Viral: అచ్చం సినిమాలో మాదిరి.. నిద్రిస్తున్న గొర్రెల కాపరిపై చిరుత దాడి.. పక్కనే ఉన్న గొడ్డలితో

Karnataka: మీరు మెగా హీరో వైష్ణవ్ తేజ్(Vaishnav Tej) నటించిన కొండపొలం(Konda Polam) మూవీ చూశారా..? అందులో గొర్రెలకు కాపరిగా వెళ్లిన హీరో.. తన జీవాలను కాపాడుకునేందుకు పెద్ద పులికి ఎదురొడ్డి పోరాడతాడు. ఇంచుమించు అలాంటి సీనే రియల్ లైఫ్‌లో కూడా జరిగింది. ప్రాణాలు కాపాడుకోడానికి చిరుతతో యుద్ధానికి దిగాడు ఓ గొర్రెల కాపరి. ఈ ఘటన కర్ణాటకలోని విజయనగర జిల్లా(Vijayanagara district) హరపనహళ్లి తాలూకా కండికేరి ఫారెస్ట్ ఏరియాలో జరిగింది. కండికేరి ప్రాంతంలో నివాసం ఉండే 21 ఏళ్ళ కూగార్‌ కరిబసప్ప మంగళవారం ఉదయం గొర్రెలను మేపటానికి సమీపంలోని అటవీ ప్రాంతానికి వెళ్లాడు. ఈ క్రమంలో కాస్త అలసట అనిపించి.. ఓ కునుకు వేసేందుకు చిక్కటి నీడ ఉన్న ఓ చెట్టుకింద నిద్రపోయాడు. ఈ క్రమంలో ఎంతసేపు నుంచి మాటు వేసి ఉందో తెలియదు కానీ.. ఒక్కసారిగా దూసుకువచ్చి అతనిపై దాడి చేసింది చిరుత. దీంతో వెంటనే అలర్టైన కరిబసప్ప తన పక్కనే గొడ్డలితో చిరుతపై ప్రతి దాడికి దిగాడు.  దీంతో చిరుత కంగుతింది. తోకముడిచి.. అక్కడి నుంచి జారుకుంది. ఈ క్రమంలో అడవిలోకి జారుకుంటున్న చిరుతను కరిబసప్ప తన సెల్‌ఫోన్‌లో ఫొటో  తీశాడు. చిరుత దాడితో అతని నుదుటిపై గాయమైంది. ఇంటికి వెళ్లి జరిగిన విషయం గ్రామస్థులకు చెప్పాడు. విషయం తెలుసుకున్న ఫారెస్ట్ ఆఫీసర్స్ ఘటనా స్థలికి వెళ్లి పరిశీలించారు. చిరుతను బంధించటానికి బోన్లు ఏర్పాట్లు చేస్తామని.. దాని జాడ తెలుసుకునేందుకు కెమెరాలు పెడతామని అటవీశాఖ అధికారులు వెల్లడించారు.

జాతీయ వార్తల కోసం..