Health Tips: ‘కాసేపే’ అని ఫోన్ తీసుకుంటున్నారా?.. మహిళలకు నిపుణులు చేస్తున్న షాకింగ్ హెచ్చరిక!
రోజంతా ఉద్యోగం, ఇంటి పనులు, కుటుంబ బాధ్యతలతో అలసిపోయిన తర్వాత చాలామంది మహిళలు తమకు దొరికిన కొద్దిసేపు ఖాళీ సమయంలో మొబైల్ ఫోన్లో రీల్స్ చూడటం, సోషల్ మీడియా స్క్రోల్ చేయడం లేదా వీడియోలు చూడటానికి ఇష్టపడతారు. ఇదే తమకు రిలాక్సేషన్ ఇస్తుందని భావిస్తుంటారు. అయితే తాజా అధ్యయనం ప్రకారం ఈ అలవాటు ఒత్తిడిని తగ్గించడం కంటే మరింత పెంచే అవకాశం ఉందని పరిశోధకులు వెల్లడించారు. ఇలా స్క్రోలింగ్ చేయడం వల్ల మెదడుకు నిజమైన విశ్రాంతి లభించకపోగా, నిద్ర కూడా దెబ్బతినే ప్రమాదం ఉందని చెబుతున్నారు.
Updated on: Aug 06, 2026 | 6:24 PM
పరిశోధకుల అభిప్రాయం ప్రకారం ఫోన్ స్క్రోలింగ్ ఒక “విష వలయం” లా మారుతుంది. రిలాక్స్ అవ్వాలని ఫోన్ తీసుకుంటే, తెలియకుండానే ఎక్కువసేపు స్క్రోల్ చేస్తారు. దీంతో నిద్ర ఆలస్యమవుతుంది, మరుసటి రోజు అలసట పెరుగుతుంది. ఆ అలసట నుంచి బయటపడేందుకు మళ్లీ ఫోన్కే అలవాటు పడతారు. ఈ చక్రం కొనసాగితే మానసిక ఒత్తిడి, అసంతృప్తి మరింత పెరిగే అవకాశం ఉందని నిపుణులు హెచ్చరిస్తున్నారు.
1. రిలాక్స్ కావాలనుకుని… ఒత్తిడిని పెంచుకుంటున్నారు
ఇన్స్టాగ్రామ్ రీల్స్, యూట్యూబ్ షార్ట్స్, ఆన్లైన్ షాపింగ్ లేదా సోషల్ మీడియా స్క్రోలింగ్ కొద్దిసేపు వినోదాన్ని ఇచ్చినట్లు అనిపించినా, తర్వాత మానసికంగా మరింత అలసటను కలిగించే అవకాశం ఉందని అధ్యయనం తెలిపింది.
2. మహిళలపై ఎక్కువ ప్రభావం ఎందుకు?
ఉద్యోగం, ఇంటి పనులు, పిల్లల సంరక్షణ, కుటుంబ బాధ్యతలు.. ఇలా ఒకేసారి ఎన్నో పాత్రలు పోషించే మహిళలకు నిజమైన విశ్రాంతి దొరకడం కష్టం. అందుకే ఫోన్ను ‘మీ టైమ్’గా ఉపయోగిస్తారు. కానీ అది మెదడుకు విశ్రాంతిని ఇవ్వకుండా మరింత ఉత్తేజపరుస్తుందని పరిశోధకులు చెబుతున్నారు.
3. ఈ లక్షణాలు కనిపిస్తున్నాయా?
ఫోన్ వాడిన తర్వాత కూడా ప్రశాంతంగా అనిపించకపోవడం నిద్రపోయే సమయం దాటిపోవడం ఫోన్ పక్కన పెట్టిన తర్వాత కూడా మనసు ప్రశాంతంగా లేకపోవడం ఉదయం లేచిన వెంటనే అలసటగా అనిపించడం
ఇలాంటి లక్షణాలు కనిపిస్తే స్క్రీన్ టైమ్ను తగ్గించుకోవాల్సిన అవసరం ఉందని నిపుణులు సూచిస్తున్నారు.
4. ఫోన్కు బదులుగా ఇవి ప్రయత్నించండి
సాయంత్రం 20 నుంచి 30 నిమిషాల పాటు పుస్తకం చదవడం, డైరీ రాయడం, ధ్యానం చేయడం, లోతైన శ్వాస వ్యాయామాలు, సంగీతం వినడం లేదా చిన్న నడకకు వెళ్లడం వంటి అలవాట్లు మానసిక ప్రశాంతతను పెంచుతాయని నిపుణులు సూచిస్తున్నారు.
5. నిద్రకు ముందు ఫోన్ దూరంగా పెట్టండి
పడుకునే ముందు కనీసం 30 నుంచి 60 నిమిషాల పాటు మొబైల్కు దూరంగా ఉండటం వల్ల నిద్ర నాణ్యత మెరుగుపడే అవకాశం ఉంది. దీంతో మరుసటి రోజు శరీరం, మనసు మరింత ఉత్సాహంగా ఉంటాయి.
6. గుర్తుంచుకోవాల్సిన విషయం
సోషల్ మీడియాను పూర్తిగా మానేయాల్సిన అవసరం లేదు. కానీ అది విశ్రాంతి కోసం ఉపయోగిస్తున్నామా? లేక అలవాటుగా మారిందా? అనేది ప్రతి ఒక్కరూ గుర్తించుకోవాలి. నిజమైన ‘మీ టైమ్’ అంటే మనసుకు ప్రశాంతతను ఇచ్చే పనులను ఎంచుకోవడమేనని నిపుణులు చెబుతున్నారు.
గమనిక: ఈ కథనం ఆరోగ్య అవగాహన కోసం మాత్రమే. ఇందులో పేర్కొన్న విషయాలు తాజా అధ్యయనాలు, నిపుణుల అభిప్రాయాల ఆధారంగా అందించబడ్డాయి. నిరంతరం ఒత్తిడి, ఆందోళన, నిద్రలేమి వంటి సమస్యలు ఉంటే మానసిక ఆరోగ్య నిపుణులను సంప్రదించడం మంచిది.
