సక్సెస్ మంత్ర రివీల్ చేసిన గ్లోబల్ స్టార్..! ఈ టిప్స్ పాటిస్తే కెరీర్‌‌ గ్రోత్‌

నేటి పోటీ ప్రపంచంలో, ముఖ్యంగా హైదరాబాద్ లేదా బెంగళూరు వంటి మెట్రో నగరాల్లోని ఐటీ, కార్పొరేట్ రంగాల్లో ప్రతి ఒక్కరూ ఎదుర్కొనే అతిపెద్ద సమస్య ‘గుర్తింపు’. పగలు రేయి కష్టపడినా, బాస్ దృష్టిలో పడలేకపోతున్నామన్న ఆవేదన చాలా మంది ఉద్యోగుల్లో కనిపిస్తుంటుంది. అయితే, గుర్తింపు అనేది మనం అడిగితే వచ్చేది కాదు, మన పని చూసి ప్రపంచమే ఇచ్చేది అని అంటోంది గ్లోబల్ స్టార్ ప్రియాంక చోప్రా.

ప్రచారాలకు దూరం

సాధారణంగా ఆఫీసుల్లో ఒక చిన్న పని పూర్తి చేయగానే, దాని గురించి పదిమందికి చాటింపు వేయడం ఒక అలవాటుగా మారుతోంది. కానీ ప్రియాంక మాటల్లో చెప్పాలంటే, “నిజంగా పని చేసేవారు దాని గురించి బయట గొప్పలు చెప్పుకోరు. మీరు నిశ్శబ్దంగా మీ తల దించుకుని పని చేసుకుంటూ పోతే, మీ నైపుణ్యమే అందరి దృష్టిని ఆకర్షిస్తుంది.” మనం చేసే పనిలో నాణ్యత (Excellence) ఉంటే, గదిలో అందరికంటే గట్టిగా అరిచి చెప్పాల్సిన అవసరం లేదు. ఆ నిశ్శబ్దమే మన విజయానికి ప్రతిధ్వనిగా మారుతుందని ఆమె వివరించారు. అనవసరమైన హడావుడి కంటే, చేసే పనిపై ఏకాగ్రత పెట్టడం వల్ల దీర్ఘకాలంలో గొప్ప ఫలితాలు అందుకోవచ్చు.

నమ్మకమే అసలైన ఆయుధం

మేనేజర్లకు కనిపించడానికి కష్టపడటం కంటే, ఆఫీసులో ‘డిపెండబిలిటీ’ పెంచుకోవాలని ప్రియాంక సూచిస్తున్నారు. ఏ పని అప్పగించినా మీరు సిద్ధంగా ఉంటారు, మీపై ఆధారపడవచ్చు అనే నమ్మకాన్ని తోటి ఉద్యోగుల్లో, బాస్‌లో కలిగించడమే అసలైన విజయం. మీరు ఎవరి సమయాన్ని వృథా చేయకుండా, క్రమశిక్షణతో పని పూర్తి చేస్తే.. సలహాల కోసం అందరూ మీ దగ్గరికే వస్తారు. భారీ టాస్క్ పూర్తి చేసిన తర్వాత ఈమెయిల్స్ పెట్టి ఊదరగొట్టడం వల్ల విశ్వసనీయత దెబ్బతినే ప్రమాదం ఉంది.

మీరు లేని గదిలో కూడా మీ పేరు వినిపించాలంటే, అది కేవలం మీ పనితనం వల్ల మాత్రమే సాధ్యమవుతుంది. సెల్ఫ్ ప్రమోషన్ కంటే స్ట్రాటజిక్ వర్క్ ఎప్పుడూ మిమ్మల్ని రేసులో ముందుంచుతుంది. నిశ్శబ్దంగా పని చేయడం అంటే కనిపించకుండా పోవడం కాదు. మీ పనిని సరైన పద్ధతిలో డాక్యుమెంట్ చేస్తూ, ఫలితాలను స్పష్టంగా చూపించడమే అసలైన గెలుపు. ప్రియాంక చోప్రా చెప్పినట్లుగా, మీ పని మాట్లాడటం మొదలుపెడితే ప్రపంచమే మీకు గుర్తింపునిస్తుంది.