అదృష్టం వరించింది.. కూలీల పంట పండింది… మట్టిలో దొరికిన విలువైన వజ్రాలు.. ధర తెలిస్తే షాక్ అవుతారు.!

Madhya Pradesh Labourers: రాత్రికి రాత్రే కోటిశ్వరుడు కావడం మనం సినిమాల్లో మాత్రమే చూస్తుంటాం. కానీ నిజ జీవితంలో నిరుపేదలు రాత్రికి రాత్రే..

Ravi Kiran |
Updated on: Feb 24, 2021 | 2:32 PM

Madhya Pradesh Labourers: రాత్రికి రాత్రే కోటిశ్వరుడు కావడం మనం సినిమాల్లో మాత్రమే చూస్తుంటాం. కానీ నిజ జీవితంలో నిరుపేదలు రాత్రికి రాత్రే లక్షాధికారులు అయ్యారంటే ఆశ్యర్యం కలగక మానదు. కానీ ఇది నిజం. మధ్యప్రదేశ్‌లోని పన్నాలో ఈ ఘటన జరిగింది. ఒక్కరాత్రిలోనే కొందరు కూలీల దశమారిపోయింది. లక్షాధికారులు అయిపోయారు. అదేంటో ఇప్పుడు చూద్దాం..

పన్నాలో నివసిస్తున్న భగవాన్దాస్ కుష్వాహ్ అనే కూలీ రంగురాళ్లు ఏరుకుంటూ జీవనోపాధి పొందుతున్నాడు. ఈ క్రమంలోనే అతడు నలుగురు స్నేహితులతో కలిసి రంగురాళ్ల భూమిగా పేరొందిన ఇట్వాకాస్ గ్రామంలో కొంత ప్రాంతాన్ని ప్రభుత్వం నుంచి లీజుకు తీసుకున్నాడు. ఆ ఐదుగురు అక్కడ తవ్వకాలు జరిపి వజ్రాల కోసం వేట మొదలుపెట్టారు. వారంతా కలిసి రాత్రింబవళ్లు శ్రమిస్తూ..అదృష్టం కోసం తీవ్రంగా వెతికారు. ఎట్టకేలకు వారి శ్రమ ఫలించింది. సోమవారం భగవాన్కు కీతా వజ్రాల గనిలో రెండు వజ్రాలు దొరికాయి. వాటిలో ఒకటి 7.93 క్యారెట్లు, మరొకటి 1.93 క్యారెట్లు ఉంది.

భగవాన్, అతని మిత్రులకు దొరికిన రెండు వజ్రాలను వచ్చే నెలలో వేలం వేయనున్నట్లు పన్నా కలెక్టర్ సంజయ్ కుమార్ మిశ్రా తెలిపారు. వజ్రాలు చాలా స్వచ్ఛంగా ఉన్నాయని, బహిరంగ మార్కెట్లో వీటి ధర 35 లక్షలకు పైగానే ఉంటుందని అధికారులు అంచనా వేస్తున్నారు. విలువైన వజ్రాలు దొరకటంతో కూలీలు సంతోషం వ్యక్తం చేశారు. దొరికిన వజ్రాలను వేలంపాట వేయనున్న నేపథ్యంలో వాటి నుంచి వచ్చే మొత్తంతో అప్పు తీర్చుకుంటామని కూలీలు తెలిపారు.