Indian Navy: భారీ స్మగ్లింగ్ రాకెట్ ను ఛేదించిన ఇండియన్ నేవీ.. 3 టన్నుల డ్రగ్స్ స్వాధీనం

డ్రగ్స్ రవాణా అడ్డుకట్టకు కేంద్రం హోంశాఖ ఎన్ని చర్యలు తీసుకున్నా.. సంబంధిత అధికారులు పకడ్బందీగా నిఘా పెడుతున్నా.. సప్లయ్ మాత్రం కొనసాగుతూనే ఉంది. తాజాగా ఇండియన్ నేవీ భారీ స్మగ్లింగ్ ముఠాను పట్టుకున్నారు. అయితే వీరంతా పాకిస్తాన్ వ్యక్తులేనని తెలుస్తోంది. భారత నావికాదళం, నార్కోటిక్స్ కంట్రోల్ బ్యూరో (ఎన్సీబీ) జాయింట్ ఆపరేషన్ లో మంగళవారం గుజరాత్లోని పోర్బందర్ సమీపంలో ఆపరేషన్ నిర్వహించింది. ఒక నౌక నుంచి సుమారు 3,300 కిలోల మాదకద్రవ్యాలను స్వాధీనం చేసుకున్నాయి. మంగళవారం నౌకాదళం ఓ చిన్న నౌకను అడ్డుకుని రూ.1,300 కోట్ల విలువైన 3,089 కిలోల చరస్, 158 కిలోల మెథాంఫేటమిన్, 25 కిలోల మార్ఫిన్ స్వాధీనం చేసుకుంది. పట్టబడ్డ వ్యక్తులు అందరూ పాకిస్తాన్ పౌరులే అని తెలుస్తోంది.

స్వాధీనం చేసుకున్న మాదకద్రవ్యాల మొత్తం విలువను అధికారులు ఇంకా పేర్కొననప్పటికీ, అంతర్జాతీయ మార్కెట్లో కిలో చరస్ ధర రూ .7 కోట్లు అని సమాచారం. పట్టుబడిన బోటు, సిబ్బందితో పాటు నిషేధిత వస్తువులను భారత ఓడరేవులో లా ఎన్ఫోర్స్మెంట్ ఏజెన్సీలకు అప్పగించినట్లు భారత నౌకాదళం ఒక ప్రకటనలో తెలిపింది. చారిత్రాత్మక విజయం సాధించిన ఎన్సీబీ, భారత నౌకాదళం, గుజరాత్ పోలీసులను కేంద్ర హోంమంత్రి అమిత్ షా అభినందించారు.

మాదకద్రవ్యాల రహిత భారత్ కోసం ప్రధాని మోడీ దార్శనికత ఈ రోజు మా ఏజెన్సీలు దేశంలో అతిపెద్ద ఆఫ్ షోర్ మాదకద్రవ్యాలను స్వాధీనం చేసుకోవడంలో గొప్ప విజయాన్ని సాధించాయి. ఎన్సీబీ, నేవీ, గుజరాత్ పోలీసులు సంయుక్తంగా నిర్వహించిన ఆపరేషన్లో 3132 కిలోల మాదకద్రవ్యాలను స్వాధీనం చేసుకున్నారు. ఈ చారిత్రాత్మక విజయం మన దేశాన్ని మాదకద్రవ్యాల రహితంగా మార్చడానికి మా ప్రభుత్వానికి ఉన్న అచంచలమైన నిబద్ధతకు నిదర్శనం. ఈ సందర్భంగా ఎన్సీబీ, నేవీ, గుజరాత్ పోలీసులను అభినందిస్తున్నానని చెప్పారు.

అంతర్జాతీయ సముద్ర సరిహద్దు రేఖకు సమీపంలోని అరేబియా సముద్రంలో ఈ ఆపరేషన్ నిర్వహించినట్లు గుజరాత్ యాంటీ టెర్రరిస్ట్ స్క్వాడ్ (ఏటీఎస్) సీనియర్ అధికారి ఒకరు మీడియాకు తెలిపారు. పోర్ బందర్ సమీపంలోని సముద్రంలో అనుమానాస్పద నౌక (సెయిలింగ్ నౌక)ను నిఘా విమానం గుర్తించిందని, ఆ తర్వాత మాదకద్రవ్యాల స్మగ్లింగ్ కు పాల్పడుతున్నట్లు భావిస్తున్న నౌకను అడ్డుకోవడానికి ఒక నౌకను దారి మళ్లించినట్లు భారత నౌకాదళం తెలిపింది. కాగా పుణె, న్యూఢిల్లీ నగరాల్లో రెండు రోజుల పాటు జరిగిన దాడుల్లో రూ.2,500 కోట్ల విలువైన 1,100 కిలోల మెఫెడ్రోన్ ను స్వాధీనం చేసుకున్న వారం రోజుల తర్వాత ఈ భారీ మాదకద్రవ్యాలు పట్టుబడ్డాయి.

#IndianNavy in a coordinated ops with Narcotics Control Bureau, apprehended a suspicious dhow carrying almost 3300Kgs contraband (3089 Kgs Charas, 158 Kgs Methamphetamine 25 Kgs Morphine).The largest seizure of narcotics, in quantity in recent times.@narcoticsbureau pic.twitter.com/RPvzI1fdLW

— SpokespersonNavy (@indiannavy) February 28, 2024