IND vs SA 1st ODI : అయ్యో..మళ్ళీ అదే కథే..వరుసగా 19వ వన్డేలోనూ టాస్ ఓడిన భారత్!

IND vs SA 1st ODI : భారత్, సౌతాఫ్రికా మధ్య జరుగుతున్న మొదటి వన్డే మ్యాచ్ రాంచీలోని JSCA స్టేడియంలో మొదలైంది. ఈ మ్యాచ్‌లో సౌతాఫ్రికా కెప్టెన్ ఎయిడెన్ మార్క్రమ్ (గాయం కారణంగా టెంబా బావుమా స్థానంలో) టాస్ గెలిచి ముందుగా బౌలింగ్ ఎంచుకున్నాడు. అయితే ఈ టాస్ ఫలితం గురించి భారత అభిమానులను కలవరపెట్టే ఒక ఆసక్తికరమైన అంశం ఉంది. అది టీమిండియాకు వరుసగా 19వ సారి కూడా టాస్ గెలిచే అదృష్టం దక్కలేదు.గతంలో రోహిత్ శర్మ, ఆ తర్వాత శుభ్‌మన్ గిల్ కెప్టెన్సీలోనూ మారిన అదృష్టం, తాత్కాలిక కెప్టెన్ కేఎల్ రాహుల్ సారథ్యంలోనూ మారకపోవడం గమనార్హం.

టీమిండియా 2023 వరల్డ్ కప్ సెమీ ఫైనల్‌లో న్యూజిలాండ్‌పై చివరిసారిగా టాస్ గెలిచింది. సరిగ్గా 2023 నవంబర్ 19 నుంచి (2025 నవంబర్ 30 వరకు) భారత్ వరుసగా 19 వన్డే మ్యాచ్‌ల్లో టాస్ ఓడిపోయింది. ఇందులో 2023 ఛాంపియన్స్ ట్రోఫీ ఫైనల్ మ్యాచ్ కూడా ఉంది. వన్డే క్రికెట్ చరిత్రలో ఒక జట్టు వరుసగా అత్యధికంగా టాస్ ఓడిపోవడం ఇదే. ఈ అనవసరమైన ప్రపంచ రికార్డును భారత్ ఇప్పటికే బద్దలు కొట్టింది. ఇంతకుముందు ఈ జాబితాలో నెదర్లాండ్స్ జట్టు 11 వరుస టాస్ ఓటములతో రెండో స్థానంలో ఉండేది.

చాంపియన్స్ ట్రోఫీ తర్వాత రోహిత్ శర్మ వన్డే కెప్టెన్సీ నుంచి తప్పుకోవడంతో, శుభ్‌మన్ గిల్ కెప్టెన్‌గా బాధ్యతలు చేపట్టారు. అయితే గిల్ కెప్టెన్సీలోనూ టాస్ ఓటముల పరంపర కొనసాగింది. ప్రస్తుతం గిల్ గాయం కారణంగా సౌతాఫ్రికా సిరీస్‌కు దూరంగా ఉన్నారు. వైస్ కెప్టెన్ శ్రేయస్ అయ్యర్ కూడా అందుబాటులో లేకపోవడంతో టీమ్ కెప్టెన్‌గా బాధ్యతలు చేపట్టిన కేఎల్ రాహుల్‌ను కూడా టాస్ అదృష్టం వరించలేదు. టాస్ ఓడిపోయినప్పటికీ టీమిండియాను బ్యాటింగ్ చేయమని ప్రత్యర్థి జట్టు సౌతాఫ్రికా ఆహ్వానించింది.

ఇరు జట్ల ప్లేయింగ్ XI వివరాలు

టీమిండియా ప్లేయింగ్ XI : రోహిత్ శర్మ, యశస్వి జైస్వాల్, విరాట్ కోహ్లి, రుతురాజ్ గైక్వాడ్, వాషింగ్టన్ సుందర్, కేఎల్ రాహుల్ (కెప్టెన్ & వికెట్ కీపర్), రవీంద్ర జడేజా, హర్షిత్ రాణా, కుల్దీప్ యాదవ్, అర్ష్‌దీప్ సింగ్, ప్రసిద్ధ్ కృష్ణ

సౌతాఫ్రికా ప్లేయింగ్ XI : ఎడెన్ మార్క్రమ్ (కెప్టెన్), ర్యాన్ రికెల్టన్, క్వింటన్ డి కాక్ (వికెట్ కీపర్), మాథ్యూ బ్రీట్జ్కే, టోనీ డి జోర్జీ, దేవాళ్డ్ బ్రెవిస్, మార్కో యాన్సెన్, కార్బిన్ బోష్, ప్రేనెలాన్ సుబ్రాయెన్, నాండ్రే బర్గర్, ఓట్నీల్ బార్ట్‌మాన్