IND vs SA Test : శుభ్‌మన్ గిల్‌కు తొలి పెద్ద సవాలు..సౌతాఫ్రికాపై భారత్ 15 ఏళ్ల టెస్ట్ ఆధిపత్యం నిలుస్తుందా?

IND vs SA Test :భారత్, సౌతాఫ్రికా మధ్య క్రికెట్ అభిమానులు ఎంతో ఆసక్తిగా ఎదురుచూస్తున్న రెండు మ్యాచ్‌ల టెస్ట్ సిరీస్ నేటి నుంచి (నవంబర్ 14) కోల్‌కతాలోని చారిత్రక ఈడెన్ గార్డెన్స్ స్టేడియంలో ప్రారంభం కానుంది. ఈ టెస్ట్ మ్యాచ్‌తో యువ ఓపెనర్ శుభ్‌మన్ గిల్ సారథ్యంలోని భారత టెస్ట్ జట్టుకు అసలైన పరీక్ష మొదలుకానుంది. వెస్టిండీస్‌పై సులభంగా సిరీస్ గెలిచినప్పటికీ ప్రపంచ టెస్ట్ ఛాంపియన్ అయిన సౌతాఫ్రికాను ఓడించడం అంత తేలికైన విషయం కాదు. ముఖ్యంగా ఈ సిరీస్‌లో భారత్ తన 15 ఏళ్ల టెస్ట్ ఆధిపత్యాన్ని కాపాడుకోవాల్సిన అతిపెద్ద బాధ్యత గిల్‌పై ఉంది.

ఈ టెస్ట్ సిరీస్ భారత్‌కు కేవలం గెలుపు, ఓటముల లెక్క కాదు, సుదీర్ఘకాలంగా దేశంలో కొనసాగుతున్న ఆధిపత్యాన్ని కాపాడుకోవాల్సిన సవాలు. టెస్ట్ ఫార్మాట్‌లో కెప్టెన్‌గా ఇది శుభ్‌మన్ గిల్‌కు రెండో సిరీస్. గతంలో వెస్టిండీస్‌ను ఓడించినా, ప్రపంచ టెస్ట్ ఛాంపియన్ సౌతాఫ్రికాను ఓడించడం అంత సులభం కాదు.

సౌత్ ఆఫ్రికా జట్టు గత 15 సంవత్సరాలుగా భారత గడ్డపై ఒక్క టెస్ట్ మ్యాచ్ కూడా గెలవలేకపోయింది. చివరిసారిగా వారు 2010లో భారత్‌లో టెస్ట్ మ్యాచ్‌ను గెలుచుకున్నారు. ఈ అద్భుతమైన రికార్డును కొనసాగించే బాధ్యత గిల్ మరియు టీమ్‌పై ఉంది. సాధారణంగా ఫాస్ట్ బౌలింగ్‌కు ప్రసిద్ధి చెందిన సౌతాఫ్రికా, ఈసారి స్పిన్నర్ల విషయంలో టీమిండియాకు గట్టి సవాలు విసిరే అవకాశం ఉంది.

ఇటీవల పాకిస్తాన్‌పై జరిగిన సిరీస్‌లో ఆఫ్రికా స్పిన్నర్లు అద్భుతంగా రాణించారు. మొత్తం 39 వికెట్లలో ఏకంగా 35 వికెట్లు కేవలం స్పిన్నర్ల ఖాతాలో చేరాయి. సౌతాఫ్రికా జట్టులో ఉన్న కేశవ్ మహరాజ్, సైమన్ హార్మర్, సెనురన్ ముత్తుస్వామి వంటి స్టార్ స్పిన్నర్లు భారత బ్యాటింగ్‌కు పెను ప్రమాదాన్ని కలిగించే అవకాశం ఉంది.

టెస్ట్ క్రికెట్‌లో భారత్, సౌతాఫ్రికా హెడ్-టు-హెడ్ గణాంకాలు ఆసక్తికరంగా ఉన్నాయి. భారత్, సౌతాఫ్రికా జట్లు ఇప్పటివరకు మొత్తం 44 టెస్ట్ మ్యాచ్‌లలో తలపడ్డాయి. ఈ ముఖాముఖి పోరులో సౌతాఫ్రికా కొంచెం పైచేయి సాధించింది. సౌత్ ఆఫ్రికా 18 మ్యాచ్‌లలో విజయం సాధించగా, భారత్ 16 మ్యాచ్‌లలో గెలిచింది. మిగిలిన 10 మ్యాచ్‌లు డ్రాగా ముగిశాయి.

భారత గడ్డపై జరిగిన టెస్ట్ మ్యాచ్‌లలో మాత్రం భారత్ స్పష్టమైన ఆధిక్యాన్ని కనబరిచింది. భారత్‌లో ఇప్పటివరకు జరిగిన మొత్తం 19 టెస్టుల్లో, భారత్ 11 విజయాలు నమోదు చేసింది. దీనికి భిన్నంగా సౌతాఫ్రికా కేవలం 5 మ్యాచ్‌లలో మాత్రమే గెలవగలిగింది. ఈ సిరీస్‌లలో 3 మ్యాచ్‌లు డ్రా అయ్యాయి.

కోల్‌కతాలోని ఐకానిక్ ఈడెన్ గార్డెన్స్ మైదానంలో భారత్, సౌతాఫ్రికా మధ్య కేవలం 3 టెస్ట్ మ్యాచ్‌లు జరిగాయి. ఈ రికార్డు కూడా భారత్‌కు అనుకూలంగా ఉంది. భారత్ ఇక్కడ 2 మ్యాచ్‌లలో విజయం సాధించగా, సౌతాఫ్రికా ఒక మ్యాచ్‌లో గెలిచింది. ఈ వేదికపై ఇప్పటివరకు ఏ మ్యాచ్ కూడా డ్రా కాలేదు.

ఇరు జట్ల పూర్తి స్క్వాడ్ వివరాలు

భారత టెస్ట్ స్క్వాడ్: శుభ్‌మన్ గిల్ (కెప్టెన్), కేఎల్ రాహుల్, యశస్వి జైస్వాల్, సాయి సుదర్శన్, రిషబ్ పంత్, ధ్రువ్ జురెల్, రవీంద్ర జడేజా, వాషింగ్టన్ సుందర్, జస్ప్రీత్ బుమ్రా, ఆకాష్ దీప్, మహ్మద్ సిరాజ్, కుల్దీప్ యాదవ్, అక్షర్ పటేల్, దేవదత్త పడిక్కల్.

సౌత్ ఆఫ్రికా టెస్ట్ స్క్వాడ్: టెంబా బావుమా (కెప్టెన్), కార్బిన్ బాష్, డెవాల్డ్ బ్రెవిస్, టోనీ డి జొర్జి, జుబైర్ హంజా, సైమన్ హార్మర్, మార్కో జాన్సెన్, కేశవ్ మహరాజ్, ఐడెన్ మార్కరమ్, వియాన్ ముల్డర్, సెనురన్ ముత్తుసామి, కగిసో రబాడ, ర్యాన్ రికేల్టన్, ట్రిస్టన్ స్టబ్స్, కైల్ వెరిన్.

మరిన్ని క్రీడా వార్తల కోసం ఇక్కడ క్లిక్ చేయండి..