SV. Museum: శ్రీవారి ఆభరణాల విశిష్టత తెలిసేలా శ్రీవారి మ్యూజియాన్ని తీర్చిదిద్దనున్న టీటీడీ.. వచ్చే బ్రహ్మోత్సవాలనాటికి అందుబాటులోకి

SV. Museum: తిరుమలలోని శ్రీ వేంకటేశ్వర మ్యూజియాన్ని సరికొత్తగా అభివృద్ధి చేసి వచ్చే దిశగా టీటీడీ అధికారులు చర్యలు తీసుకుంటున్నారు. ఈ మ్యూజియాన్ని వచ్చే బ్రహ్మోత్సవాల నాటికి భక్తులకు అందుబాటులోకి తీసుకురావాలని టిటిడి ఈవో డాక్టర్ కెఎస్.జవహర్ రెడ్డి అధికారులను ఆదేశించారు. తిరుపతిలోని శ్రీ పద్మావతి విశ్రాంతి గృహంలో ఆదివారం ఆయన మ్యూజియం అభివృద్ధిపై అధికారులతో సమీక్ష సమావేశం నిర్వహించారు.

ఈ సందర్భంగా ఈవో మాట్లాడుతూ మ్యూజియంలో వేలాది పురాతన కళాకృతులు ఉన్నాయని, వీటన్నింటి గురించి భక్తులకు తెలిపేందుకు వీలుగా కంటెంట్ ను టాటా సంస్థ ప్రతినిధులకు అందించాలని సంబంధిత అధికారులను ఆదేశించారు. శ్రీవారి ఆభరణాల విశిష్టతను భక్తులు తెలుసుకునేలా, ఆకట్టుకునేలా పూర్తి స్థాయిలో కంటెంట్ తయారు చేయాలన్నారు. వచ్చే సమావేశం నాటికి టాటా సంస్థ చేపడుతున్న అభివృద్ధి పనుల ప్రాజెక్టు రిపోర్టును సిద్ధం చేయాలని కోరారు.

మ్యూజియంలో గ్రౌండ్, ఫస్ట్, సెకండ్ ఫ్లోర్లలో ఎక్కడెక్కడ ఎయే కళాకృతులు ప్రదర్శనకు ఉంచాలనే విషయంపై ఇంజినీరింగ్ అధికారులు ఇప్పటికే ప్రణాళికలు రూపొందించారని, ఈ ప్రక్రియను మరింత మెరుగుపరిచేందుకు టాటా సంస్థ కార్యాచరణ సిద్ధం చేయాలని ఆయన కోరారు. అభివృద్ధి పనులు పూర్తయితే బ్రహ్మోత్సవాలకు విచ్చేసే లక్షలాది మంది భక్తులకు స్వామివారి వైభవాన్ని కళ్లకు కట్టినట్టుగా చూపేందుకు వీలవుతుందన్నారు. పురాతన కాలం నాటి కళాకృతులు, యుద్ధ సామగ్రి, పాత్రలు తదితరాలు భక్తులను ఎంతగానో ఆకట్టుకుంటాయన్నారు.

Also Read:  థియేటర్‌లో ఫ్యాన్స్ చేసిన పనికి మండిపడిన కండల వీరుడు.. ఎందుకంటే..