వర్షం తర్వాత ఇంట్లో బూజు వాసన ఎందుకు వస్తుంది? తడి వాసన పోవాలంటే ఏం చేయాలి..?

వర్షాకాలం మండే ఎండల నుంచి ఉపశమనం కలిగించినా.. ఇంట్లో మాత్రం కొత్త సమస్యలను తెచ్చిపెడుతుంది. ముఖ్యంగా వర్షం ఆగిన తర్వాత ఇంట్లోకి వెళ్లగానే తడి బట్టలు, తేమగా ఉన్న టవల్స్ లేదా బూజుపట్టిన ప్రదేశాల నుంచి వచ్చే ప్రత్యేకమైన వాసన ఇబ్బంది పెడుతుంది. దీనిని చాలామంది సాధారణ తడి వాసనగా భావిస్తారు. కానీ ఇంట్లో ఎక్కువకాలం తేమ ఉండటం, గాలి ప్రసరణ సరిగా లేకపోవడం, గోడల్లోకి నీరు ఇంకడం వంటి కారణాలతో బూజు, శిలీంధ్రాలు పెరిగే అవకాశం ఉంటుంది.

వర్షాకాలంలో బూజు వాసన ఎందుకు వస్తుంది?

వర్షాల సమయంలో గాలిలో తేమ శాతం గణనీయంగా పెరుగుతుంది. ఈ తేమ గోడలు, కార్పెట్లు, కర్టెన్లు, ఫర్నిచర్, పరుపులు, చెక్క వస్తువులు వంటి వాటిలోకి చేరుతుంది. అవి ఎక్కువసేపు తడిగా ఉంటే బూజు, శిలీంధ్రాలు పెరగడానికి అనుకూల పరిస్థితులు ఏర్పడతాయి. వీటి కారణంగానే ఇంట్లో బూజుపట్టినట్లు ప్రత్యేకమైన వాసన వస్తుంది. దీనికి తోడు ఇంటి చుట్టూ నిలిచే నీరు, మూసుకుపోయిన డ్రైనేజీలు, తడి బట్టలు, తడిసిన బూట్లు, గొడుగులు కూడా ఇంట్లో తేమను పెంచుతాయి. వర్షం పడుతుందని కిటికీలు, తలుపులు ఎక్కువసేపు మూసి ఉంచితే గాలి ప్రసరణ తగ్గిపోయి వాసనలు బయటకు వెళ్లకుండా ఇంట్లోనే నిలిచిపోతాయి.

తేమను వెంటనే తొలగించండి

తడి వాసన రాకుండా ఉండాలంటే ముందుగా ఇంట్లో తేమ పేరుకుపోకుండా చూసుకోవాలి. వర్షం తర్వాత నేల, గోడలు, ఇతర తడి ఉపరితలాలపై నీరు ఉంటే వెంటనే తుడిచి పూర్తిగా ఆరబెట్టాలి. గోడ మూలలు, అల్మారాల వెనుక భాగాలు, ఫర్నిచర్ కింద, గాలి సరిగా వెళ్లని ప్రాంతాలపై ప్రత్యేకంగా దృష్టి పెట్టాలి. గోడల్లోకి నీరు ఇంకడం, పైకప్పు నుంచి లీకేజీలు రావడం, పైపుల నుంచి నీరు కారడం కనిపిస్తే వెంటనే కారణాన్ని సరిచేయాలి. సమస్యను అలాగే వదిలేస్తే వాసనతో పాటు బూజు పెరుగుదల కూడా ఎక్కువయ్యే అవకాశం ఉంటుంది.

వర్షం ఆగిన తర్వాత కిటికీలు తెరవండి

వర్షం పడుతున్న సమయంలో కిటికీలు మూసి ఉంచడం అవసరమైనప్పటికీ.. వర్షం ఆగిన తర్వాత ఇంటిని ఎక్కువసేపు మూసి ఉంచకండి. బయట వాతావరణం అనుకూలంగా ఉన్నప్పుడు కిటికీలు, తలుపులు తెరిచి గాలి ప్రసరణకు అవకాశం కల్పించాలి. ఎదురెదురుగా ఉన్న కిటికీలు, తలుపులను తెరవడం ద్వారా గాలి సులభంగా ఇంట్లోకి వచ్చి బయటకు వెళ్లేలా చేయవచ్చు. ఇలా చేయడం వల్ల ఇంట్లో పేరుకుపోయిన తేమ తగ్గడంతో పాటు బూజు పెరిగే అవకాశాలు కూడా తగ్గుతాయి.

తేమ ఎక్కువగా ఉంటే డీహ్యూమిడిఫైయర్

ఇంట్లో సహజంగా గాలి ప్రసరణ తక్కువగా ఉండి, తేమ సమస్య తరచూ ఎదురవుతుంటే డీహ్యూమిడిఫైయర్ ఉపయోగపడుతుంది. ఇది గాలిలోని అదనపు తేమను తగ్గించడంలో సహాయపడుతుంది. ముఖ్యంగా వర్షాకాలంలో తేమ ఎక్కువగా ఉండే గదుల్లో దీన్ని ఉపయోగించడం వల్ల ఇంటి వాతావరణాన్ని పొడిగా ఉంచుకోవచ్చు.

తడి బట్టలు, బూట్లు ఇంట్లోనే ఉంచొద్దు

వర్షంలో తడిసిన బట్టలు, బూట్లు, గొడుగులను ఇంట్లోనే వదిలేయడం వల్ల తేమ వేగంగా పెరుగుతుంది. తడి బట్టలను వీలైనంత వరకు గాలి బాగా ప్రసరించే ప్రదేశంలో ఆరబెట్టాలి. బయట ఆరబెట్టడం సాధ్యం కాకపోతే కిటికీలు ఉన్న, గాలి, వెలుతురు బాగా వచ్చే గదిని ఎంచుకోవాలి. తడిసిన బూట్లు, గొడుగులను కూడా ఉపయోగించిన వెంటనే పూర్తిగా ఆరబెట్టాలి. లేకపోతే వాటి నుంచి వచ్చే తేమ, వాసన క్రమంగా గదిలో వ్యాపిస్తుంది.

బూజు వాసన తగ్గించడానికి ఇంటి చిట్కాలు

బాత్రూమ్ వంటి చిన్న, మూసి ఉన్న ప్రదేశాల్లో బూజు వాసన ఎక్కువగా ఉంటే ఓపెన్‌గా ఉంచిన గిన్నెలో కొద్దిగా తెల్ల వెనిగర్ పెట్టడం వాసన తగ్గించడంలో సహాయపడుతుంది. అలాగే కార్పెట్లు, ఫ్యాబ్రిక్ సోఫాలు వంటి ఉపరితలాలపై బేకింగ్ సోడాను చల్లి సుమారు 30 నిమిషాల తర్వాత వాక్యూమ్ చేయవచ్చు. అయితే ఇవి కేవలం వాసనను తగ్గించే చిట్కాలు మాత్రమే. బూజు, తేమకు అసలు కారణం అలాగే ఉంటే సమస్య మళ్లీ వస్తుంది. అందుకే లీకేజీలు, తడి గోడలు, సరైన వెంటిలేషన్ లేకపోవడం వంటి మూల కారణాలను గుర్తించి పరిష్కరించడం ముఖ్యం.

మొక్కలు పెంచుతున్నారా? జాగ్రత్త!

ఇంట్లో మొక్కలు పెంచడం వల్ల అందం పెరుగుతుంది. కొన్ని మొక్కలు ఇంటి వాతావరణానికి కూడా ఉపయోగకరంగా ఉండొచ్చు. అయితే ఎక్కువ సంఖ్యలో మొక్కలకు నీరు పోయడం, కుండీల్లో నీరు నిలిచిపోవడం వల్ల ఇంట్లో తేమ మరింత పెరిగే అవకాశం ఉంది. కాబట్టి మొక్కలను పెంచేటప్పుడు నీరు నిల్వ ఉండకుండా చూసుకోవాలి.

మొత్తంగా.. వర్షం తర్వాత ఇంట్లో వచ్చే బూజు వాసనను కేవలం సువాసనలతో కప్పిపుచ్చడం కంటే.. తేమకు అసలు కారణాన్ని గుర్తించి తొలగించడం ముఖ్యం. గాలి ప్రసరణ మెరుగుపరచడం, తడి వస్తువులను వెంటనే ఆరబెట్టడం, నీటి లీకేజీలను సరిచేయడం, అవసరమైతే డీహ్యూమిడిఫైయర్ ఉపయోగించడం ద్వారా ఇంట్లో తడి వాసనను గణనీయంగా తగ్గించుకోవచ్చంటున్నారు నిపుణులు.

మరిన్ని లైఫ్ స్టైల్ వార్తల కోసం ఇక్కడ క్లిక్ చేయండి..