Australia vs Hong Kong: 6 ఓవర్లలోనే 135 పరుగులు.. హాంకాంగ్ బౌలర్లను ఉతికేసిన ఆసీస్

Australia vs Hong Kong: హాంకాంగ్ సిక్స్ 2026 టోర్నీ మొదలైంది. మొదటి మ్యాచ్‌లోనే పరుగుల వరద పారింది. ఆతిథ్య హాంకాంగ్‌తో జరిగిన పోరులో ఆస్ట్రేలియా 28 పరుగుల తేడాతో ఘన విజయం సాధించింది. కేవలం ఆరు ఓవర్ల ఆటలోనే ఇరు జట్ల బ్యాటర్లు భారీ షాట్లతో ప్రేక్షకులను అలరించారు. తొలుత బ్యాటింగ్ చేసిన ఆస్ట్రేలియా నిర్ణీత ఆరు ఓవర్లలో 135 పరుగులు చేసింది. లక్ష్య ఛేదనలో హాంకాంగ్ జట్టు 107 పరుగులకే పరిమితమైంది. దీంతో టోర్నీలో ఆస్ట్రేలియా విజయంతో బోణీ కొట్టింది.

13 బంతుల్లో 56 పరుగులు

ఆస్ట్రేలియా భారీ స్కోరుకు కెప్టెన్ మాక్స్ బ్రయంట్ ప్రధాన కారణం. అతడు కేవలం 13 బంతుల్లోనే 56 పరుగులు చేసి హాంకాంగ్ బౌలర్లకు చుక్కలు చూపించాడు. మరో బ్యాటర్ నిక్ హాబ్సన్ కూడా తగ్గేదేలే అన్నట్లు ఆడాడు. 12 బంతుల్లో 40 పరుగులు బాదాడు. క్రిస్ గ్రీన్ 10 బంతుల్లోనే 36 పరుగులు చేసి స్కోరు బోర్డును పరుగులు పెట్టించాడు. ముగ్గురు బ్యాటర్లు కలిసి హాంకాంగ్ బౌలింగ్‌ను చీల్చిచెండాడారు. ఆస్ట్రేలియా ఇన్నింగ్స్‌లో బౌండరీల కంటే సిక్సర్లే ఎక్కువగా వచ్చాయి. మొత్తంగా 18 సిక్సర్లు, 5 ఫోర్లు బాదారు. ఆరు ఓవర్లలోనే 135 పరుగులు సాధించడం ఈ మ్యాచ్‌లో హైలైట్‌గా నిలిచింది.

పోరాడినా లక్ష్యానికి దూరమైన హాంకాంగ్

136 పరుగుల భారీ లక్ష్యంతో బరిలోకి దిగిన హాంకాంగ్‌కు ఆరంభంలోనే ఎదురుదెబ్బ తగిలింది. ఇన్నింగ్స్ మొదటి ఏడు బంతుల్లోనే రెండు వికెట్లు కోల్పోయింది. దీంతో జట్టుపై ఒత్తిడి పెరిగింది. అయితే కెప్టెన్ యాసిమ్ ముర్తజా 13 బంతుల్లో 32 పరుగులు చేసి పోరాడాడు. నస్రుల్లా రాణా కూడా 10 బంతుల్లో 30 పరుగులతో దూకుడుగా ఆడాడు. వీరిద్దరూ వేగంగా పరుగులు చేసినా, లక్ష్యాన్ని అందుకోవడానికి ఆ ప్రయత్నం సరిపోలేదు. చివరికి హాంకాంగ్ 107 పరుగులకే పరిమితమైంది. ఆస్ట్రేలియా 28 పరుగుల తేడాతో విజయాన్ని అందుకుంది.

బౌలర్లపై బ్యాటర్ల దాడి

ఈ మ్యాచ్‌లో బ్యాటర్ల ఆధిపత్యం ఎంతలా సాగిందో బౌలర్ల గణాంకాలు చెబుతున్నాయి. హాంకాంగ్ బౌలర్ బాబర్ హయత్ ఒకే ఓవర్‌లో 29 పరుగులు సమర్పించుకున్నాడు. ఎజాజ్ ఖాన్ ఓవర్లో 27 పరుగులు వచ్చాయి. ఎహసాన్ ఖాన్ వేసిన ఆరు బంతుల్లోనూ 24 పరుగులు పిండుకున్నారు. అయితే కెప్టెన్ యాసిమ్ ముర్తజా మాత్రం ఒక ఓవర్లో 10 పరుగులే ఇచ్చి కాస్త కంట్రోల్ చూపించాడు. ఇరు జట్ల బ్యాటర్లు కలిపి 27 సిక్సర్లు, 14 ఫోర్లు బాదారు. హాంకాంగ్ సిక్స్‌లో ఒక్కో ఇన్నింగ్స్‌కు ఆరు ఓవర్లే ఉంటాయి. ఒక బ్యాటర్ 50 పరుగులు పూర్తి చేసిన తర్వాత రిటైర్డ్ అవుట్ కావాల్సి ఉంటుంది. అంటే హాఫ్ సెంచరీ సాధించిన ఆటగాడు ఆ ఇన్నింగ్స్‌లో మళ్లీ బ్యాటింగ్ చేయలేడు.

భారత్ తొలి మ్యాచ్ పాకిస్థాన్‌తో

హాంకాంగ్ సిక్స్ 2026 టోర్నీ అక్టోబర్ 30న ప్రారంభమై నవంబర్ 1 వరకు కొనసాగనుంది. ఈ పోటీల్లో మొత్తం 12 జట్లు పాల్గొంటున్నాయి. భారత్, పాకిస్థాన్, యూఏఈ జట్లు గ్రూప్-సిలో ఉన్నాయి. టోర్నీలో భారత జట్టు తొలి మ్యాచ్‌ను పాకిస్థాన్‌తో ఆడనుంది. ఆరు ఓవర్ల ఫార్మాట్‌లో ప్రతి బంతికి భారీ షాట్ కొట్టే అవకాశం ఉండటంతో ఈ పోటీలు అభిమానులకు మంచి వినోదాన్ని అందించనున్నాయి. తొలి మ్యాచ్‌లోనే ఆస్ట్రేలియా 135 పరుగులు చేయడంతో మిగతా జట్ల ప్రదర్శనపై ఆసక్తి పెరిగింది.

మరిన్ని క్రీడా వార్తల కోసం ఇక్కడ క్లిక్ చేయండి..