Radhashtami 2025: శ్రీకృష్ణుడి తర్వాత రాధ జీవితం ఏమైంది? అంతు తెలియని వాస్తవాలు

శ్రీకృష్ణుడి ప్రియురాలు, భక్తికి నిలువెత్తు రూపం అయిన రాధాదేవి జన్మదినమే రాధాష్టమి. భాద్రపద శుక్ల పక్ష అష్టమి రోజున ఈ పండుగను జరుపుకుంటారు. ఇది శ్రీకృష్ణాష్టమి పండుగ జరిగిన పదిహేను రోజుల తరువాత వస్తుంది. ఈ రోజు రాధాదేవిని పూజించడం వల్ల సకల సౌభాగ్యాలు, సుఖసంతోషాలు కలుగుతాయని భక్తుల నమ్మకం.

కృష్ణుడు బృందావనం వదిలిన తర్వాత, రాధ ఆయనకు దూరంగా బతికింది. ఆమెను కృష్ణుడు చివరిసారిగా కలుసుకున్న సందర్భం గురించి చాలా పురాణాలు భిన్నంగా చెబుతాయి. కృష్ణుడికి రుక్మిణి, సత్యభామలతో సహా ఎనిమిది మంది భార్యలు ఉన్నారని పురాణాలు చెబుతాయి. కానీ, రాధ ఎవరినీ వివాహం చేసుకోలేదు. బ్రహ్మవైవర్త పురాణం ప్రకారం, కృష్ణుడికి రాధతో వివాహం అయింది. కానీ, మరికొన్ని పురాణాలు ఆమె కృష్ణుడు ఉన్నంత కాలం వేచి చూసి చివరికి కృష్ణుడిలోనే లీనమైనట్లు చెబుతాయి.

రాధ అయాన్ అనే వ్యక్తిని వివాహం చేసుకుందని కొన్ని కథలు చెబుతాయి. అయితే, ఇది లోకానికి కృష్ణుడితో ఆమెకున్న దివ్యమైన అనుబంధాన్ని దాచిపెట్టడానికి చేసిన ఏర్పాటని నమ్మేవారు చాలామంది ఉన్నారు. రాధ భౌతికంగా మరొకరిని పెళ్లి చేసుకున్నా, ఆమె ఆత్మ, మనసు ఎప్పుడూ కృష్ణుడితోనే ఉండేదని భావిస్తారు.

కొన్ని కథల ప్రకారం, కృష్ణుడు ద్వారకకు వెళ్ళిన తర్వాత రాధ బృందావనంలోనే భౌతిక జీవితాన్ని గడిపింది. చివరి రోజులలో రాధ కృష్ణుడిని చూడాలని ద్వారకకు వెళ్ళింది. అప్పుడు కృష్ణుడు రాధ కోరిక మేరకు ఆమెను చివరిసారిగా కలుసుకుని, ఆమె ముందే వేణువు ఊదాడు. ఆ వేణుగానం వింటూనే రాధ తన భౌతిక శరీరాన్ని విడిచిపెట్టి, కృష్ణుడిలో లీనమైంది. ఈ సంఘటన తర్వాత కృష్ణుడు తన వేణువును విరిచి పారేశాడని పురాణాలు చెబుతాయి.