Asia Cup Trophy : ఆసియా కప్ ట్రోఫీ వివాదం.. దిగొచ్చిన నఖ్వీ.. ఆ రోజు ట్రోఫీ తీసుకోవాలని భారత్‌కు పిలుపు

Asia Cup Trophy : ఆసియా కప్ 2025 టైటిల్‌ను గెలిచి చాలా రోజులు గడుస్తున్నా, టీమ్ ఇండియాకు ఇప్పటికీ ట్రోఫీ దక్కలేదు. ఈ ట్రోఫీ వివాదం రోజురోజుకు ముదురుతోంది. పాకిస్థాన్ క్రికెట్ బోర్డు, ఏషియన్ క్రికెట్ కౌన్సిల్ అధ్యక్షుడు మొహ్సిన్ నఖ్వి తన చేతుల మీదుగా భారత జట్టుకు ట్రోఫీని అందజేయాలని పట్టుబడుతున్నారు. అయితే, భారత జట్టు అందుకు నిరాకరిస్తూ వస్తోంది. ఈ నేపథ్యంలో మొహ్సిన్ నఖ్వి ఒక సంచలన నిర్ణయం తీసుకున్నారు. భారత జట్టుకు ట్రోఫీని ఇవ్వడానికి నవంబర్ 10న దుబాయ్‌లో ప్రత్యేక ట్రోఫీ ప్రదానోత్సవ కార్యక్రమాన్ని నిర్వహించబోతున్నట్లు ప్రకటించారు.

ఆసియా కప్ టైటిల్‌ను భారత్ గెలుచుకున్నప్పటికీ గత నెలలో ఫైనల్ తర్వాత జరిగిన పరిస్థితుల కారణంగా భారత జట్టుకు ఇప్పటికీ ట్రోఫీ అందలేదు. ఏసీసీ అధ్యక్షుడు, పీసీబీ అధ్యక్షుడు అయిన మొహ్సిన్ నఖ్వి స్వయంగా ట్రోఫీని అందించాలని పట్టుబడుతున్నారు. ట్రోఫీని అందించడానికి నఖ్వి ఒక అద్భుతమైన నిర్ణయం తీసుకున్నారు. కరాచీలో మీడియాతో మాట్లాడిన ఆయన.. భారత జట్టుకు ట్రోఫీని అందజేయడానికి నవంబర్ 10న దుబాయ్‌లో ఒక ప్రత్యేక వేడుకను నిర్వహిస్తున్నట్లు ప్రకటించారు.

ఈ వేడుకకు భారత జట్టు కెప్టెన్ సూర్యకుమార్ యాదవ్, బీసీసీఐ ఉపాధ్యక్షుడు రాజీవ్ శుక్లాను ఆహ్వానించినట్లు నఖ్వి తెలిపారు. ఈ ట్రోఫీ వివాదంపై భారత క్రికెట్ కంట్రోల్ బోర్డు, ఏషియన్ క్రికెట్ కౌన్సిల్ మధ్య అనేక లేఖల మార్పిడి జరిగింది. “బీసీసీఐతో చాలా లేఖలు మార్పిడి చేసుకున్నాము. నవంబర్ 10న దుబాయ్‌లో ఒక వేడుకను నిర్వహించవచ్చని ఏసీసీ వారికి తెలియజేసింది. మీ కెప్టెన్‌ను, ఆటగాళ్లను తీసుకొని రండి, నా దగ్గర నుంచి ట్రోఫీని స్వీకరించండి” అని నఖ్వి మీడియాకు తెలిపారు. ప్రస్తుతం ఆసియా కప్ ట్రోఫీ ఏసీసీ ప్రధాన కార్యాలయంలో ఉంచబడి ఉంది.

మొహ్సిన్ నఖ్వి పట్టుదల కారణంగా ట్రోఫీని స్వీకరించడంలో జాప్యం జరుగుతుండటంతో, బీసీసీఐ ఈ సమస్యను అంతర్జాతీయ క్రికెట్ వేదికలపై లేవనెత్తాలని యోచిస్తోంది. నవంబర్ 4 నుండి 7 వరకు దుబాయ్‌లో ఐసీసీ బోర్డు సమావేశం జరగనుంది. ఈ సమావేశంలో, ఏసీసీ సమావేశాలలో ఈ ట్రోఫీ సమస్యను లేవనెత్తాలని బీసీసీఐ యోచిస్తున్నట్లు తెలుస్తోంది. ఐసీసీ ప్రస్తుత చైర్మన్ బీసీసీఐ మాజీ కార్యదర్శి జై షా కావడంతో, బీసీసీఐ ఈ సమస్యను మరింత బలంగా ముందుకు తీసుకువెళ్లే అవకాశం ఉంది.

మరిన్ని క్రికెట్‌ వార్తల కోసం ఇక్కడ క్లిక్‌ చేయండి..