స్పెషల్ విజిట్.. జమ్మూకాశ్మీర్లో విదేశీ దౌత్య ప్రతినిధుల టూర్

అమెరికాతో సహా 17 దేశాల నుంచి విదేశీ దౌత్య ప్రతినిధులు గురువారం జమ్మూ కాశ్మీర్లో అడుగుపెట్టారు. కొత్తగా కేంద్ర పాలిత ప్రాంతంగా మారిన  ఈ ‘ మాజీ ‘ రాష్ట్రంలో వీరు  రెండు రోజులు పర్యటించనున్నారు. యుఎస్ తో బాటు వియత్నాం, దక్షిణ కొరియా, బ్రెజిల్, ఉజ్బెకిస్థాన్, నైగర్, నైజీరియా, మొరాకో, గుయానా , ఆర్జెంటీనా, ఫిలిప్పీన్స్, నార్వే, మాల్దీవులు, ఫిజీ, టోగో, బంగ్లాదేశ్, పెరు  దేశాల రాయబారులు, దౌత్యాధికారులు ఈ బృందంలో ఉన్నారు. ఈ రాష్ట్రానికి ప్రత్యేక ప్రతిపత్తిని కల్పించడానికి ఉద్దేశించిన 370 అధికరణాన్ని కేంద్రం గత ఆగస్టు 5 న రద్దు చేసిన అనంతరం ఇక్కడ ఇంటర్నెట్ తో సహా పలు రకాల ఆంక్షలను విధించిన విషయం గమనార్హం. ఇటీవలే ఐరోపా యూనియన్ దేశాలకు చెందిన 23 మంది ఎంపీల విజిట్ తరువాత ఇంతమంది విదేశీ దౌత్యాధికారుల పర్యటన ఇదే మొదటిది. ఈ సారి ఆ ఎంపీలు తమ పర్యటనను రద్దు చేసుకున్నారు. గతంలో తాము ఇక్కడికి వచ్చినప్పుడు గృహ నిర్బంధంలో ఉన్న మాజీ ముఖ్యమంత్రులు ఫరూక్ అబ్దుల్లా, ఒమర్ అబ్దుల్లా, మెహబూబా ముఫ్తీలను కలుసుకునేందుకు వీరికి అనుమతిని ప్రభుత్వం నిరాకరించింది. కాగా-ఈ కేంద్రపాలిత ప్రాంతానికి చేరుకున్న 17  దేశాల దౌత్య ప్రతినిధులు ఇక్కడి  ప్రస్తుత పరిస్థితిని మదింపు చేస్తారని తెలుస్తోంది. వీరిలో ఇండియాకు అమెరికా రాయబారి కెన్నెత్ జస్టర్ కూడా ఉన్నారు.