ఇది చిటికెడు వేస్తే చాలు.. మందార మొక్కకు వచ్చే తెల్లని పురుగులను తరిమి కొట్టొచ్చు..

మందార మొక్కలు మన ఇంటి పెరట్లో అందంగా కనిపిస్తూ, ఏడాది పొడవునా పూలను పూస్తాయి. అయితే, ఈ మొక్కలను ప్రధానంగా వేధించే సమస్య ‘పిండినల్లి’. ముఖ్యంగా వేసవి కాలంలో ఈ తెగులు ఉధృతి ఎక్కువగా ఉంటుంది. మొక్క ఆకుల అడుగున, మొగ్గలపై తెల్లటి దూదిలా పేరుకుపోయే ఈ పురుగులు మొక్క రసాన్ని పీల్చేసి, చివరకు అది చనిపోయేలా చేస్తాయి. అనేకమంది తెగులు ముదిరిన తర్వాత స్పందిస్తారు. కానీ మొక్క ఆరోగ్యంగా ఉన్నప్పుడే వారానికి ఒకసారి పెస్ట్ కంట్రోల్ స్ప్రే చేయడం ఉత్తమం. మొక్కకు సరిగ్గా నీరు పోయకపోయినా లేదా అధికంగా పోసినా దాని రోగనిరోధక శక్తి తగ్గి పిండినల్లి అటాక్ అయ్యే అవకాశం ఉంది. మొగ్గలు పండుబారి రాలిపోవడం లేదా ఆకులు ముడుచుకుపోవడం వంటివి జరిగితే మీ మొక్క పిండినల్లి బారిన పడిందని గుర్తించాలి.

నివారణకు అద్భుతమైన చిట్కా:

ఇంట్లోనే లభించే వస్తువులతో దీనికి చెక్ పెట్టవచ్చు. ఒక లీటరు నీటిలో 5 మిల్లీలీటర్ల డిటర్జెంట్, 5 మిల్లీలీటర్ల వేప నూనె(లేదా వంట నూనె) కలిపి బాగా షేక్ చేయాలి. ఈ మిశ్రమాన్ని కేవలం సాయంత్రం వేళల్లోనే మొక్కలపై స్ప్రే చేయాలి. ఎండలో స్ప్రే చేస్తే ఆకులు కాలిపోయే ప్రమాదం ఉంది. మొక్క మొత్తం, ముఖ్యంగా ఆకుల అడుగు భాగాలు తడిచేలా స్ప్రే చేయాలి. గుర్తుంచుకోవాల్సిన విషయం ఏమిటంటే, ప్రతి వారం ఒకే రకమైన పెస్ట్ కంట్రోల్ వాడకుండా మార్చి మార్చి స్ప్రే చేయాలి. అప్పుడే తెగుళ్లు మందులకు అలవాటు పడకుండా ఉంటాయి. ఒకవేళ పిండినల్లిని నిర్లక్ష్యం చేస్తే అవి ‘స్కేల్ బగ్స్’గా మారి కాండానికి అతుక్కుపోయి మొక్కను పూర్తిగా నాశనం చేస్తాయి. కాబట్టి క్రమం తప్పకుండా జాగ్రత్తలు తీసుకుంటే మీ మందార మొక్కలు ఆరోగ్యంగా, నిండుగా పూలను పూస్తాయి.

ఇది చదవండి: ఇంట్లోనే హోటల్ స్టైల్ పునుగులు తయారు చేయండిలా.. అప్పటికప్పుడు ఇలా చేస్తే కరకరలాడాల్సిందే!