జాతీయ క్రీడల్లో పాల్గొనేందుకు వచ్చిన మైనర్ మహిళా హాకీ ప్లేయర్‌.. అఘాయిత్యానికి పాల్పడ్డ కోచ్‌!

ఉత్తరాఖండ్‌లో జరగనున్న 38వ జాతీయ క్రీడలకు సన్నాహాలు జరుగుతున్నాయి. ఈ క్రమంలోనే హరిద్వార్‌లో మైనర్ మహిళా హాకీ క్రీడాకారిణిపై అత్యాచారం చేసిన ఉదంతం వెలుగులోకి వచ్చింది. ఈ విషయమై బాధితురాలు తన కోచ్‌పై ఆరోపణలు చేసింది. ఫిర్యాదు అందుకున్న పోలీసులు చంపావత్ జిల్లాలో నివసిస్తున్న కోచ్ భాను అగర్వాల్‌ను అరెస్టు చేశారు. పలు కోణాల్లో పోలీసులు దర్యాప్తు చేస్తున్నారు. ఈ క్రమంలో బాధితురాలికి వైద్యపరీక్షలు చేయించిన పోలీసులు విచారణ నివేదికను సీఓ సిటీకి అందజేశారు.

పోలీసులు తెలిపిన వివరాల ప్రకారం.. బాధితురాలు రాష్ట్ర స్థాయి హాకీ క్రీడాకారిణి. జనవరి 28 నుండి ఉత్తరాఖండ్‌లో 38వ జాతీయ క్రీడలకు హాజరయ్యేందుకు ఇక్కడికి చేరుకుంది. ఈ క్రీడలను స్వయంగా ప్రధాని నరేంద్ర మోదీ ప్రారంభించనున్నారు. కాగా, ఈ విషయమై హరిద్వార్‌లో కలకలం రేగుతోంది. మరోవైపు నిందితుల కోచింగ్‌ సర్టిఫికెట్‌ను కూడా రద్దు చేస్తున్నట్లు అధికారులు తెలిపారు.

హరిద్వార్‌లోని హాకీ స్టేడియంలో నిర్వహించే ఈ గేమ్‌కు దేశం నలుమూలల నుంచి క్రీడాకారులు రానున్నారు. దీని కోసం ఉత్తరాఖండ్ పోలీసులు, అధికారులు చాలా కాలంగా సన్నాహాలు చేస్తున్నారు. ముఖ్యంగా ఈ గేమ్‌లో పాల్గొనే మహిళా క్రీడాకారుల భద్రతకు సంబంధించి రకరకాల వాదనలు వినిపిస్తున్నాయి. ఇదిలావుండగా, హరిద్వార్ స్టేడియంలో జరిగిన ఈ ఘటన తర్వాత మహిళా క్రీడాకారుల భద్రతపై ప్రశ్నలు తలెత్తుతున్నాయి. అదే సమయంలో ధర్మనగరి ప్రతిష్ట కూడా దెబ్బతింది.

హరిద్వార్ జిల్లా క్రీడా అధికారి షాబాలి గురుంగ్ ప్రకారం, ఇది చాలా తీవ్రమైన విషయం. ఈ ఘటన తర్వాత మహిళా క్రీడాకారుల భద్రత కోసం ప్రభుత్వంతో చర్చలు జరుపుతున్నారు. బాధితురాలి తండ్రి ఫిర్యాదు మేరకు సిడ్కుల్ పోలీస్ స్టేషన్‌లో కేసు నమోదు చేసినట్లు హరిద్వార్ సీనియర్ పోలీసు సూపరింటెండెంట్ ప్రమేంద్ర సింగ్ దోవల్ తెలిపారు. దీంతో పోలీసులు నిందితుడిని అరెస్టు చేసి జైలుకు తరలించారు. బాధితురాలికి వైద్య పరీక్షలు కూడా చేశారు. పోలీసులు కేసు నమోదు చేసుకుని దర్యాప్తు చేపట్టారు.

ఈ ఘటనపై సమాచారం అందుకున్న ఉత్తరాఖండ్ క్రీడా మంత్రి రేఖా ఆర్య సోమవారం(జనవరి 6) స్వయంగా హాకీ స్టేడియానికి చేరుకున్నారు. మొత్తం ఘటనపై విచారణ జరిపారు. అత్యాచార బాధితురాలిని, ఆమె కుటుంబాన్ని కూడా కలిశారు. ఈ సందర్భంగా నిందితులపై కఠిన చర్యలు తీసుకుంటామని హామీ ఇచ్చారు. బాధితులకు ప్రభుత్వం అండగా ఉంటుందని రాష్ట్ర ప్రభుత్వం తరపున హామీ ఇచ్చారు. ఆరోపణలు ఎదుర్కొంటున్న కోచ్‌ నియామకం కాంట్రాక్టుపైనే జరిగిందని చెప్పారు. అందువల్ల అతని సేవలను వెంటనే రద్దు చేశారు.

మరిన్ని క్రైమ్ వార్తల కోసం ఇక్కడ క్లిక్ చేయండి..