మటన్‌లోని ఈ పార్ట్ సూపర్ స్పెషల్ గురూ.. బ్లడ్ తక్కువగా ఉన్నవారు తింటే ఇట్టే రిజల్ట్.. ఇంకా ఎన్నెన్నో

మటన్, చికెన్, ఫిష్ అంటే చాలు.. నాన్ వెజ్ ప్రియులు బాగా తింటారు. ముఖ్యంగా మటన్‌ను ఎక్కువగా, ఇష్టంగా తింటారు. మటన్‌లో ప్రోటీన్ తోపాటు ఇతర పోషకాలు శరీరాన్ని బలంగా మార్చి.. ఆరోగ్యాన్ని కాపాడతాయి. అయితే.. మేకలోని తిల్లి (నేరడ) ఆరోగ్యానికి చాలా ప్రయోజనకరమైనదిగా పేర్కొంటున్నారు ఆరోగ్య నిపుణులు.. ఈ ప్రత్యేకమైన మటన్ తిల్లి కర్రీ వంటకం కేవలం రుచికరమైనది మాత్రమే కాదు.. అనేక ఆరోగ్య ప్రయోజనాలను కూడా అందిస్తుంది. మేకలోని ఒక ముఖ్యమైన, పోషకాలు నిండిన భాగమైన తిల్లిని ఉపయోగించి చేసే ఈ కూర, ముఖ్యంగా రక్తహీనతతో బాధపడేవారికి, గర్భిణులకు, పాలిచ్చే తల్లులకు (బాలింతలకు), వయస్సు పైబడిన వారికి ఇది ఒక అద్భుతమైన ఆహారం.. నేరెడు హెమోగ్లోబిన్ స్థాయిలను సహజంగా పెంచి.. ఆరోగ్యాన్ని కాపాడటంలో సహాయపడుతుంది.

తిల్లి ప్రాముఖ్యత – ఆరోగ్య ప్రయోజనాలు:

తిల్లి అనేది మేకలోని ఒక భాగం.. మటన్ తిల్లి (మేక ప్లీహం/Spleen) ఐరన్, ప్రోటీన్, విటమిన్ B12కి అద్భుతమైన మూలం.. ఇది రక్తాన్ని వృద్ధి చేయడంలో, శరీరంలోని రోగనిరోధక శక్తిని పెంచడంలో కీలక పాత్ర పోషిస్తుంది. వారానికి ఒకసారి ఈ కర్రీని తీసుకోవడం వల్ల రక్తహీనత వంటి సమస్యల నుండి ఉపశమనం పొందవచ్చు. బాలింతలకు ఇది పత్యంగా పెడతారు, ఎందుకంటే ఇది ప్రసవం తర్వాత శరీరాన్ని బలోపేతం చేయడంలో, కోల్పోయిన శక్తిని తిరిగి పొందడంలో సహాయపడుతుంది.

మటన్ తిల్లి కర్రీ తయారీ విధానం:

కావాల్సిన పదార్థాలు:

తిల్లి ముక్కలు (మేక తిల్లి) – శుభ్రంగా కడిగి కట్ చేసినవి

నూనె, కరివేపాకు – కొద్దిగా, ఉల్లిపాయ పేస్ట్ – 1 పెద్ద సైజు ఉల్లిపాయ, 3 పచ్చిమిర్చి కలిపి మెత్తగా చేసినది, అల్లం వెల్లుల్లి పేస్ట్, ఉప్పు – రుచికి సరిపడా, పసుపు, కారం (మీ కారానికి తగినట్టుగా), ధనియాల పొడి, జీలకర్ర పొడి, కొత్తిమీర తరుగు – కొద్దిగా..

తయారీ పద్ధతి:

తిల్లిని సిద్ధం చేయడం: ముందుగా తిల్లీని శుభ్రమైన నీటితో కడిగి, చిన్న ముక్కలుగా కట్ చేసి పక్కన పెట్టుకోవాలి. ఇది వంటకానికి ప్రాథమిక సన్నాహం.

నూనె వేడి చేయడం: స్టవ్ మీద ఒక కడాయిని పెట్టి, అందులో నూనె వేసి వేడి చేయాలి. నూనె వేడెక్కగానే కొద్దిగా కరివేపాకు వేసి చిటపటమనేంతవరకు వేయించుకోవాలి.

మసాలా వేయించడం: ఆ తర్వాత పెద్ద సైజు ఉల్లిపాయ, మూడు పచ్చిమిర్చిని కలిపి మెత్తగా మిక్సీ పట్టుకున్న పేస్టును వేయాలి. ఈ పేస్టును పచ్చివాసన పోయి, బంగారు రంగు వచ్చేవరకు బాగా మగ్గించుకోవాలి. ఇప్పుడు ఒక టీ స్పూన్ అల్లం వెల్లుల్లి పేస్టును కూడా వేసి, దాని పచ్చివాసన పోయేంతవరకు వేయించుకోవాలి.

ఇది కూడా చదవండి: ముదురు మటన్ మెత్తగా ఉడకాలంటే ఇదొక్కటి తగిలించండి.. పళ్లు లేనేళ్లు కూడా ఈజీగా తింటారు..

తిల్లిని ఉడికించడం: ఉల్లిపాయ మసాలా బాగా మగ్గిన తర్వాత, శుభ్రంగా కడిగి కట్ చేసుకున్న తిల్లి ముక్కలను కడాయిలో వేసి బాగా కలుపుకోవాలి. మూత పెట్టి, మధ్యమధ్యలో కలుపుకుంటూ, తిల్లిలోని నీరంతా బయటకు వచ్చి ఆవిరి అయ్యేవరకు ఉడికించాలి. ఇది తిల్లిని మృదువుగా చేస్తుంది.

మసాలాలు కలపడం: తిల్లిలోని నీరంతా బయటకు వచ్చిన తర్వాత, రుచికి సరిపడా ఉప్పు, అర టీ స్పూన్ పసుపు, ఒక టీ స్పూన్ కారం (మీరు తినే స్పైసీని బట్టి అడ్జస్ట్ చేసుకోవచ్చు), ఒక టీ స్పూన్ ధనియాల పొడి, అర టీ స్పూన్ జీలకర్ర పొడి వేసి బాగా కలుపుకోవాలి. మంటను మీడియం నుండి తక్కువ మంటకు అడ్జస్ట్ చేసుకుని మూడు నుండి నాలుగు నిమిషాల పాటు ఫ్రై చేయాలి.

దగ్గరపడే వరకు ఉడికించడం: మూడు నాలుగు నిమిషాల తర్వాత, ఒక టీ గ్లాస్ వరకు నీళ్లు పోసి, మంటను మీడియం నుండి తక్కువ మంటకు అడ్జస్ట్ చేసుకుని, మూత పెట్టి ఉడికించాలి. మధ్యమధ్యలో కలుపుకుంటూ, కూర దగ్గరపడి, నూనె పైకి తేలేంతవరకు ఉడికించాలి.

కూర దగ్గరపడి నూనె పైకి తేలగానే, కొద్దిగా కొత్తిమీర తరుగును వేసి బాగా కలుపుకుని స్టవ్ ఆఫ్ చేయాలి. వేడివేడి మటన్ తిల్లి కర్రీని ఒక సర్వింగ్ బౌల్‌లోకి తీసుకుని, అన్నం లేదా రోటీతో సర్వ్ చేయవచ్చు.

ఈ మటన్ తిల్లి కర్రీ దాని అద్భుతమైన రుచి, సువాసన, విశేషమైన ఆరోగ్య ప్రయోజనాలతో మీ భోజనాన్ని మరింత సంపూర్ణంగా మారుస్తుంది. దీన్ని మీ ఆహారంలో చేర్చుకోవడం ద్వారా మీరు రుచితో పాటు ఆరోగ్యాన్ని కూడా పొందవచ్చు. అయితే.. ఏమైనా అనారోగ్య సమస్యలుంటే.. నేరుగా వైద్య నిపుణులను సంప్రదించడం మంచిది.

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..