సోనియా గాంధీకి అస్వస్థత.. సిమ్లాలోని ఐజీఎంసీ ఆస్పత్రికి తరలింపు..!

కాంగ్రెస్‌ అగ్రనేత సోనియాగాంధీ మళ్లీ అస్వస్థతకు గురయ్యారు. సిమ్లాలో ప్రియాంకాగాంధీ కుటుంబంతో కలిసి వేసవి సెలవులు గడిపేందుకు వెళ్లిన సోనియా ఆరోగ్యం క్షిణించింది. దీంతో సిమ్లాలోని ఇందిరగాంధీ మెడికల్‌ కాలేజ్‌ ఆస్పత్రిలో ఆమెకు చికిత్సను అందిస్తున్నారు. సీనియర్‌ వైద్యులు సోనియాకు MRI పరీక్షలతో పాటు ఇతర వైద్య పరీక్షలు నిర్వహించారు.

కాంగ్రెస్ సీనియర్ నాయకురాలు, మాజీ అధ్యక్షురాలు సోనియా గాంధీ ఆరోగ్యం సిమ్లాలో క్షీణించింది. శనివారం(జూన్ 07) ఆమెను ఇందిరా గాంధీ మెడికల్ కాలేజ్ అండ్ హాస్పిటల్ (ఐజిఎంసి)లో చేర్పించారు, అక్కడ ఆమెకు క్రమం తప్పకుండా ఆరోగ్య పరీక్షలు నిర్వహిస్తున్నారు. వైద్యులు ఇసిజి, ఎంఆర్ఐ వంటి పరీక్షలు నిర్వహించారు. ప్రస్తుతం, మాజీ కాంగ్రెస్ అధ్యక్షురాలి పరిస్థితి నిలకడగా ఉందని వైద్యులు చెబుతున్నారు.

సోనియా గాంధీ తన సెలవులను గడపడానికి సోమవారం సిమ్లా చేరుకున్నారు. ఆమె ఛరాబ్రాలోని తన కుమార్తె, కాంగ్రెస్ ప్రధాన కార్యదర్శి ప్రియాంక గాంధీ వాద్రా ప్రైవేట్ నివాసంలో ఉంటున్నారు. కానీ ఆమె ఆరోగ్యం అకస్మాత్తుగా క్షీణించడంతో ఆమెను ఐజిఎంసికి తీసుకువచ్చారు. సోనియా గాంధీని ఐజీఎంసీలోని ప్రత్యేక వార్డులో చేర్చారు. ఆమెకు MRI స్కాన్ రేడియాలజీ విభాగంలో జరిగింది. ఆసుపత్రి యంత్రాంగం ఆమె పరిస్థితిని పర్యవేక్షిస్తోంది. ప్రస్తుతం సోనియా గాంధీ ఆరోగ్య పరిస్థితి నిలకడగా ఉంది. ముఖ్యమంత్రి ముఖ్య సలహాదారు (మీడియా) నరేష్ చౌహాన్ మాట్లాడుతూ, సోనియా గాంధీకి కొన్ని స్వల్ప ఆరోగ్య సమస్యలు ఉన్నందున సాధారణ వైద్య పరీక్షల కోసం ఆసుపత్రికి తీసుకువచ్చామని, ఆందోళన చెందడానికి ఏమీ లేదని, ఆమె పరిస్థితి నిలకడగా ఉందని అన్నారు.

Congress Parliamentary Party chairperson Sonia Gandhi has been brought to Indira Gandhi Medical College & Hospital in Shimla for routine health check-up due to some minor health issues. Doctors are examining her. She is stable. Details awaited: Naresh Chauhan, Principal Advisor… pic.twitter.com/As7QsoWsNe

— ANI (@ANI) June 7, 2025

ఈ సంఘటన తర్వాత, సిమ్లాలో రాజకీయ కార్యకలాపాలు ముమ్మరం అయ్యాయి. హిమాచల్ ప్రదేశ్ ప్రధాన కార్యదర్శి ప్రబోధ్ సక్సేనా స్వయంగా ఐజిఎంసికి చేరుకుని సోనియా గాంధీ ఆరోగ్యం గురించి ఆరా తీశారు. దీనితో పాటు, రాష్ట్ర ఆరోగ్య మంత్రి కూడా ఆసుపత్రికి చేరుకుని నేరుగా రేడియాలజీ విభాగానికి వెళ్లారు. ముఖ్యమంత్రి సుఖ్వీందర్ సింగ్ సుఖు కూడా తన రెండు రోజుల ఉనా పర్యటనను రద్దు చేసుకుని సిమ్లాకు బయలుదేరారు. సోనియా గాంధీ సంరక్షణ కోసం అవసరమైన ప్రతి వైద్య సదుపాయాన్ని అందుబాటులో ఉంచినట్లు ఆసుపత్రి వర్గాల తెలిపాయి.

మరోవైపు ఆసుపత్రి ప్రాంగణంలో భద్రతను కట్టుదిట్టం చేశారు. వీవీఐపీల కదలిక కారణంగా సాధారణ ప్రజల కదలికలపై ఆంక్షలు విధించారు. కాంగ్రెస్ నాయకులు, మద్దతుదారులు ప్రస్తుతం సోనియా గాంధీ ఆరోగ్యంపై ఆందోళన వ్యక్తం చేస్తున్నారు. పరిస్థితిని పరిశీలిస్తే, ఐజిఎంసి వైద్యుల ప్రత్యేక బృందం సోనియా గాంధీని నిరంతరం పర్యవేక్షిస్తున్నాయి. ఆమె ఆరోగ్య పరిస్థితిపై హెల్త్ బులెటిన్ త్వరలో అందే అవకాశం ఉంది.

మరిన్ని జాతీయ వార్తల కోసం ఇక్కడ క్లిక్ చేయండి..