ప్రయాగ్‌రాజ్‌లో నేత్ర కుంభ్ సేవలు అనిర్వచనీయం.. లక్షలాది మందికి ఉచిత కంటి పరీక్షలు

నభూతో నభవిష్యత్.. కనీవినీ ఎరుగని అపూర్వ వేడుక.. పులకించిన ఆధ్యాత్మిక ప్రపంచం.. ఇవన్నీ చిన్నమాటలే అవుతాయి. ప్రయాగ్‌రాజ్‌ మహాకుంభమేళా ప్రాశస్త్యాన్ని, కొల్లగొట్టిన రికార్డుల్ని, నిర్వహణా విశేషాల్ని, ఆధ్యాత్మిక లోకానికి దొరికిన అనుభూతి. దాంతో పాటు భావితరాలకు అందించిన సందేశాన్ని వర్ణించడానికి నిజంగానే ఏ ఉపమానాలూ సరిపోవు. మళ్లీ 144 ఏళ్ల తరువాత రాబోయే తదుపరి మహా కుంభమేళాకు ప్రపంచం ఏ రూపు సంతరించుకుంటుందో తెలీదు. అందుకే.. ఈ ఏడాది జరిగిన ప్రయాగ్‌రాజ్ మహాకుంభమేళా ఈ తరం చేసుకున్న ఒక మహా అదృష్టం.

సూర్యోదయంతో మొదలై సూర్యాస్తమయం వరకు.. మళ్లీ అర్ధరాత్రి నుంచి తెల్లవారుజాము దాకా పగలు, రేయికి నడుమ విభజన రేఖ చెరిగిపోయినట్టు.. భక్తుల పుణ్యస్నానాలతో నిరంతర ఆధ్యాత్మిక సందడితో అలరారింది ప్రయాగ్‌రాజ్‌లోని త్రివేణీసంగమం. జనవరి 13న సంక్రాంతి పర్వదినాన పుష్య పూర్ణిమకు మొదలైన కుంభమేళా ఫిబ్రవరి 26న మహాశివరాత్రి దాకా.. నెలన్నర పాటు సాగిన జగత్‌ జాతర ఇది. మహాకుంభంగా మాత్రమే కాకుండా సేవకు కూడా సంబంధించినదిగా మారింది. సనాతన ధర్మంలో ముఖ్యమైన అంశమైన సేవా కార్యాన్ని సాక్షం అనే సామాజిక సేవా సంస్థ ఇక్కడ పూర్తి భక్తితో నిర్వహించారు.

ముఖ్యంగా దృష్టి లోపం ఉన్నవారికి సేవ చేయడం, సహాయం చేయడం కోసం, ప్రయాగ్‌రాజ్‌లోని గంగా నది ఒడ్డున నాగవాసుకి సమీపంలోని సెక్టార్ 5లో దాదాపు 10 ఎకరాల్లో నేత్ర కుంభ్ అనే సేవా శిబిరాన్ని ఏర్పాటు చేశారు. ఈ నేత్ర కుంభ్ ద్వారా లక్షలాది మందికి ఉచిత కంటి పరీక్షలు, మందులు, కళ్ళద్దాల పంపిణీ చేశారు. దీంతో పాటు, కంటి ఆపరేషన్లకు ఉచిత ఏర్పాటు కూడా చేశారు. దేశవ్యాప్తంగా దాదాపు 216 ఆసుపత్రులు నేత్ర కుంభ్ తో అనుసంధానించారు. రిఫెరల్ ద్వారా, రోగులు ఈ ఆసుపత్రులలో ఉచిత ఆపరేషన్లు చేసుకోవచ్చు. ప్రయాగ్‌రాజ్‌లో జరిగే మహా కుంభమేళాలో నేత్ర కుంభమేళా జనవరి 5 నుండి ప్రారంభమై ఫిబ్రవరి 26 వరకు కొనసాగింది. ఆర్‌ఎస్‌ఎస్ సహకారంతో, సాక్షం నాయకత్వంలో అనేక సామాజిక, సేవా సంస్థల సహకారంతో ఉచిత కంటి సేవా శిబిరాన్ని నిర్వహించారు. కాగా, సాక్షం సేవా సంస్థాన్ సేవలను ఉత్తర ప్రదేశ్ ముఖ్యమంత్రి యోగి ఆదిత్యానాథ్ ప్రశంసించారు.

దృష్టి లోపం ఉన్నవారికి సహాయం చేయాలనే లక్ష్యంతో సాక్షం సేవా సంస్థాన్ నాయకత్వంలో నిర్వహించడం జరిగింది. నేత్ర కుంభ్, పెద్ద ఎత్తున ఉచిత కంటి పరీక్షలు, ఇతర సేవలను అందించారు. నేత్ర కుంభ్ జనరల్ మేనేజర్ సత్యవిజయ్ సింగ్ ప్రకారం, మూడు లక్షల మందికి పైగా ప్రజలకు ఉచితంగా మందులు, కళ్ళజోడు పంపిణీ చేయడమే నేత్ర కుంభ్ లక్ష్యంగా పెట్టుకుంది. అంతేకాకుండా, 5 లక్షల మందికి పైగా ప్రజలకు, 50 వేల మంది OPD లకు కంటి పరీక్షలు నిర్వహించారు. అయితే 2 లక్షల 37 వేల 964 మందికి కంటి పరీక్షలు నిర్వహించామని, లక్షా 63 వేల 652 మందికి ఉచితంగా కళ్లద్దాలు పంపిణీ చేశామని తెలిపారు. ఉచిత కంటి పరీక్షలు, కళ్ళద్దాలు, మందుల పంపిణీతో పాటు, నేత్ర కుంభ్ ద్వారా ప్రజలు నేత్రదానం చేయమని ప్రోత్సహిస్తున్నారు.

సాక్షం సేవా సంస్థాన్ ఆధ్వర్యంలో ‘జీవించి ఉండగా రక్తదానం చేయండి, వెళ్ళేటప్పుడు కళ్ళు దానం చేయండి’ అనే మంత్రంతో, ప్రజలకు నేత్రదానం ప్రాముఖ్యతను వివరించే ప్రయత్నం జరుగుతోంది. నేత్రదానం గురించి ప్రజల్లో ఉన్న అనేక అపోహల కారణంగా ప్రారంభ దశలో ఈ పని కొంచెం కష్టంగా ఉండేది. కానీ క్రమంగా ఎక్కువ మంది ముందుకు వస్తున్నారు. నేత్ర కుంభ్ కు చేరుకున్న ప్రజలు తమ నేత్రాలను దానం చేయాలనే కోరికను వ్యక్తం చేసినట్లు నిర్వహకులు తెలిపారు.

దేశవ్యాప్తంగా ఉన్న 22 నుండి 23 సామాజిక సేవా సంస్థల మద్దతుతో ఆర్‌ఎస్‌ఎస్ అనుబంధ సంస్థ సాక్షం నాయకత్వంలో మహా కుంభ్‌లో నేత్ర కుంభ్ నిర్వహించింది. రజ్జు భయ్యా సేవా న్యాస్, భావురావ్ దేవరస్ సేవా న్యాస్, ది హన్స్ ఫౌండేషన్, స్వామి వివేకానంద, హెల్త్ మిషన్ సొసైటీ, నేషనల్ మెడికోస్ ఆర్గనైజేషన్ మరియు రాష్ట్రీయ సేవా భారతి, శ్రీ రాంచోర్‌దాస్ ఛారిటబుల్ హాస్పిటల్ (రాజ్‌కోట్, గుజరాత్) సంయుక్త సహకారంతో ప్రయాగ్‌రాజ్‌లో మెగా సేవా శిబిరం నేత్ర కుంభ్ నిర్వహించారు.

దేశవ్యాప్తంగా ఉన్న వైద్యులను నేత్ర కుంభ్ తో సేవా కార్యక్రమాల్లో పాల్గొనేందుకు నేషనల్ మెడికోస్ ఆర్గనైజేషన్ చొరవ తీసుకుంది. ఆర్మీ హాస్పిటల్, ఎయిమ్స్, శంకర్ నేత్రాలయ వంటి దేశవ్యాప్తంగా ఉన్న వివిధ ఆసుపత్రుల నుండి స్పెషలిస్ట్ వైద్యులు నేత్ర కుంభ్‌లో తమ సేవలను అందించారు. నేత్ర కుంభ్ లో స్వచ్ఛంద సేవకులుగా సేవ చేయడానికి దేశం నలుమూలల నుండి ప్రజలు ముందుకు వచ్చారు. కొందరు 5 రోజులు, కొందరు 15 రోజులపాటు స్వచ్ఛందంగా పనిచేశారు. నేత్ర కుంభ్‌లో పనిచేస్తున్న వైద్యులు, నర్సింగ్ సిబ్బంది, వాలంటీర్లందరికీ ఉచిత వసతి, ఆహారం ఏర్పాట్లు చేశారు.

నేత్ర కుంభ్ ఎలా ప్రారంభమైంది?

దృష్టి లోపం ఉన్నవారికి సేవ చేయడానికి ఒక చిన్న ప్రయత్నంగా నేత్ర కుంభ్ మొదటిసారిగా 2019 లో అర్ధ కుంభ్ సమయంలో ప్రారంభించారు. ఆ సమయంలో 2.5 లక్షలకు పైగా ప్రజలకు కంటి పరీక్షలు నిర్వహించారు. 1.25 లక్షల మందికి ఉచిత కళ్ళజోళ్ళు పంపిణీ చేశారు. దీని తరువాత, కుంభమేళా ఎక్కడ జరిగినా ఈ పని జరిగేది. కోవిడ్ కారణంగా, హరిద్వార్‌లో నేత్ర కుంభ్ కింద పనులు లక్ష్యం ప్రకారం పూర్తి చేయలేకపోయాయి. కానీ ఈసారి ఉత్సాహం పెరిగింది. 2025 లో 5 లక్షలకు పైగా ప్రజలకు కంటి పరీక్షలు నిర్వహించడం, 3 లక్షలకు పైగా ఉచిత కళ్ళజోడు పంపిణీ చేయడం, 50 వేల మందికి OPD సేవలను అందించడం లక్ష్యంగా మహా కుంభ్‌లో నేత్ర కుంభ్ నిర్వహించారు.

మరిన్ని జాతీయ వార్తల కోసం ఇక్కడ క్లిక్ చేయండి..