హెయిర్, స్కిన్‌ ప్రాబ్లమ్స్? ఈ సింపుల్ టిప్స్ తెలిస్తే ఒక్క వెంట్రుక కూడా రాలిపోదు

వేసవిలో జుట్టు సంరక్షణ అనేది చాలా కష్టమైన పనేమీ కాదు. మన అలవాట్లలో కొన్ని చిన్నపాటి మార్పులు చేసుకోవడం ద్వారా జుట్టును ఆరోగ్యంగా, మెరిసేలా ఉంచుకోవచ్చు. చర్మంలాగే జుట్టు కూడా పర్యావరణ మార్పులకు స్పందిస్తుందని, అందుకే ఎండల ప్రభావం నుండి జుట్టును కాపాడుకోవడం ఎంతో ముఖ్యమని నిపుణులు చెబుతున్నారు.

వేసవిలో జుట్టును కాపాడుకునే సూత్రాలు

• ఆరోగ్యకరమైన జుట్టు కుదుళ్ల నుంచే ప్రారంభమవుతుంది. వేసవిలో తల చర్మం త్వరగా జిడ్డుగా, చెమటతో మారుతుంది కాబట్టి దానిని శుభ్రంగా ఉంచుకోవడం కీలకం. వారానికి 2-3 సార్లు గాఢత తక్కువగా ఉండే షాంపూతో స్నానం చేయాలి. స్నానం చేసేటప్పుడు వేడి నీటికి బదులు చల్లని లేదా గోరువెచ్చని నీటిని వాడటం వల్ల జుట్టు పొడిబారకుండా ఉంటుంది.
• వేసవిలో నూనె రాయడం వల్ల జుట్టు బరువుగా అనిపించినా, అది తప్పనిసరి. కొబ్బరి నూనె లేదా బాదం నూనె వంటి తేలికపాటి నూనెలను ఎంచుకోండి. వారానికి ఒకటి లేదా రెండుసార్లు మృదువుగా మసాజ్ చేయడం వల్ల రక్త ప్రసరణ పెరిగి జుట్టుకు పోషణ అందుతుంది.
• ప్రతిసారీ తలస్నానం తర్వాత మంచి కండిషనర్‌ను వాడటం ద్వారా జుట్టులో తేమను నిలుపుకోవచ్చు. అలాగే వారానికి ఒకసారి పెరుగు, కలబంద లేదా తేనె వంటి పదార్థాలతో ఇంట్లోనే హెయిర్ మాస్క్ వేసుకోవడం వల్ల జుట్టు మెత్తగా మారుతుంది.
• బయటకు వెళ్లేటప్పుడు చర్మం లాగే జుట్టుకు కూడా రక్షణ అవసరం. స్కార్ఫ్, టోపీ లేదా దుపట్టాతో జుట్టును కవర్ చేసుకోవాలి. ఈత కొట్టే అలవాటు ఉన్నవారు క్లోరిన్ నీటి వల్ల జుట్టు దెబ్బతినకుండా ఉండేందుకు స్విమ్మింగ్ ముందు, తర్వాత జుట్టును మంచి నీటితో కడగాలి.
• ఎండల వల్ల ఇప్పటికే జుట్టు పొడిబారి ఉంటుంది కాబట్టి, ఈ సమయంలో స్ట్రెయిట్‌నర్లు, కర్లర్లు వంటి హీట్ స్టైలింగ్ పరికరాలను వాడకపోవడమే మంచిది. వీటికి బదులు జడలు లేదా బన్‌ల వంటి సహజమైన హెయిర్ స్టైల్స్‌ను ప్రయత్నించండి.

శరీరాన్ని హైడ్రేటెడ్‌గా ఉంచుకోవడం కోసం తగినంత నీరు తాగాలి. ఆహారంలో సీజనల్ ఫ్రూట్స్, నట్స్ మరియు ఆకుకూరలను చేర్చుకోవడం వల్ల జుట్టు లోపలి నుండి దృఢంగా మారుతుంది. విటమిన్లు, ప్రోటీన్లు పుష్కలంగా ఉండే ఆహారం జుట్టు పెరుగుదలకు తోడ్పడుతుంది.