బడ్జెట్ సమర్పణకు ముందు.. 2018-19 ఎకనమిక్ సర్వే ఏం చెబుతోందంటే..

2019-20 సంవత్సరానికి పార్లమెంటులో తన కేంద్ర బడ్జెట్ ను సమర్పించడానికి ముందు ఆర్ధిక మంత్రి నిర్మలా సీతారామన్.. గురువారం 2018-19 ఏడాదికి గాను ఆర్ధిక సర్వేను ప్రవేశపెట్టనున్నారు. చీఫ్ ఎకనామిక్ అడ్వైజర్ కృష్ణమూర్తి సుబ్రమణ్యన్ రూపొందించిన ఈ సర్వే ప్రపంచంలోనే ఇండియా అతి పెద్ద ఐదో ‘ ఎకనామిక్ ‘ దేశంగా తయారయ్యేందుకు అనువైన సూచనలు, మార్గాన్ని ఇవ్వనుంది. 2024 సంవత్సరానికి భారత దేశం 5 ట్రిలియన్ యుఎస్ డాలర్ల మేర ఆర్థిక వ్యవస్థను సంతరించుకుని దీన్ని పూర్తిగా పునరుజ్జీవింపజేయాలన్నమోదీ ప్రభుత్వ లక్ష్యాలకు అవసరమైన సంస్కరణల రోడ్ మ్యాప్ కు ఈ సర్వే దోహదపడుతుందని భావిస్తున్నారు. అలాగే దేశం ముందున్న సవాళ్ళను ఎదుర్కోవడానికి తీసుకోవలసిన చర్యలను కూడా ఈ సర్వే సూచించవచ్చు. దేశ వార్షిక ఆర్థికాభివృధ్ది స్థాయిని ఇది ప్రతిబింబించవచ్ఛు . మోదీ 2.0 ప్రభుత్వంలో పూర్తి స్థాయి బడ్జెట్ ను నిర్మలా సీతారామన్ శుక్రవారం ప్రవేశపెట్టనున్నారు. అసలు ఎకనమిక్ సర్వే అంటే.. జనవరి-మార్చి త్రైమాసికానికి దేశ ఎకానమీ 5. 8 శాతం ఉంది. ఇది చాలా తక్కువ అని, ఉత్పాదక, వ్యవసాయ రంగాల వృద్ది మందగమనంలో ఉన్నట్టు స్పష్టమవుతోందని ఆర్ధిక నిపుణులు అంటున్నారు. ముఖ్యంగా మోదీ ప్రభుత్వం నిరుద్యోగ సమస్యను ప్రధానంగా ఎదుర్కొంటున్న తరుణంలో ఈ సర్వే ప్రతిపాదించనున్న సూచనలను వారు మదింపు చేస్తున్నారు.

జీఎస్టీ వసూళ్లు ‘ సాదా సీదా ‘ గా ఉన్న నేపథ్యంలో.. ఆర్ధిక లోటును ఈ ఏడాది బడ్జెట్ ప్రస్తావించకపోవచ్ఛునని అంటున్నారు. రెండు వరుస నెలల్లో జీఎస్టీ వసూళ్లు లక్ష కోట్ల మార్క్ ను దాటగా జూన్ లో పరోక్ష పన్నులు 99,936 కోట్లు ఉన్నాయి. అయితే ఏప్రిల్-జూన్ త్రైమాసికానికిసగటు నెలవారీ కలెక్షన్స్ రూ. 1. లక్ష కోట్లకు చేరింది. ఇది గత ఏడాది ఇదే కాలంతో పోలిస్తే 7 శాతం ఎక్కువ. సుబ్రహ్మణ్యన్ కు ముందున్న చీఫ్ ఎకనామిక్ అడ్వైజర్ అరవింద్ సుబ్రహ్మణ్యన్ తన రీసెర్చ్ పేపర్ లో భారత్ తన ఆర్థిక లోటును 2. 5 శాతం మేర ఓవర్ ఎస్టిమేట్ చేసిందని పేర్కొన్నారు. మొత్తం మీద దేశం ఎదుర్కొంటున్న సవాళ్ళను అధిగమించడానికి ఈ ఆర్ధిక సర్వే ఏ సూచనలు చేస్తుందన్న దానిపై సర్వత్రా ఆసక్తి నెలకొంది.