సింక్ డ్రెయిన్ శుభ్రం చేయడానికి బెస్ట్ క్లీనింగ్ టిప్స్.. సెకన్లలోనే డ్రెయిన్ క్లీన్..!

వాష్ రూమ్ శుభ్రం చేసేటప్పుడు సింక్‌లో జుట్టు ఇరుక్కుపోవడం అనేది చాలా మంది ఎదుర్కొనే సాధారణ సమస్య. ఇది లోపలికి వెళ్లి గట్టిగా అతుక్కుపోయినప్పుడు దాన్ని పూర్తిగా తొలగించడం చాలా కష్టం అవుతుంది. మీ బాత్‌టబ్, షవర్ లేదా వాష్ బేసిన్ సింక్‌లో జుట్టు గట్టిగా ఇరుక్కుపోయి ఇబ్బంది పెడుతుంటే దాన్ని సులభంగా తొలగించడానికి కొన్ని సింపుల్ చిట్కాలు ఉన్నాయి.

ముందుగా పాత్రలు కడిగే లిక్విడ్‌ను సింక్‌లో పోయాలి. ఇది జుట్టును జారిపోయేలా చేస్తుంది. తర్వాత వంట సోడా, కార్న్‌స్టార్చ్, వెనిగర్ కలిపి సింక్‌లో పోసి దాదాపు ఐదు నిమిషాలు ఉంచాలి. ఈ మిశ్రమం జుట్టును కరిగించడానికి సహాయపడుతుంది. వెంటనే ఒక కప్పు వేడి నీళ్లు పోస్తే ఇరుక్కుపోయిన జుట్టు తేలికగా బయటకు వస్తుంది.

తడి ప్రదేశాలలో ఉపయోగించే వాక్యూమ్ క్లీనర్ పైపులు కూడా సింక్‌లోపల గట్టిగా అతుక్కున్న మలినాలు, జుట్టును తొలగించడానికి ఉపయోగపడతాయి. ముందుగా సింక్ కవర్‌ను తీసి వాక్యూమ్ పైపును సింక్ పైభాగానికి అమర్చి ఆన్ చేస్తే లోపల ఉన్నదంతా బయటకు వస్తుంది. ఇది చాలా సమర్థవంతమైన పద్ధతి.

సింక్ డ్రెయిన్ పంప్ ఉపయోగించడం కూడా జుట్టును తొలగించడానికి సులభమైన మార్గం. ముందుగా, సింక్ కవర్‌ను తీసేయాలి. తరువాత డ్రెయిన్ పంప్ ద్వారా లోపల చిక్కుకున్న జుట్టును ఒత్తిడితో బయటకు లాగవచ్చు.

అడ్డు తొలగించే కెమికల్ క్లీనర్‌లు మార్కెట్‌లో సులభంగా లభిస్తాయి. ఈ రసాయనాలను సింక్‌లో పోసి పదిహేను నుండి ఇరవై నిమిషాలు ఉంచితే అవి జుట్టును కరిగించి తొలగిస్తాయి. అయితే ఈ రసాయనాలను ఉపయోగించేటప్పుడు జాగ్రత్తగా ఉండాలి ఎందుకంటే అవి చర్మానికి, పైపులకు హాని కలిగించవచ్చు.

సింక్ మూసుకుపోయేంత వరకు ఎదురు చూడకుండా ఒకటి నుండి రెండు వారాలకు ఒకసారి వంట సోడా, వెనిగర్, వేడి నీళ్లు లేదా డ్రెయిన్ క్లీనర్ వాడి శుభ్రం చేయడం మంచిది. ఇది సింక్ మూసుకుపోకుండా నిరోధిస్తుంది, పరిశుభ్రంగా ఉంచుతుంది. షవర్ సింక్‌లో ఎక్కువ జుట్టు పోయే సమస్యను ఆపడానికి హెయిర్ క్యాచర్‌ను అమర్చడం ఉత్తమ పరిష్కారం. ఇది జుట్టును సింక్‌లోకి వెళ్లకుండా ఆపుతుంది.