Instant Ariselu: అరిసెలు చేయడం ఇంత ఈజీనా? పాకం, తడి పిండి లేకుండా 15 నిమిషాల్లో నోరూరించే స్వీట్!

ఈ సంక్రాంతికి కొత్తగా ఏదైనా ట్రై చేయాలనుకుంటున్నారా? సాంప్రదాయ అరిసెల రుచి ఏమాత్రం తగ్గకుండా, శ్రమ లేకుండా చేసుకునే రెసిపీ ఇది. కేవలం పొడి బియ్యప్పిండి మరియు కొద్దిగా గోధుమపిండి ఉంటే చాలు, పావుగంటలో నోట్లో వేసుకోగానే కరిగిపోయే అరిసెలు రెడీ అయిపోతాయి. అసలు పాకం పట్టకుండా ఈ మ్యాజిక్ ఎలా చేయాలో ఇప్పుడు తెలుసుకుందాం.

కావలసిన పదార్థాలు:

పొడి బియ్యప్పిండి: 1 కప్పు

బెల్లం తురుము: 1 కప్పు (తీపి ఎక్కువ కావాలంటే మరికొంత)

గోధుమపిండి: అర కప్పు (అరిసెలు మెత్తగా రావడానికి ఇది ముఖ్యం)

నీళ్లు: ఒకటిన్నర కప్పు

యాలకుల పొడి: 1 టీస్పూన్

నువ్వులు: తగినంత

నెయ్యి: పిండి కలుపుకోవడానికి మరియు రుచి కోసం

తయారీ విధానం: ఒక గిన్నెలో బెల్లం తురుము మరియు ఒకటిన్నర కప్పుల నీళ్లు పోసి బెల్లం కరిగే వరకు మరిగించండి. బెల్లం కరిగాక ఆ నీటిని వడకట్టి ఒక మందపాటి పాన్‌లో పోయండి.

పిండి ఉడికించడం: బెల్లం నీరు మరుగుతున్నప్పుడు అందులో యాలకుల పొడి, కొద్దిగా నెవ్వులు, ఒక స్పూన్ నెయ్యి వేయండి. ఇప్పుడు మంటను తగ్గించి, ముందుగా జల్లించి పెట్టుకున్న బియ్యప్పిండి గోధుమపిండిని కొద్దికొద్దిగా వేస్తూ ఉండలు లేకుండా కలపండి.

పిండి మిశ్రమం దగ్గరపడి పాన్ నుండి విడివడే వరకు నెయ్యి వేస్తూ ఉడికించండి. ఆ తర్వాత స్టవ్ ఆపి చల్లారనివ్వండి.

పిండి గోరువెచ్చగా ఉన్నప్పుడు సాఫ్ట్‌గా కలుపుకుని చిన్న ఉండలుగా చేయండి. ఈ ఉండలను నువ్వులలో దొర్లించి, ఒక ప్లాస్టిక్ కవర్ లేదా బటర్ పేపర్ మీద నెయ్యి రాసి అరిసెల్లా ఒత్తండి.

డీప్ ఫ్రై: వేడి నూనెలో వీటిని వేసి మీడియం ఫ్లేమ్‌లో రెండు వైపులా బంగారు రంగు వచ్చే వరకు వేయించండి. నూనె నుండి తీసిన వెంటనే ఒక గరిటెతో లైట్‌గా ప్రెస్ చేస్తే అదనపు నూనె బయటకు వచ్చేస్తుంది.

చిట్కాలు:

అచ్చం పొడి బియ్యప్పిండి వాడితే అరిసెలు గట్టిగా వస్తాయి, అందుకే గోధుమపిండి కలపడం తప్పనిసరి.

పిండి ఉడికించేటప్పుడు మంటను ఎప్పుడూ సిమ్లోనే ఉంచాలి.

మీరు తీపి ఎక్కువగా ఇష్టపడే వారైతే మరో అర కప్పు బెల్లం అదనంగా వేసుకోవచ్చు.