అల్యూమినియం vs స్టీల్ కుక్కర్.. మీ వంటింటికి ఏది మంచిది..? కొనేముందు ఈ విషయాలు తెలుసుకోండి..

నేటి ఉరుకుల పరుగుల జీవితంలో వంటగదిలో ఇల్లాలికి అత్యంత నమ్మకమైన నేస్తం ప్రెషర్ కుక్కర్. ఉదయాన్నే ఆఫీసులకు వెళ్లే హడావిడిలో ఉన్నా, లేదా కుటుంబం కోసం క్షణాల్లో ఘుమఘుమలాడే పప్పు, అన్నం, మాంసాహారం వండాలన్నా కుక్కర్ ఉండాల్సిందే. అయితే మార్కెట్‌లోకి వెళ్లినప్పుడు మనకు ప్రధానంగా రెండు రకాల కుక్కర్లు కనిపిస్తాయి. ఒకటి అల్యూమినియం, మరొకటి స్టెయిన్‌లెస్ స్టీల్. ధర తక్కువని అల్యూమినియం కొనాలా? లేక ఆరోగ్యానికి మంచిదని స్టీల్ తీసుకోవాలా? అసలు ఈ రెండింటిలో ఏది బెస్ట్? అనేది తెలుసుకోవడం ముఖ్యం.

అల్యూమినియం కుక్కర్

దాదాపు ప్రతి భారతీయ వంటగదిలోనూ అల్యూమినియం కుక్కర్ దర్శనమిస్తుంది. బడ్జెట్ ఫ్రెండ్లీగా ఉండటం, వేగంగా వేడెక్కడం దీని ప్రధాన బలాలు. అల్యూమినియం ఉష్ణాన్ని వేగంగా గ్రహిస్తుంది. దీనివల్ల ఆహారం క్షణాల్లో ఉడికిపోతుంది. పాత్ర చాలా తేలికగా ఉండటం వల్ల నీరు, ఆహారంతో నిండి ఉన్నప్పటికీ చేతులతో సులభంగా ఎత్తవచ్చు, శుభ్రం చేసుకోవచ్చు. బడ్జెట్ తక్కువగా ఉన్నవారికి ఇది పాకెట్ ఫ్రెండ్లీ ఆప్షన్.

మైనస్ పాయింట్లు – ఆరోగ్య సమస్యలు

టమాటాలు, చింతపండు, నిమ్మకాయ వంటి పుల్లని పదార్థాలు అల్యూమినియంలో వండినప్పుడు లోహం ఆహారంలో కరిగే ప్రమాదం ఉందని ఆరోగ్య నిపుణులు హెచ్చరిస్తున్నారు. కొంతకాలం వాడిన తర్వాత పాత్ర మెరుపు కోల్పోయి గీతలు పడతాయి. మూత, రబ్బర్ గాస్కెట్లు కూడా త్వరగా వదులై పాడయ్యే అవకాశాలు ఎక్కువ.

స్టెయిన్‌లెస్ స్టీల్ కుక్కర్

ప్రస్తుతం చాలామంది ఆరోగ్యంపై దృష్టి పెడుతుండటంతో స్టెయిన్‌లెస్ స్టీల్ కుక్కర్లకు డిమాండ్ భారీగా పెరిగింది. స్టీల్ ఏ ఆహార పదార్థంతోనూ రసాయన చర్య జరపదు కాబట్టి ఇది ఆరోగ్యానికి 100శాతం సురక్షితం. పుల్లని చారు, సాంబార్ వంటివి కూడా నిరభ్యంతరంగా, సురక్షితంగా వండుకోవచ్చు. ఆధునిక స్టీల్ కుక్కర్లకు మందపాటి లేయర్ ఉండటం వల్ల వేడి పాత్ర అంతటా సమానంగా వ్యాపిస్తుంది. ఆహారం మాడిపోకుండా చక్కగా ఉడుకుతుంది. ఇది ఎంతో దృఢమైనది. తుప్పు పట్టడం, గీతలు పడటం వంటి సమస్యలు ఉండవు. ఒక్కసారి కొంటే ఏళ్ల తరబడి కొత్తదానిలా మెరుస్తుంది.

మైనస్ పాయింట్లు

అల్యూమినియంతో పోలిస్తే ఇది కాస్త బరువుగా ఉంటుంది. రోజూ పైకి ఎత్తడం, కడగడం కొందరికి శ్రమగా అనిపించవచ్చు. స్టీల్ వేడెక్కడానికి కాస్త ఎక్కువ సమయం తీసుకుంటుంది. అలాగే ప్రారంభ ధర కూడా అల్యూమినియం కంటే ఎక్కువ.

మీకు ఏది బెస్ట్..?

మీ ఎంపిక మీ అవసరం, ప్రాధాన్యతలపై ఆధారపడి ఉంటుంది. మీకు తక్కువ బడ్జెట్‌లో, తేలికగా ఉంటూ రోజూ పప్పు, అన్నం త్వరగా ఉడికే పాత్ర కావాలనుకుంటే అల్యూమినియం కుక్కర్ వైపు వెళ్లొచ్చు. కానీ కుటుంబ ఆరోగ్యం, ఆహార భద్రత, ఎక్కువ కాలం మన్నే నాణ్యత ముఖ్యమనుకుంటే మాత్రం కాస్త ఎక్కువైనా స్టెయిన్‌లెస్ స్టీల్ కుక్కర్‌ను ఎంచుకోవడమే అత్యుత్తమ నిర్ణయం.