Chicken Dum Biryani Recipe: పక్కా కొలతలతో డబుల్ మసాలా దమ్ బిర్యానీ.. ముక్క మిగిల్చకుండా లాగించేస్తారు…
బిర్యానీ అంటేనే ఒక వేడుక.. అందులోనూ ప్రపంచ ప్రఖ్యాతి గాంచిన హైదరాబాదీ చికెన్ దమ్ బిర్యానీ పేరు వింటేనే నోరూరుతుంది. చాలామంది రెస్టారెంట్లో "డబుల్ మసాలా" కావాలని స్పెషల్గా ఆర్డర్ చేస్తుంటారు, ఎందుకంటే సాధారణ బిర్యానీలో తెల్ల అన్నం ఎక్కువగా ఉండి మసాలా కింద మాత్రమే ఉంటుంది. కానీ, ఇకపై ఆ రుచి కోసం హోటల్కు వెళ్లాల్సిన పనిలేదు. పక్కా హైదరాబాదీ స్పైస్తో, ప్రతి మెతుకూ మసాలాతో నిండిపోయేలా 'డబుల్ మసాలా చికెన్ దమ్ బిర్యానీ'ని ఇంట్లోనే ఎలా తయారు చేయాలో ఈ ప్రత్యేక కథనంలో తెలుసుకుందాం..
Updated on: Mar 08, 2026 | 1:47 PM
బిర్యానీ వండటం ఒక కళ అయితే, దానికి సరైన మసాలా బ్యాలెన్స్ చేయడం ఒక సైన్స్. చికెన్ ముక్క చప్పగా లేకుండా లోపల వరకు జ్యూసీగా ఉండాలన్నా, అన్నం మెత్తబడకుండా పొడిపొడిగా రావాలన్నా కొన్ని రహస్య చిట్కాలు పాటించాలి. మ్యారినేషన్ నుండి దమ్ పెట్టే వరకు.. బిర్యానీని అడుగు అంటకుండా, రెస్టారెంట్ స్టైల్లో ఘుమఘుమలాడేలా చేసే ‘డబుల్ మసాలా’ సీక్రెట్ రెసిపీ ఇప్పుడు మీకోసం..
కావలసిన పదార్థాలు:
చికెన్: 1 కేజీ (పెద్ద ముక్కలు)
బాస్మతీ బియ్యం: 1 కేజీ (కనీసం గంటసేపు నానబెట్టినవి)
పెరుగు: 1 కప్పు
ఉల్లిపాయలు: 4 పెద్దవి (సన్నగా తరిగి, నూనెలో వేయించినవి – బ్రౌన్ ఆనియన్స్)
అల్లం వెల్లుల్లి పేస్ట్: 3 టేబుల్ స్పూన్లు
పచ్చిమిర్చి: 6-8 (నిలువుగా చీల్చినవి)
కారం: 3 టేబుల్ స్పూన్లు (డబుల్ మసాలా కోసం)
బిర్యానీ మసాలా పొడి: 2 టేబుల్ స్పూన్లు
షాజీరా: 1 టీస్పూన్
హోల్ గరం మసాలా: (లవంగాలు, యాలకులు, దాల్చిన చెక్క, బిర్యానీ ఆకు)
పుదీనా, కొత్తిమీర: ఒక్కో కప్పు (తరిగినవి)
నెయ్యి: 4 టేబుల్ స్పూన్లు
నూనె: అర కప్పు (ఉల్లిపాయలు వేయించిన నూనె వాడండి)
నిమ్మరసం: 2 టేబుల్ స్పూన్లు
ఉప్పు: రుచికి తగినంత
తయారీ విధానం:
చికెన్ మ్యారినేషన్ (అసలైన రుచి ఇక్కడే ఉంది!)
ఒక పెద్ద వెడల్పాటి పాత్రలో కడిగిన చికెన్ ముక్కలను తీసుకోండి.
అందులో అల్లం వెల్లుల్లి పేస్ట్, కారం, ఉప్పు, పెరుగు, నిమ్మరసం, బిర్యానీ మసాలా, షాజీరా, సగం బ్రౌన్ ఆనియన్స్, కొద్దిగా పుదీనా, కొత్తిమీర ఉల్లిపాయలు వేయించిన నూనె వేయండి.
వేయించిన ఉల్లిపాయలను గట్టిగా పిండుతూ చికెన్తో బాగా కలపండి. దీనివల్ల మసాలా ముక్కలకు లోపలి వరకు పడుతుంది.
ఈ మిశ్రమాన్ని కనీసం 3 నుండి 4 గంటలు (వీలైతే రాత్రంతా) ఫ్రిజ్లో ఉంచండి.
రైస్ తయారీ (పొరలు పొరలుగా వండటం)
ఒక పెద్ద గిన్నెలో ఎసరు కోసం నీటిని తీసుకోండి. అందులో హోల్ గరం మసాలా, షాజీరా, కొద్దిగా నూనె, పుదీనా సరిపడా ఉప్పు వేయండి (నీరు సముద్రపు నీరంత ఉప్పగా ఉండాలి).
నీరు మరుగుతున్నప్పుడు నానబెట్టిన బాస్మతీ బియ్యం వేయండి.
బియ్యం 60% ఉడికినప్పుడు (ముక్క కొంచెం గట్టిగా ఉన్నప్పుడు) ఒక వంతు అన్నం తీసి చికెన్ మీద మొదటి లేయర్గా వేయండి.
మరో 2 నిమిషాల తర్వాత 70% ఉడికిన అన్నాన్ని రెండో లేయర్గా, చివరిగా 80% ఉడికిన అన్నాన్ని టాప్ లేయర్గా వేయండి.
దమ్ పెట్టే విధానం
అన్నం పైన మిగిలిన బ్రౌన్ ఆనియన్స్, పుదీనా, కొత్తిమీర, నెయ్యి కావాలనుకుంటే కొద్దిగా కుంకుమపువ్వు పాలు లేదా ఫుడ్ కలర్ చల్లండి.
పాత్రపై మూత పెట్టి, ఆవిరి పోకుండా గోధుమపిండితో లేదా బరువుతో సీల్ చేయండి.
మొదటి 8 నిమిషాలు హై ఫ్లేమ్ మీద, తర్వాత 15-20 నిమిషాలు లో ఫ్లేమ్ మీద ఉంచండి. పాత్ర అడుగు అంటకుండా ఉండాలంటే కింద ఒక పాత పెనం ఉంచడం మంచిది.
స్టవ్ ఆపేసిన తర్వాత కనీసం 20 నిమిషాల వరకు మూత తీయకండి.
