BAN vs AUS: 23 ఏళ్ల నిరీక్షణకు తెర.. ఆస్ట్రేలియా గడ్డపై తొలిసారి చరిత్ర సృష్టించిన బంగ్లాదేశ్

BAN vs AUS: బంగ్లాదేశ్ క్రికెట్ చరిత్రలో డార్విన్ పేరు ఇక ప్రత్యేకంగా నిలిచిపోనుంది. 2003లో ఇదే వేదికపై ఆస్ట్రేలియాతో తొలిసారి టెస్టు ఆడిన బంగ్లాదేశ్.. 23 ఏళ్ల తర్వాత అదే మైదానంలో ఆ జట్టుపై చారిత్రక విజయాన్ని నమోదు చేసింది. మ్యాచ్ ఆరంభం నుంచే బంగ్లాదేశ్ ఆధిపత్యం స్పష్టంగా కనిపించింది. తొలుత బ్యాటింగ్ చేసిన ఆస్ట్రేలియా 198 పరుగులకే ఆలౌటైంది. బంగ్లాదేశ్ బౌలర్లను ఎదుర్కోవడంలో కంగారూల బ్యాటర్లు పూర్తిగా తడబడ్డారు. స్టీవ్ స్మిత్ 71 పరుగులతో ఒంటరి పోరాటం చేసినా.. మిగతా బ్యాటర్ల నుంచి అతడికి తగిన సహకారం లభించలేదు. ఆస్ట్రేలియా పతనంలో హసన్ మహమూద్ కీలక పాత్ర పోషించాడు. అద్భుతమైన బౌలింగ్‌తో ఆరు వికెట్లు పడగొట్టి ఆతిథ్య జట్టు బ్యాటింగ్ వెన్నెముకను విరిచేశాడు.

తాంజిద్ సెంచరీతో భారీ ఆధిక్యం

బంగ్లాదేశ్ బ్యాటింగ్‌కు దిగిన తర్వాత మ్యాచ్ పూర్తిగా మరో మలుపు తిరిగింది. యువ ఓపెనర్ తాంజిద్ హసన్ తమీమ్ అద్భుతమైన బ్యాటింగ్‌తో ఆకట్టుకున్నాడు. తన కెరీర్‌లో కేవలం రెండో టెస్టు ఆడుతున్న అతడు ఏకంగా 101 పరుగులు చేసి శతకం సాధించాడు. అతడికి తోడు మొమినుల్ హక్ 49 పరుగులు, నజ్ముల్ హొస్సేన్ శాంటో 84 పరుగులు, మెహిదీ హసన్ మిరాజ్ 65 పరుగులతో విలువైన భాగస్వామ్యాలు అందించారు. దీంతో బంగ్లాదేశ్ తొలి ఇన్నింగ్స్‌లో 426 పరుగులకు చేరుకుంది. ఆస్ట్రేలియాపై ఏకంగా 228 పరుగుల తొలి ఇన్నింగ్స్ ఆధిక్యం సాధించింది. మ్యాచ్‌పై పట్టు పూర్తిగా బంగ్లాదేశ్ చేతుల్లోకి వెళ్లింది.

రెండో ఇన్నింగ్స్‌లోనూ కంగారూలకు తప్పని కష్టాలు

రెండో ఇన్నింగ్స్‌లోనైనా ఆస్ట్రేలియా గట్టిగా బదులిస్తుందని అభిమానులు భావించారు. కానీ బంగ్లాదేశ్ బౌలర్ల ముందు మరోసారి ఆ జట్టు బ్యాటింగ్ తేలిపోయింది. కామెరాన్ గ్రీన్ మాత్రం అద్భుతంగా పోరాడాడు. 201 బంతుల్లో 104 పరుగులు చేసి శతకం సాధించాడు. అతడి పోరాటంతో ఆస్ట్రేలియా రెండో ఇన్నింగ్స్‌లో 284 పరుగులకు చేరుకుంది. అయినప్పటికీ బంగ్లాదేశ్‌కు లక్ష్యం కేవలం 57 పరుగులే కావడంతో విజయం దాదాపు ఖాయమైంది. నాలుగో రోజు లక్ష్య ఛేదనకు దిగిన బంగ్లాదేశ్‌కు ఆరంభంలోనే చిన్న ఎదురుదెబ్బ తగిలింది. ఓపెనర్ తాంజిద్ హసన్ తమీమ్ రెండో ఓవర్‌లోనే ఒక్క పరుగు కూడా చేయకుండానే వెనుదిరిగాడు. అయినా ఆ తర్వాత వచ్చిన బ్యాటర్లు ఎలాంటి ఒత్తిడికి లోనుకాకుండా లక్ష్యాన్ని పూర్తి చేశారు.

స్వదేశంలోనూ ఒకసారి.. ఇప్పుడు ఆస్ట్రేలియాలోనూ చరిత్ర

ఆస్ట్రేలియాపై బంగ్లాదేశ్‌కు ఇది టెస్టుల్లో రెండో విజయం. గతంలో సొంత గడ్డపై ఆ జట్టును ఓడించిన బంగ్లాదేశ్.. ఇప్పుడు తొలిసారి ఆస్ట్రేలియా నేలపై కంగారూలను మట్టికరిపించింది. ఇరు జట్ల మధ్య జరిగిన టెస్టు పోరులో ఇప్పటివరకు ఆస్ట్రేలియాదే పైచేయిగా ఉంది. గతంలో జరిగిన ఏడు టెస్టుల్లో ఆస్ట్రేలియా ఐదు విజయాలు సాధించగా, ఒక మ్యాచ్ డ్రాగా ముగిసింది. ఇప్పుడు బంగ్లాదేశ్ ఖాతాలో రెండో విజయం చేరింది. 2017లో స్వదేశంలో జరిగిన టెస్టులో షకీబ్ అల్ హసన్ అద్భుత ఆల్‌రౌండ్ ప్రదర్శనతో ఆస్ట్రేలియాను ఓడించాడు. ఆ మ్యాచ్‌లో 89 పరుగులు చేయడంతో పాటు పది వికెట్లు పడగొట్టి జట్టు విజయానికి ప్రధాన కారణమయ్యాడు. ఇప్పుడు 2026లో ఆస్ట్రేలియా గడ్డపై సాధించిన ఈ విజయం బంగ్లాదేశ్ టెస్టు క్రికెట్ ప్రయాణంలో మరో కీలక అధ్యాయంగా మారింది. సిరీస్‌లోనూ ఇదే ఊపు కొనసాగిస్తే.. ఆస్ట్రేలియాపై తొలిసారి సిరీస్ గెలిచిన ఘనతను సైతం బంగ్లాదేశ్ అందుకునే అవకాశం ఉంటుంది.

మరిన్ని క్రీడా వార్తల కోసం ఇక్కడ క్లిక్ చేయండి..