బిజెపి ‘మహా’ వ్యూహం.. అదే జరిగితే ‘సేన’ ఖతమేనా ?

మెరుగైన ఫలితాలు పొందినప్పటికీ మహారాష్ట్ర సీఎం సీటుకు దూరమైన భారతీయ జనతా పార్టీ.. శివసేన నమ్మక ద్రోహానికి ప్రతీకారం తీర్చుకునే దీర్ఘకాలిక వ్యూహాన్ని అమలు చేస్తోందా ? లోతుగా ఆలోచిస్తే అంతేనంటున్నారు రాజకీయ పరిశీలకులు, విశ్లేషకులు. ప్రభుత్వాన్ని ఏర్పాటు చేసి భంగపడిన దానికంటే.. ప్రతిపక్షంలో కూర్చోవాలన్న తెలివైన నిర్ణయాన్ని బిజెపి నేతలు చేశారంటున్నారు పరిశీలకులు. ఇంతకీ బిజెపి అనుసరించబోతోన్న దీర్ఘకాలిక వ్యూహం ఏంటి ? రీడ్ దిస్ స్టోరీ.. 288 మంది శాసనసభ్యులున్న మహారాష్ట్ర శాసనసభలో బిజెపినే […]

బిజెపి ‘మహా’ వ్యూహం.. అదే జరిగితే ‘సేన’ ఖతమేనా ?
Rajesh Sharma

| Edited By:

Nov 11, 2019 | 2:16 PM

మెరుగైన ఫలితాలు పొందినప్పటికీ మహారాష్ట్ర సీఎం సీటుకు దూరమైన భారతీయ జనతా పార్టీ.. శివసేన నమ్మక ద్రోహానికి ప్రతీకారం తీర్చుకునే దీర్ఘకాలిక వ్యూహాన్ని అమలు చేస్తోందా ? లోతుగా ఆలోచిస్తే అంతేనంటున్నారు రాజకీయ పరిశీలకులు, విశ్లేషకులు. ప్రభుత్వాన్ని ఏర్పాటు చేసి భంగపడిన దానికంటే.. ప్రతిపక్షంలో కూర్చోవాలన్న తెలివైన నిర్ణయాన్ని బిజెపి నేతలు చేశారంటున్నారు పరిశీలకులు. ఇంతకీ బిజెపి అనుసరించబోతోన్న దీర్ఘకాలిక వ్యూహం ఏంటి ? రీడ్ దిస్ స్టోరీ..

288 మంది శాసనసభ్యులున్న మహారాష్ట్ర శాసనసభలో బిజెపినే ఇప్పుడు అతిపెద్ద పార్టీ. 105 ఎమ్మెల్యేలతో బిజెపి అతిపెద్ద పార్టీగా అవతరించింది. అయితే.. ఎన్నికల్లో తమతో కలిసి పోటీ చేసిన శివసేన నెంబర్ గేమ్‌లో కీలకంగా మారి.. చివరికి కోర్కెల చిట్టాతో బిజెపి నేతలను చిరాకెత్తించారు. ఎన్నికలకు ముందు కుదరిన అవగాహన ప్రకారమే సీఎం సీటు అడిగామని చెబుతున్నా శివసేన.. ఫలితాలు రాగానే ఎందుకు ముందుగా సీఎం సీటు అంశాన్ని లేవనెత్తింది అన్నది థాక్రేకు, సంజయ్ రౌత్‌లకే తెలియాలి. ఒకవేళ ముందస్తు అవగాహనే వుంటే.. సహజంగానే మిత్రపక్ష నేతలతో కూర్చుని మాట్లాడుకోవచ్చు.. కానీ ఫలితాలొకవైపు వెలువడుతుండగానే సంజయ్ రౌత్ సీఎం సీటు పంపకంపై బహిరంగ ప్రకటనతో పేచీ ప్రారంభించారు.

ముందుగా రౌత్‌తో మాట్లాడించిన శివసేన చీఫ్ ఉద్దవ్ థాక్రే.. ఆ తర్వాత తానే స్వయంగా ప్రకటనలివ్వడం ప్రారంభించారు. రాష్ట్రంలో ఎవరు ప్రభుత్వాన్ని ఏర్పాటు చేసినా.. రిమోట్ తమ చేతిలోనే వుందనే స్థాయికి వెళ్ళారు ఉద్దవ్ థాక్రే. ఈ నేపథ్యంలోనే తాను డమ్మీని కాబోనని చాటుకున్నారు సిట్టింగ్ సీఎం దేవంద్ర ఫడ్నవీస్. అవసరమైతే ప్రతిపక్షంలో కూర్చుంటాం కానీ.. శివసేన తాటాకు చప్పుళ్ళకు తలొగ్గేది లేదని తేల్చి చెప్పారు. దాంతో పలు మార్లు భేటీ అయిన స్టేట్, సెంట్రల్ బిజెపి లీడర్లు.. ప్రభుత్వ ఏర్పాటు నుంచి దూరం జరగాలని.. ఆ తర్వాత జరిగే పరిణామాలను తమకు అనుకూలంగా మలచుకోవాలని నిర్ణయించారు.

శివసేనకున్నది 56 ఎమ్మెల్యే సీట్లు.. దాదాపు 10 మంది వరకు ఇండిపెండెంట్లు మద్దతు ఇస్తున్నారని శివసేన చెప్పుకుంటోంది. అయినా కూడా ప్రభుత్వాన్ని ఏర్పాటు చేయాల్సిన మ్యాజిక్ ఫిగర్ 145ను చేరుకోవాలంటే శివసేన.. ఎన్సీపీ, కాంగ్రెస్ పార్టీల మద్దతు అడగాల్సిందే.. అయితే.. ముందుగా శివసేన ఎన్డీయే నుంచి బయటికి వస్తే.. మద్దతు విషయం చూస్తామని ఎన్సీపీ అధినేత శరద్ పవార్ శివసేన అధినేత ఉద్దవ్ థాక్రేకి షరతు విధించినట్లు ప్రచారం జరుగుతోంది. ఈ నేపథ్యంలో కేంద్రంలో ఎన్డీఏ కేబినెట్‌లో వున్న అరవింద్ సావంత్ తన పదవికి సోమవారం రాజీనామా చేస్తున్నట్లు ప్రకటించారు.

అయితే.. కేవలం 56 మంది ఎమ్మెల్యేలతో.. ఎన్సీపీ (54), కాంగ్రెస్ పార్టీ (44) మద్దతు ప్రభుత్వాన్ని ఏర్పాటు చేస్తే.. శివసేన ప్రభుత్వం మహారాష్ట్రలో ఇప్పటి వరకు ఏర్పడిన అత్యంత బలహీనమైన సర్కార్‌గా చరిత్రలో నిలిచిపోవడం ఖాయం. అయితే.. బయటి నుంచి మద్దతు తీసుకోకుండా.. ప్రభుత్వంలో భాగస్తులు కావాలని శివసేన.. ఎన్సీపీ, కాంగ్రెస్ పార్టీలను కోరుతోంది. ఈ రకంగా సీఎం పదవి శివసేన తీసుకుని, ఒక్కో డిప్యూటీ సీఎం పదవి ఎన్సీపీ, కాంగ్రెస్ పార్టీలకు ఇవ్వచూపుతోంది. ఇదే జరిగితే.. హిందుత్వ ఎజెండాతోనే రాజకీయం చేసే శివసేనతో కాంగ్రెస్ పార్టీ కలిస్తే.. అది దేశవ్యాప్తంగా ప్రభావం చూపనుంది.

ఎన్నికల ప్రచారంలో ఎన్సీపీ, కాంగ్రెస్ పార్టీలను ఎండగట్టిన శివసేన వారితో కల్వడం బిజెపికి రాజకీయంగా పెద్ద అస్త్రం దొరకనుంది. శివసేన-ఎన్సీపీ-కాంగ్రెస్ పార్టీలు తమ కలయికను ఏ ప్రాతిపదికన జనంలో సమర్థించుకోగలరన్నది ఇప్పుడు పెద్ద ప్రశ్న. ఇదే అంశాన్ని ఆధారంగా చేసుకుని మహారాష్ట్రలో ఏకైక హిందుత్వ పార్టీగా బిజెపి నిలిచేందుకు వ్యూహం తప్పనుంది.

కర్నాటకలో తక్కువ సీట్లున్న జెడిఎస్ పార్టీకి సీఎం సీటిచ్చి చేసిన ప్రయోగం విఫలమైనా కూడా కాంగ్రెస్.. శివసేనకు మద్దతిస్తే.. ఏడాదిలోగా ప్రభుత్వం మారడమో.. ప్రభుత్వం కూలిపోవడమో జరుగుతుందని బిజెపి భావిస్తోంది. అదే జరిగితే.. మళ్ళీ ఎన్నికలోస్తే.. శివసేన చేసిన నమ్మక ద్రోహాన్ని, శివసేన-ఎన్సీపీ-కాంగ్రెస్ పార్టీల అపవిత్ర కలయిక ఆసరాగా జనం ముందుకు వెళ్ళి ప్రచారం చేయడం ద్వారా భారీగా లాభపడవచ్చన్నది బిజెపి వ్యూహంగా కనిపిస్తోంది. నిజానికి ఆర్టికల్ 370 రద్దుతో బిజెపికి పెరిగిన ఇమేజీని శివసేన షేర్ చేసుకుందని, బిజెపి పోటీ చేసిన చాలా చోట్ల శివసేన ముందస్తు వ్యూహంతోనే సరిగ్గా సహకరించలేదని బిజెపి నేతలు విశ్వసిస్తున్నారు.

పొత్తు లేకుండా బిజెపి ఎన్నికల బరిలోకి దిగితే.. సొంతంగా మెజారిటీ సాధించేదని, దాన్ని అడ్డుకునేందుకు తమపై డిపెండ్ అయ్యేలా చేసుకునేందుకే శివసేన అసెంబ్లీ ఎన్నికలకు ముందు పొత్తు నాటకాన్ని ఆడిందన్న అంశంతో జనంలోకి వెళ్ళాలని బిజెపి నేతలు భావిస్తున్నారు. శివసేన నేతలు అధికారం కోసం మిత్ర ధర్మాన్ని విస్మరించారన్నది కమలం నేతలకు ఆగ్రహం తెప్పిస్తోంది. ఈ నేపథ్యంలో ప్రభుత్వం ఏర్పాటుకు విముఖత చూపి.. ఆ తర్వాత జరిగే తంతుతో లాభపడాలన్నది బిజెపి వ్యూహమని తెలుస్తోంది.

లేటెస్ట్ న్యూస్ హైలెట్స్ చూడండి

Follow us on

Related Stories

Most Read Stories

Click on your DTH Provider to Add TV9 Telugu