ట్రావెలింగ్‌లో వాంతులు ఇబ్బంది పెడుతున్నాయా? ఈ చిట్కాలు తెలిస్తే హాయిగా ప్రయాణించొచ్చు

చాలామందికి ప్రయాణం అంటే భలే ఇష్టం ఉంటుంది. కానీ మరికొందరికేమో ప్రయాణం అంటే వాంతులతో కూడిన ఆందోళన. బస్సు లేదా కారు ఎక్కినా కడుపులో తిప్పడం, వికారం వంటి సమస్యల వల్ల ప్రయాణాన్ని ఆస్వాదించలేకపోతుంటారు. దీనినే మోషన్ సిక్‌నెస్ అంటారు. ప్రయాణ వికారం వల్ల గమ్యం చేరే లోపు నరకం కనిపిస్తుంది. ముఖ్యంగా ఘాట్ రోడ్లలో ప్రయాణించేటప్పుడు ముఖం పాలిపోవడం, నీరసించడం వంటివి ప్రయాణ ఉత్సాహాన్ని నీరుగారుస్తాయి. అయితే ఇది జబ్బు కాదు, కేవలం మన శరీరం ఇచ్చే ఒక స్పందన మాత్రమే. చిన్నపాటి జాగ్రత్తలతో ఈ సమస్య నుండి బయటపడవచ్చని వైద్య నిపుణులు సూచిస్తున్నారు. ఈ సమస్యను సమర్థవంతంగా ఎదుర్కొనే చిట్కాలేంటో తెలుసుకుందాం.

మెదడుకు – జీర్ణవ్యవస్థకు ఉన్న సంబంధం

మైగ్రేన్ సమస్య ఉన్నప్పుడు మెదడులో సెరటోనిన్ స్థాయిల్లో మార్పులు వస్తాయి. మెదడుకు, జీర్ణవ్యవస్థకు నేరుగా సంబంధం ఉండటం వల్ల ఈ రసాయన మార్పులు కడుపులోని కండరాలను ప్రభావితం చేస్తాయి. ఫలితంగా వాంతులు వచ్చే అవకాశం ఉంటుంది. మెదడుకు అందే విరుద్ధ సంకేతాలను తగ్గించడం ద్వారా ఈ సమస్య నుండి ఉపశమనం పొందవచ్చంటున్నారు నిపుణులు.

వికారం తగ్గాలంటే ఏం చేయాలి?

మోషన్ సిక్‌నెస్‌ను అరికట్టడానికి కొన్ని సులభమైన చిట్కాలు పాటించడం మేలు.

• సరైన సీటు ఎంపిక : కదలిక తక్కువగా ఉండే చోట కూర్చోవాలి. బస్సులో అయితే ముందు వైపు, కారులో అయితే ముందు సీటులో కూర్చోవడం వల్ల దూరంగా ఉన్న దృశ్యాలను చూడవచ్చు.
• డిస్ట్రాక్షన్ వద్దు : ప్రయాణంలో పుస్తకాలు చదవడం లేదా ఫోన్ చూడటం అస్సలు చేయకూడదు. కిటికీ గుండా దూరంగా ఉండే కొండలను లేదా ప్రకృతిని చూడటం వల్ల మెదడుకు సరైన సంకేతాలు అందుతాయి.
• ఆహారం : ప్రయాణానికి ముందు మరీ ఎక్కువగా తినకూడదు. తేలికపాటి ఆహారం తీసుకోవాలి. తగినంత నీరు తాగడం, గాలి బాగా వచ్చేలా కిటికీ పక్కన కూర్చోవడం మంచిది.
• సహజ సిద్ధమైన చిట్కాలు : ప్రయాణంలో అల్లం ముక్కను బుగ్గన పెట్టుకోవడం లేదా పుదీనా ఆకులను వాసన చూడటం వల్ల వికారం తగ్గుతుంది. నిమ్మకాయ వాసన కూడా ఉపశమనాన్ని ఇస్తుంది.
• వైద్య సహాయం : సమస్య మరీ తీవ్రంగా ఉంటే ప్రయాణానికి అరగంట ముందే డాక్టర్ సలహాతో యాంటీ మోషన్ సిక్‌నెస్ మందులు వేసుకోవచ్చు. ప్రయాణాన్ని భయంగా కాకుండా ఒక అనుభూతిలా మార్చుకోవాలంటే మన శరీరాన్ని మనం అర్థం చేసుకోవాలి. పైన పేర్కొన్న చిన్న చిన్న చిట్కాలు పాటిస్తే ఘాట్ రోడ్లలో కూడా ప్రశాంతంగా ప్రయాణించవచ్చు.