పుడు అవి గాడిలో సరిగ్గా కూర్చున్నాయో లేదో నిర్ధారించుకోండి. దీనివల్ల మంట నీలం రంగులోకి మారి, పాత్రలు నల్లగా మారకుండా ఉంటాయి.

గ్యాస్ నాజిల్(నట్) సమస్య..

గ్యాస్ స్టవ్‌లో ఎర్ర మంట రావడానికి మరొక ముఖ్య కారణం.. గ్యాస్ నాజిల్(నట్) లోపల అమర్చబడిన చిన్న రంధ్రం పరిమాణం. కొన్నిసార్లు పెద్ద పొయ్యికి ఎక్కువ గ్యాస్ ప్రవాహం అవసరమని భావించి, పెద్ద నాజిల్ అమర్చి ఉండవచ్చు. దీనివల్ల గ్యాస్ ఎక్కువగా ప్రవహించి, ఎర్ర మంట రావచ్చు. ఈ సమస్యను సరిచేయడానికి, స్టవ్ కింద భాగాన ఉన్న నాజిల్‌ను మార్చాలి. ముందుగా గ్యాస్ రెగ్యులేటర్‌ను బంద్ చేసి లేదా తీసివేసి భద్రతను నిర్ధారించుకోవాలి. బర్నర్ సెట్‌ను తెరిచి, లోపల ఉన్న చిన్న నాజిల్‌ను తొలగించి, దాని స్థానంలో చిన్న నాజిల్‌ను అమర్చాలి. పెద్ద పొయ్యికి నంబర్ 77 గల నాజిల్ అనుకూలంగా ఉంటుంది. చిన్న పొయ్యికి మరింత తక్కువ మంట కావాలంటే నంబర్ 65 గల నాజిల్‌ను వాడవచ్చు. ఈ నజిల్‌లు గ్యాస్ స్టవ్ విడిభాగాల దుకాణాలలో కేవలం రూ. 10కే లభిస్తాయి. సరైన నాజిల్‌ను అమర్చడం ద్వారా గ్యాస్ ప్రవాహం నియంత్రించబడి, మంట నీలం రంగులోకి మారుతుంది.

ఇది చదవండి: లవర్‌తో కలిసి ఫ్లాట్‌ తీసుకున్నాడు.. రెండు రోజులైనా శబ్దం లేదు.. తలుపులు బద్దలుకొట్టి చూడగా..