పాక్, బంగ్లా సరిహద్దుల్లో పహారా మరింత పటిష్టం.. కేంద్రం కీలక నిర్ణయం..

భారత్ – పాకిస్తాన్ సరిహద్దులతో పాటు భారత్ – బంగ్లా సరిహద్దుల్లో పహారా బాధ్యతలు నిర్వర్తించే బోర్డర్ సెక్యూరిటీ ఫోర్స్ (BSF)ను మరింత బలోపేతం చేసే దిశగా కేంద్ర ప్రభుత్వం చర్యలు తీసుకుంటోంది. కేంద్ర ప్రభుత్వ వర్గాల సమాచారం ప్రకారం త్వరలో మరో 16 కొత్త బెటాలియన్లు, 2 కొత్త ఫీల్డ్ హెడ్‌క్వార్టర్‌లను నెలకొల్పనున్నట్టు తెలిసింది. ఈ ప్రతిపాదనలకు త్వరలో ఆమోదముద్ర పడే అవకాశం కనిపిస్తోంది. వీటి ఏర్పాటు ద్వారా తూర్పు, పశ్చిమ సరిహద్దుల్లో భద్రతను మరింత పటిష్టం చేసేందుకు ఆస్కారం ఉంటుంది. పాకిస్తాన్‌తో పాటు బంగ్లాదేశ్ కూడా భారత్‌కు వ్యతిరేకంగా మారిన పరిస్థితుల్లో ఈ రెండు దేశాల సరిహద్దుల భద్రతను మరింత పటిష్టం చేయాల్సిన అవసరం ఏర్పడింది. ఇప్పటికే దేశంలో అక్రమంగా వలసవచ్చిన బంగ్లాదేశీలు పెద్ద సంఖ్యలో ఉన్నారు. పశ్చిమ బెంగాల్, అస్సాం వంటి రాష్ట్రాల్లో డెమోగ్రఫీనే మార్చేసే స్థాయిలో అక్రమ వలసలు కొనసాగుతున్నాయి. ఈ పరిస్థితుల్లో కేంద్ర ప్రభుత్వ నిర్ణయం కీలకంగా మారనుంది.

ఒక్కో సరిహద్దుకు ప్రత్యేక బలగం —————-

రక్షణ శాఖ పరిధిలో ఉన్న భారత సైన్యం, వాయు సేన, నావికాదళంతో పాటు కేంద్ర హోం శాఖ పరిధిలో వివిధ సాయుధ బలగాలు ఉన్న విషయం తెలిసిందే. వాటిని పారా-మిలటరీ ఫోర్స్‌గా కూడా అభివర్ణిస్తారు. హోంశాఖ పరిధిలో ఉన్న సాయుధ బలగాల్లో సెంట్రల్ రిజర్వ్ పోలీస్ ఫోర్స్ (CRPF)ను అంతర్గత భద్రత కోసం వినియోగిస్తారు. మిగతా బలగాలను సరిహద్దు పహారాతో పాటు అంతర్గత భద్రత కోసం వినియోగిస్తుంటారు. వాటిలో బోర్డర్ సెక్యూరిటీ ఫోర్స్ (BSF)ను పాకిస్తాన్ సరిహద్దులతో పాటు బంగ్లాదేశ్ సరిహద్దుల రక్షణ కోసం వినియోగిస్తున్నాం. చైనా ఆక్రమిత టిబెట్ సరిహద్దుల్లో పహారా కోసం ఇండో-టిబెటన్ బోర్డర్ పోలీస్ (ITBP), నేపాల్, భూటాన్ వంటి మిత్ర దేశాల సరిహద్దుల రక్షణ కోసం సశస్త్ర సీమా బల్ (SSB), మయన్మార్ సరిహద్దుల్లో రక్షణ కోసం అస్సాం రైఫిల్స్ (AR) వంటి ప్రత్యేక బలగాలను వినియోగిస్తాం. ఇందులో ఈశాన్య రాష్ట్రాల్లో వేర్పాటువాదం, మిలిటెన్సీ ఎక్కువగా ఉన్నందున అస్సాం రైఫిల్స్ బలగాల్లో ఎక్కువగా భారత సైన్యం నుంచి డిప్యూటేషన్ మీద సిబ్బందిని తీసుకుంటారు. అది మినహాయిస్తే.. మిగతా అన్ని విభాగాలకు ఇండియన్ పోలీస్ సర్వీస్ (IPS) అధికారులే విధులు నిర్వహిస్తారు.

బీఎస్ఎఫ్ ఎందుకు కీలకం అంటే? ————————–

భారత దేశానికి పక్కలో బల్లెంలా మారిన దాయాది దేశం పాకిస్తాన్‌తో మొదటి నుంచి శత్రుత్వం కొనసాగుతోంది. 1947లో స్వాతంత్ర్యం వచ్చినప్పటి నుంచి కొనసాగుతున్న ఈ శత్రుత్వంలో 1948, 1965, 1971లో యుద్ధాలు కూడా జరిగాయి. పాక్ ప్రేరేపిత ఉగ్రవాదులతో 1999లో కార్గిల్ యుద్ధం జరిగింది. భారతదేశం సరిహద్దుల్లో రెండు అంచెల భద్రతా వ్యవస్థను ఏర్పాటు చేసుకుంది. మొదటి దశలో పారామిలటరీ బలగాల్లో ఒకటైన బోర్డర్ సెక్యూరిటీ ఫోర్స్ (BSF) సరిహద్దుల్లో గస్తీ బాధ్యతలు చేపట్టగా.. వాటికి వెనకాల భారత రక్షణశాఖకు చెందిన సైన్యం, ఎయిర్‌ఫోర్స్ వంటి బలగాలు సిద్ధంగా ఉంటాయి. తర్వాతి కాలంలో ఒక్కో దేశంతో ఒక్కో రకమైన సంబంధ బాంధవ్యాలు ఉన్నందున విడివిడిగా సరిహద్దు భద్రతా బలగాలను భారతదేశం ఏర్పాటు చేసుకుంది. అయితే మొదటి నుంచి సమస్యాత్మకంగా ఉన్న పాకిస్తాన్ సరిహద్దుల రక్షణ కోసం బోర్డర్ సెక్యూరిటీ ఫోర్స్ (BSF) కొనసాగుతూ వచ్చింది. తర్వాతి కాలంలో తూర్పు పాకిస్తాన్‌గా ఉన్న బంగ్లాదేశ్ విడిపోయి ప్రత్యేక దేశంగా అవతరించినప్పటికీ ఆ సరిహద్దుల్లోనూ బీఎస్ఎఫ్ కొనసాగుతూ వచ్చింది. తాజాగా బంగ్లాదేశ్ అంతర్యుద్ధం, ఆ దేశ ప్రధాని షేక్ హసీనా దేశం విడిచి వెళ్లిపోవడం వంటి ఘటనలు, ఆ దేశ పాలనలో రాడికల్ ఇస్లామిక్ గ్రూపుల ప్రవేశం తర్వాత పాకిస్తాన్ కంటే బంగ్లాదేశ్ భారత్ పాలిట మరింత ప్రమాదకారిగా మారింది. దీంతో ఇప్పుడు బీఎస్ఎఫ్ గస్తీ నిర్వహించే తూర్పు, పశ్చిమ సరిహద్దులు రెండూ కూడా భారతదేశానికి అత్యంత కీలకంగా మారాయి.

బీఎస్ఎఫ్ బలోపేతం.. చారిత్రక అవసరం ————————-

పాకిస్తాన్, బంగ్లాదేశ్ దేశాలతో నెలకొన్న ఉద్రిక్త పరిస్థితుల నేపథ్యంలో సరిహద్దుల భద్రత ప్రాధాన్యతాంశంగా మారింది. ఈ క్రమంలో రెండు సరిహద్దులను మరింత పటిష్టం చేయాలంటే ఇప్పుడున్న బీఎస్ఎఫ్ బలం సరిపోదని, మరింత బలోపేతం చేయాల్సిన అవసరం ఉందని కేంద్ర ప్రభుత్వం భావిస్తోంది. పైగా తూర్పు సరిహద్దుల కోసం విడిగా ఒక ఫీల్డ్ హెడ్‌క్వార్టర్, పశ్చిమ సరిహద్దుల కోసం విడిగా ఒక ఫీల్డ్ హెడ్‌క్వార్టర్ ఏర్పాటు చేస్తే మరింత సమన్వయం సాధ్యపడుతుంది. అందుకే రెండు ఫీల్డ్ హెడ్‌క్వార్టర్లతో పాటు 16 కొత్త బెటాలియన్లు ఏర్పాటు చేసి BSF ను బలోపేతం చేసే దిశగా అడుగులు వేస్తోంది. కొత్త బెటాలియన్ల ఏర్పాటు ప్రతిపాదనకు ఇప్పటికే హోం మంత్రిత్వ శాఖ ఆమోదం లభించింది. ఆర్థిక మంత్రిత్వ శాఖ తుది ఆమోదం పొందాల్సి ఉంది. ఆమోదం పొందిన తర్వాత, BSF బలానికి దాదాపు 17,000 మంది కొత్త సిబ్బంది అందనంగా చేరతారు. ప్రస్తుతం BSFలో 193 బెటాలియన్లు ఉన్నాయి, ప్రతి బెటాలియన్‌లో దాదాపు 1,000 మంది సిబ్బంది ఉన్నారు.

భారతదేశ తూర్పు సరిహద్దుల భద్రత కోసం మిజోరాం కేంద్రంగా బీఎస్ఎఫ్ ఫీల్డ్ హెడ్‌క్వార్టర్ ఏర్పాటు చేయాలని కేంద్రం భావిస్తోంది. తూర్పు సరిహద్దుల కోసం జమ్ము-పంజాబ్ రాష్ట్రాల్లో ఒకచోట ఫీల్డ్ హెడ్‌క్వార్టర్ ఏర్పాటు చేసే అవకాశం ఉంది. కొత్త బెటాలియన్లు రాబోయే 5-6 సంవత్సరాలలో దశలవారీగా ఏర్పాటవుతాయి. వీటికోసం BSF త్వరలో పురుషులు, మహిళల నియామక ప్రక్రియను ప్రారంభించి ఆపై వారికి శిక్షణ కూడా ఇవ్వనుంది.

వేగంగా మారుతున్న భద్రత, భౌగోళిక సవాళ్లను పేర్కొంటూ, 20 నుంచి 21 కొత్త బెటాలియన్ల అవసరం ఉందని పేర్కొంటూ BSF కేంద్ర ప్రభుత్వానికి ఒక ప్రతిపాదన పంపించింది. ఇప్పుడు ప్రభుత్వం 16 బెటాలియన్ల ఏర్పాటుకు ఆమోదం తెలిపింది. ప్రస్తుతం BSF 6,726 కిలోమీటర్ల పొడవైన భారత్-పాకిస్తాన్, భారత్-బంగ్లాదేశ్ సరిహద్దులను కాపలా కాస్తోంది. వీటిలో 1,047 కిలోమీటర్ల మేర ఇప్పటికీ కంచె లేదు. నదులు, అడవులు, కష్టతరమైన భౌగోళిక పరిస్థితులు ఈ ప్రాంతాలలో పెద్ద సవాళ్లుగా మారాయి. ప్రస్తుతం BSFకు 1,760 సరిహద్దు పోస్టులు ఉన్నాయి. ఈ పరిస్థితుల్లో కొత్త బెటాలియన్ల ర్పాటు సరిహద్దు భద్రతను బలోపేతం చేయడానికి, భవిష్యత్తులో వచ్చే ముప్పులను ఎదుర్కోవడానికి ముఖ్యమైన ముందడుగుగా నిపుణులు పేర్కొంటున్నారు.