భవిష్యత్తులో భారత్‌కు అవసరమయ్యే నైపుణ్యాలేంటి? ఏఐ యుగంలో యువత నేర్చుకోవాల్సిన పాఠాలివే!

ఒక ఫ్రెషర్ ఐటీ కంపెనీలో ఉద్యోగం కోసం దరఖాస్తు చేసుకున్నాడు. గతంలో ఇలాంటి ఎంట్రీ లెవల్ ఉద్యోగాల్లో వేలాది మందికి అవకాశాలు లభించేవి. కానీ ఇప్పుడు అదే కంపెనీలో కొత్త ఉద్యోగాల సంఖ్య తగ్గింది. గతంలో జూనియర్లు చేసే కోడింగ్ తనిఖీలు, డేటా ఎంట్రీ, కస్టమర్లకు ప్రాథమిక సమాధానాలు ఇవ్వడం వంటి పనులను ఏఐ టూల్స్ క్షణాల్లో పూర్తి చేస్తున్నాయి. భారత్‌లో కెరీర్ ప్రారంభించాలనుకునే యువతకు ఇది కొంత గందరగోళ పరిస్థితి. ఎందుకంటే ఇక్కడ ఒకదానికొకటి విరుద్ధంగా కనిపించే రెండు వాస్తవాలు ఉన్నాయి.

ప్రపంచ బ్యాంకు వరల్డ్ డెవలప్‌మెంట్ రిపోర్ట్ 2026 ప్రకారం.. భారత్ వంటి దేశాల్లో జనరేటివ్ ఏఐ వల్ల ఆటోమేషన్ ముప్పు ఎదుర్కొనే ఉద్యోగాలు సుమారు 4.5 శాతం మాత్రమే. సంపన్న దేశాల్లో ఈ సంఖ్య 14.2 శాతంగా ఉంది. ఈ లెక్కల ప్రకారం భారత్‌లో ఉద్యోగాలకు ముప్పు తక్కువగా ఉండాలి. అయితే, అదే నివేదిక భారత్ ఎక్కువగా ఆధారపడే ఐటీ సేవలు, ఫైనాన్స్, బిజినెస్ ప్రాసెస్ అవుట్‌సోర్సింగ్ వంటి రంగాల్లో ఎంట్రీ లెవల్ ఉద్యోగాలు ఇప్పటికే తగ్గుతున్నట్లు పేర్కొంది. దేశవ్యాప్తంగా ఆటోమేషన్ ముప్పు తక్కువగా ఉన్నప్పటికీ.. కొన్ని రంగాల్లో ఉద్యోగ నష్టాలు కనిపిస్తున్నాయి.

ఈ రెండు విషయాలు నిజమే. ఎందుకంటే ఇవి వేర్వేరు అంశాలను కొలుస్తున్నాయి. దేశంలోని మొత్తం ఉద్యోగాలను కలిపి చూసినప్పుడు.. ఏఐ ప్రభావం పడని లక్షలాది ఉద్యోగాలు కూడా అందులో ఉంటాయి. వ్యవసాయం, నిర్మాణ రంగం, వ్యక్తిగత సంరక్షణ, నైపుణ్యం కలిగిన చేతివృత్తులు వంటి పనులను ఏఐ నేరుగా భర్తీ చేయడం అంత సులభం కాదు. కానీ కొన్ని ఉద్యోగాల్లో మాత్రం ఏఐ ప్రభావం నేరుగా కనిపిస్తుంది. ముఖ్యంగా ముందుగా నిర్ణయించిన నియమాల ప్రకారం, పదేపదే చేయాల్సిన పనులు ఈ జాబితాలోకి వస్తాయి. ఉద్యోగంలో చేరిన కొత్తవారికి సాధారణంగా అప్పగించే ఇలాంటి పనులే ఇప్పుడు ఆటోమేషన్‌కు ఎక్కువగా గురవుతున్నాయి.

దక్షిణ కొరియా నుంచి ముందస్తు హెచ్చరిక!

ఈ పరిస్థితి పెద్ద ఎత్తున ఎలా ఉండవచ్చో దక్షిణ కొరియా పరిణామాలు సూచిస్తున్నాయి. 2022 జూన్ నుంచి 2026 జూన్ మధ్య అక్కడ 15 నుంచి 29 ఏళ్ల వయసున్న యువతకు సంబంధించిన ఉద్యోగాలు 2.85 లక్షలు తగ్గాయి. ఈ తగ్గుదలలో 94 శాతం ఏఐ ప్రభావం ఎక్కువగా ఉండే పరిశ్రమల్లోనే నమోదైంది. ఐటీ సేవలు, ప్రచురణ రంగం, కంప్యూటర్ ప్రోగ్రామింగ్, ప్రొఫెషనల్ సర్వీసులు ఇందులో ఉన్నాయి.

అదే సమయంలో, ఈ రంగాల్లోనే యాభై ఏళ్ల వయసున్న ఉద్యోగుల సంఖ్య పెరిగింది. వీరు ఎక్కువగా అనుభవంపై ఆధారపడే పనులు చేస్తున్నారు. ఈ గణాంకాలు ఏఐ ప్రభావం అన్ని వయసుల ఉద్యోగులపై ఒకేలా ఉండకపోవచ్చని సూచిస్తున్నాయి. అయితే, యువత ఉపాధి తగ్గడానికి ఏఐ ఒక్కటే కారణమని చెప్పలేం. జనాభా మార్పులు వంటి ఇతర అంశాలు కూడా ప్రభావం చూపి ఉండవచ్చు.

భారత్‌లో అసలు సమస్య ఇదే!

భారతీయ యువతకు ఇక్కడే అసలు సవాలు ఎదురవుతోంది. ఉద్యోగ జీవితంలో మొదటి మెట్టు సాధారణంగా ఎంట్రీ లెవల్ ఉద్యోగమే. ఈ ఉద్యోగంలో చేరిన యువత చిన్న చిన్న పనులు చేస్తూ అనుభవం సంపాదిస్తారు. వాటి ద్వారానే పని నేర్చుకుంటారు. ఆ తర్వాత క్రమంగా క్లిష్టమైన బాధ్యతలు చేపట్టే స్థాయికి ఎదుగుతారు.

కానీ ఇప్పుడు ఏఐ భర్తీ చేయగలిగే పనుల్లో ఈ ప్రారంభ ఉద్యోగాలే ఎక్కువగా ఉన్నాయి. దీంతో కెరీర్ నిచ్చెనలో మొదటి మెట్టు బలహీనపడే ప్రమాదం ఉంది. అనేక రంగాల్లో ఇదే పరిస్థితి ఏర్పడితే.. ఉద్యోగాలు తగ్గడమే కాకుండా, యువతకు అవసరమైన అనుభవం సంపాదించే అవకాశాలు కూడా తగ్గవచ్చు.

మరి మొదటి నుంచే సులభమైన పనులు చేసే అవకాశం లేకపోతే.. యువత క్లిష్టమైన పనులను ఎలా నేర్చుకుంటారు? అనుభవం లేకుండానే పెద్ద బాధ్యతలను ఎలా నిర్వహిస్తారు? భవిష్యత్తులో ఉద్యోగ మార్కెట్ ఎదుర్కొనే ముఖ్యమైన ప్రశ్న ఇదే.

ఏ నైపుణ్యాలకు విలువ ఉంటుంది?

ఈ మార్పుల మధ్య యువత ఏ నైపుణ్యాలను నేర్చుకోవాలి? ఈ అంశంపై వచ్చిన పరిశోధనల్లో ఒక సాధారణ విషయం కనిపిస్తోంది. ఏఐ ఒక పని తొలి ముసాయిదాను తయారు చేయగలదు. మొదటి సమాధానాన్ని ఇవ్వగలదు. ప్రాథమిక లెక్కలను కూడా వేగంగా పూర్తి చేయగలదు. అయితే, ఆ సమాధానం ఒక నిర్దిష్ట వ్యక్తికి లేదా పరిస్థితికి సరైనదేనా అని నిర్ణయించడం మాత్రం అంత సులభం కాదు.

అసంతృప్తితో ఉన్న కస్టమర్‌ను ఎదుర్కోవడం, స్పష్టత లేని సూచనలను అర్థం చేసుకోవడం, పుస్తకాల్లో లేని సమస్యకు పరిష్కారం కనుగొనడం వంటి సందర్భాల్లో మానవ విచక్షణ కీలకం. కమ్యూనికేషన్, విమర్శనాత్మక ఆలోచన, సరైన నిర్ణయాలు తీసుకోవడం, ఇతరుల సమస్యలను అర్థం చేసుకోవడం వంటి నైపుణ్యాలు ఏఐతో పోటీ పడటమే కాకుండా.. దానితో కలిసి పనిచేయడానికి కూడా ఉపయోగపడతాయి.

అయితే, దీనర్థం సాంకేతిక నైపుణ్యాలకు ప్రాధాన్యం తగ్గుతుందని కాదు. టెక్నికల్ స్కిల్స్ అవసరం అలాగే ఉంటుంది. కానీ వాటితోపాటు ఏఐ సులభంగా భర్తీ చేయలేని మానవ నైపుణ్యాలను కూడా పెంపొందించుకోవాల్సిన అవసరం ఉంది. కేవలం సాంకేతిక పరిజ్ఞానమే ఉద్యోగ అర్హతకు సరిపోతుందని భావించకూడదు.

యువత ఇప్పుడేం చేయాలి?

కొత్తగా కెరీర్ ప్రారంభించాలనుకునే భారతీయ యువత సాంకేతికతకు దూరంగా ఉండటం పరిష్కారం కాదు. ఆధునిక ఉద్యోగాల్లో ఏదో ఒక రూపంలో టెక్నాలజీని ఉపయోగించాల్సి వస్తుంది. అందుకే ఏఐ టూల్స్‌ను సమర్థంగా ఉపయోగించడం నేర్చుకుంటూనే.. ప్రతి పనిలో తమ సొంత ఆలోచన, విచక్షణ, కమ్యూనికేషన్, బాధ్యతను జోడించాలి.

కేవలం వేగంగా పని పూర్తి చేయడమే కాకుండా.. సరైన ఫలితాన్ని అందించడం, సమస్యను లోతుగా అర్థం చేసుకోవడం, అవసరాలకు తగిన పరిష్కారాన్ని ఎంచుకోవడం వంటి అంశాలపై దృష్టి పెట్టాలి. ఏఐ ఇచ్చిన సమాధానాన్ని పరిశీలించడం, అందులోని తప్పులను గుర్తించడం, అవసరమైన మార్పులు చేయడం కూడా నేర్చుకోవాలి.

ఉద్యోగంలో ఏ పనులు పదేపదే చేయాల్సి వస్తున్నాయి? వాటిలో ఏవాటిని ఏఐ సులభంగా చేయగలదు? ఏ పనులకు మాత్రం మానవ అనుభవం, నిర్ణయ సామర్థ్యం అవసరం? అనే ప్రశ్నలను యువత తమ కెరీర్ ఎంపికల్లో భాగంగా చేసుకోవాలి.

ఐదేళ్ల తర్వాత కూడా విలువ ఉండే నైపుణ్యం ఏది?

భవిష్యత్తులో ఏ నైపుణ్యానికి డిమాండ్ ఉంటుందో అంచనా వేయడం కంటే.. మారుతున్న పరిస్థితులకు అనుగుణంగా కొత్త విషయాలను నేర్చుకునే సామర్థ్యాన్ని పెంచుకోవడం ముఖ్యం. ఏఐ నుంచి పారిపోవడం కాదు.. దానితో కలిసి పనిచేస్తూ, మనిషిగా తాము అందించగల విలువను పెంచుకోవడం అవసరం.

తదుపరి ఏ నైపుణ్యాన్ని నేర్చుకోవాలనే ఆలోచన వచ్చినప్పుడు.. ప్రస్తుతం ఏది ఎక్కువ డిమాండ్‌లో ఉందని మాత్రమే ప్రశ్నించకూడదు. ఐదేళ్ల తర్వాత కూడా ఒక ఆలోచనాత్మకమైన, పరిస్థితులకు అనుగుణంగా మారగలిగే మనిషి కంటే యంత్రం మెరుగ్గా చేయలేని పని ఏదని కూడా ప్రశ్నించుకోవాలి.

ఎందుకంటే ఏఐ యుగంలో విజయానికి కేవలం సాంకేతిక పరిజ్ఞానం సరిపోకపోవచ్చు. దానిని సరైన రీతిలో ఉపయోగించగల సామర్థ్యం, మానవ సంబంధాలను అర్థం చేసుకోవడం, విమర్శనాత్మకంగా ఆలోచించడం, బాధ్యతాయుతంగా నిర్ణయాలు తీసుకోవడం వంటి నైపుణ్యాలే యువతకు భవిష్యత్తులో కీలకంగా మారవచ్చు.