యాక్టింగ్, ఫిట్‌నెస్‌కి కేరాఫ్‌ ఈ స్టార్ హీరో..! 60ఏళ్ల వయసులోనూ కుర్రాళ్లకు పోటీ

విక్రమ్ ఎప్పుడూ ఒకే రకమైన వ్యాయామాలు చేయరు. తాను పోషించే ప్రతి పాత్రకు తగ్గట్టుగా తన దినచర్యను మార్చుకుంటారు. ముఖ్యంగా ప్లైయోమెట్రిక్ వ్యాయామాలు ఆయనకు అత్యంత ఇష్టం. ఇవి శరీరానికి వేగాన్ని, చురుకుదనాన్ని ఇవ్వడంతో పాటు కండరాల బలాన్ని పెంచుతాయి. బాడీబిల్డర్ పాత్ర కోసం భారీ వెయిట్‌లిఫ్టింగ్, ఒక సాధారణ పాత్ర కోసం కార్డియో వ్యాయామాలు.. ఇలా పాత్ర స్వభావాన్ని బట్టి వర్కౌట్ స్టైల్ మారుతుంటుంది. శంకర్ దర్శకత్వంలో వచ్చిన ‘ఐ’ చిత్రం కోసం 90 కిలోల నుంచి 52 కిలోలకు ఆయన తగ్గిన తీరు ఒక సంచలనం. అలాగే ‘తంగలాన్’ చిత్రంలో గిరిజన యోధుడి పాత్ర కోసం ఆయన పడిన శ్రమ పాత్రలోకి పరకాయ ప్రవేశం చేయాలనే తపనను చూపిస్తుంది.

View this post on Instagram

A post shared by Vikram (@the_real_chiyaan)

ఆహార నియమాలు..

శరీరాకృతి అనేది కేవలం వ్యాయామంపైనే కాకుండా, తీసుకునే ఆహారంపై కూడా ఆధారపడి ఉంటుందని విక్రమ్ బలంగా నమ్ముతారు. బరువు తగ్గాలనుకున్నప్పుడు ఫైబర్ అధికంగా ఉండే కూరగాయలు, పండ్లను ఎక్కువగా తీసుకుంటారు. కార్బోహైడ్రేట్లను తగ్గించి, గుడ్డు తెల్లసొన, ఉడికించిన చేపలు, చికెన్ వంటి ప్రోటీన్ రిచ్ డైట్‌ను క్రమం తప్పకుండా పాటిస్తారు. షూటింగ్ సమయంలో ఆయన తన ఆహార విషయంలో అత్యంత కఠినంగా ఉంటారు.

అసాధ్యాలను సుసాధ్యం చేసి..

విక్రమ్ శారీరక పరివర్తన వెనుక ఒక విషాదకరమైన కానీ స్ఫూర్తిదాయకమైన కథ ఉంది. కళాశాల రోజుల్లో జరిగిన ఒక ఘోర ప్రమాదంలో ఆయన తీవ్రంగా గాయపడ్డారు. మళ్లీ నడవలేరని వైద్యులు చెప్పినా, కాలు తొలగించాల్సిన పరిస్థితి వచ్చినా ఆయన ధైర్యాన్ని కోల్పోలేదు. ఎన్నో శస్త్రచికిత్సలు, సుదీర్ఘ విశ్రాంతి తర్వాత ఊతకర్రల సాయంతో మొదలైన ఆయన ప్రయాణం, ఈరోజు తమిళ చిత్రసీమలో అత్యంత కష్టపడి పనిచేసే నటుడిగా నిలబెట్టింది. ఆనాటి పోరాటమే ఆయనలోని సంకల్ప బలాన్ని రెట్టింపు చేసింది. కష్టం, క్రమశిక్షణ ఉంటే వయసుతో సంబంధం లేకుండా ఏ లక్ష్యాన్నైనా చేరుకోవచ్చని చియాన్ విక్రమ్ నిరూపిస్తున్నారు. ఆయన ఫిట్‌నెస్ ప్రయాణం ప్రతి ఒక్కరికీ ఒక పాఠం.