స్మార్ట్‌వాచ్‌లో కనిపించే ఆరోగ్య రీడింగ్స్‌ అన్నీ నిజమైన కొలతలేనా? ఏవి నమ్మాలి?

ఈ రోజుల్లో స్మార్ట్‌వాచ్‌లు కేవలం సమయం తెలుసుకోవడానికి ఉపయోగించే పరికరాలు కావు. హృదయ స్పందన రేటు, అడుగుల సంఖ్య, నిద్ర, వ్యాయామం, కేలరీల ఖర్చు, రికవరీ వంటి అనేక ఆరోగ్య, ఫిట్‌నెస్ వివరాలను మణికట్టుపైనే చూపిస్తున్నాయి. దీంతో చాలామంది తమ ఆరోగ్య పరిస్థితిని అంచనా వేసుకోవడానికి స్మార్ట్‌వాచ్ డేటాపై ఆధారపడుతున్నారు. అయితే వాచ్ స్క్రీన్‌పై కనిపించే ప్రతి సంఖ్య శరీరం నుంచి నేరుగా కొలిచినదే అనుకోవడం సరికాదని పరిశోధకులు చెబుతున్నారు.

మిచిగాన్ విశ్వవిద్యాలయానికి చెందిన పరిశోధకుల వివరణ ప్రకారం, స్మార్ట్‌వాచ్‌లు సెన్సార్ల ద్వారా సేకరించిన సంకేతాలను కంప్యూటర్ అల్గారిథమ్‌లతో విశ్లేషించి అనేక ఆరోగ్య గణాంకాలను అంచనా వేస్తారు. అంటే స్క్రీన్‌పై కనిపించే కొన్ని సంఖ్యలు ప్రత్యక్ష కొలతలు కాకుండా, సెన్సార్ డేటా ఆధారంగా రూపొందించిన అంచనాలు.

సెన్సార్లు ఎలా పనిచేస్తాయి?

స్మార్ట్‌వాచ్‌లోని ఆప్టికల్ సెన్సార్లు చర్మంపై కాంతిని ప్రసరించి మణికట్టులోని రక్తప్రవాహంలో మార్పులను గుర్తిస్తాయి. ఈ సంకేతాలను విశ్లేషించి హృదయ స్పందన రేటును అంచనా వేస్తారు. మరోవైపు యాక్సిలరోమీటర్, ఇతర మోషన్ సెన్సార్లు చేతి కదలికలను గుర్తించి అడుగులు, శారీరక కార్యకలాపాలను లెక్కించడంలో సహాయపడతాయి. బయట నడుస్తున్నప్పుడు లేదా పరుగెత్తుతున్నప్పుడు GPS ద్వారా దూరం, వేగం, ప్రదేశం వంటి సమాచారం లభిస్తుంది.

ఆ తర్వాత వాచ్‌లోని సాఫ్ట్‌వేర్ ఈ డేటాను అల్గారిథమ్‌ల ద్వారా ప్రాసెస్ చేసి వినియోగదారుడికి వివిధ గణాంకాలను చూపిస్తుంది. యూనివర్సిటీ ఆఫ్ మిచిగాన్‌లోనే ధరించగల పరికరాల ద్వారా హార్ట్ బీటింగ్ వంటి కొలతల ఖచ్చితత్వాన్ని పరికరం అమరిక, చర్మ లక్షణాలు, వ్యాయామ తీవ్రత వంటి అంశాలపై పరిశోధిస్తున్నారు.

ఏ రీడింగ్స్‌ను ఎక్కువగా నమ్మొచ్చు?

సాధారణంగా విశ్రాంతి సమయంలో హృదయ స్పందన రేటు, నిరంతర వ్యాయామ సమయంలో హృదయ స్పందన, అడుగుల సంఖ్య, బయట కార్యకలాపాల్లో వేగం వంటి సాపేక్షంగా సరళమైన కొలతలు ఉపయోగకరంగా ఉంటాయి. అయితే వీటిలోనూ పరికరం, వినియోగ విధానం, వ్యక్తిగత శారీరక లక్షణాల ఆధారంగా కొంత వ్యత్యాసం ఉండవచ్చు.

ఇక కేలరీల ఖర్చు, నిద్ర దశలు, రికవరీ, శరీర వాటర్ లెవల్స్, శరీర కూర్పు వంటి సంక్లిష్టమైన గణాంకాలు అనేక సెన్సార్ డేటా, వ్యక్తిగత వివరాలు, అల్గారిథమ్‌లపై ఆధారపడతాయి. అందువల్ల వాటిని ఖచ్చితమైన వైద్య కొలతలుగా భావించడం సరికాదంటున్నారు నిపుణులు. 2026లో ప్రచురితమైన Sensors సమీక్ష కూడా వినియోగదారుల స్మార్ట్‌వాచ్‌లకు ఖచ్చితత్వం, పరిమితులు, వాస్తవ ప్రపంచ వినియోగం విషయంలో కొలమానం ఆధారంగా తేడాలు ఉంటాయని వివరిస్తోంది.

ఒకే వ్యక్తికి వేర్వేరు రీడింగ్స్ ఎందుకు వస్తాయి?

వాచ్‌ను మణికట్టుకు ఎంత బిగుతుగా ధరించారు, చేతి కదలికలు ఎంతగా ఉన్నాయి, చెమట, ఉష్ణోగ్రత, చర్మ లక్షణాలు, పచ్చబొట్లు, శరీర నిర్మాణం వంటి అంశాలు సెన్సార్ సిగ్నల్స్‌ను ప్రభావితం చేయవచ్చు. వేర్వేరు కంపెనీలు వేర్వేరు సెన్సార్లు, సాఫ్ట్‌వేర్, అల్గారిథమ్‌లను ఉపయోగించడం వల్ల ఒకే వ్యక్తికి రెండు బ్రాండ్ల వాచీలు వేర్వేరు ఫలితాలను చూపించే అవకాశం కూడా ఉందంటున్నారు నిపుణులు.

ఒక్కరోజు రీడింగ్ కంటే ట్రెండ్ ముఖ్యం

స్మార్ట్‌వాచ్‌లను ఉపయోగించేటప్పుడు ఒక్కరోజు వచ్చిన సంఖ్యను చూసి ఆందోళన చెందడం కంటే, రోజుల నుంచి వారాల వరకు కనిపించే మార్పులను గమనించడం మరింత ఉపయోగకరంగా ఉంటుంది. ఉదాహరణకు సాధారణ స్థాయితో పోలిస్తే హృదయ స్పందన రేటు, నిద్ర విధానంలో నిరంతరంగా మార్పులు కనిపిస్తే వాటిని గమనించవచ్చు.

అయితే స్మార్ట్‌వాచ్ ఆరోగ్య నిపుణుడికి ప్రత్యామ్నాయం కాదు. ముఖ్యంగా గుండె సంబంధిత లక్షణాలు, అసాధారణ రీడింగ్స్ లేదా ఆరోగ్యంపై ఆందోళన కలిగించే మార్పులు కనిపిస్తే వాచ్ డేటాపైనే ఆధారపడకుండా వైద్య నిపుణుడిని సంప్రదించడం మంచిది. యూనివర్సిటీ ఆఫ్ మిచిగాన్ కూడా వినియోగదారుల వేరబుల్ పరికరాల డేటాను క్లినికల్ నిర్ణయాల కోసం జాగ్రత్తగా అర్థం చేసుకోవాల్సిన అవసరాన్ని సూచిస్తోంది.

మొత్తంగా చూస్తే.. స్మార్ట్‌వాచ్‌లు ఆరోగ్యాన్ని నిరంతరం గమనించడానికి ఉపయోగకరమైన సాధనాలు. కానీ స్క్రీన్‌పై కనిపించే ప్రతి సంఖ్యను శరీరం నుంచి నేరుగా తీసిన ఖచ్చితమైన కొలతగా భావించకూడదు. స్మార్ట్‌వాచ్‌ను ‘డాక్టర్’గా కాకుండా.. ఆరోగ్య ట్రెండ్‌లను గమనించే ఒక సహాయక సాధనంగా ఉపయోగించడం ఉత్తమం.

మరిన్ని లైఫ్‌ స్టైల్ వార్తల కోసం ఇక్కడ క్లిక్ చేయండి..