‘కొద్దిమంది ఎమ్మెల్యేలను కొంటారు, కానీ తృణమూల్ కాంగ్రెస్ ను కొనలేరు’ అమిత్ షా పై బెంగాల్ సీఎం మమత ఫైర్

కొద్ధి మంది ఎమ్మెల్యేలను, అది కూడా ‘కుళ్ళిన స్థితిలో’ ఉన్నవారిని మీరు కొనగలుగుతారని, కానీ తృణమూల్ కాంగ్రెస్ ను కొనజాలరని బెంగాల్ సీఎం, ఈ పార్టీ అధినేత్రి మమతా బెనర్జీ అన్నారు. హోం మంత్రి అమిత్ షాను ఉద్దేశించి ఆమె ఇలా తీవ్రంగా  వ్యాఖ్యానించారు. సరిగ్గా వారం రోజుల క్రితమే అమిత్ షా ఈ రాష్ట్రానికి వచ్చి..బోల్ పూర్ లో జరిగిన రోడ్ షో, భారీ ర్యాలీలో పాల్గొన్నారు. ఆ సందర్భంగా టీ ఎం సీ ని, మమతా బెనర్జీని తీవ్రంగా విమర్శించారు. కాగా-మంగళవారం మమత ఇదే బోల్ పూర్ లో జరిగిన మెగా ర్యాలీలో పాల్గొన్నారు. తమ పార్టీకి చెందిన మాజీ నేత సువెందు అధికారి సహా సుమారు 10 మంది నేతలు ఇటీవల బీజేపీలో చేరిన విషయాన్ని ఈ సందర్భంగా ఆమె ప్రస్తావిస్తూ.. ఇలా మా వాళ్ళను కొన్నంత మాత్రాన మా పార్టీకి వఛ్చిన నష్టం ఏమీ లేదన్నారు. బీజేపీని బయటి పార్టీగా అభివర్ణిస్తూ..మీరు ఫేక్ పాలిటిక్స్, హేట్ పాలిటిక్స్ కి పాల్పడుతున్నారని, కానీ మీ పప్పులుడకవని వ్యాఖ్యానించారు. బెంగాల్ వెన్నును చీల్చడానికి మీరు యత్నిస్తున్నారు..కానీ రవీంద్ర నాథ్ ఠాగూర్ ‘సోనార్ బంగ్లా’ గా పేర్కొన్న ఈ రాష్టంలో మీ ఆటలు సాగబోవు అని మమత అన్నారు.మహాత్మా గాంధీ, ఇతర దేశ నాయకుల పట్ల గౌరవం చూపని వ్యక్తులు’సోనార్ బంగ్లా’ గురించి మాట్లాడుతున్నారు.. కానీ రవీంద్రనాథ్ ఠాగూర్ ఈ భూభాగాన్ని ఇదివరకే సోనార్ బంగ్లాగా జాతీయ గీతంలో అభివర్ణించారు అని దీదీ పేర్కొన్నారు. విశ్వభారతి యూనివర్సిటీలో మతతత్వ రాజకీయాలను జొప్పించేందుకు జరుగుతున్న యత్నాల పట్ల ఆమె విచారం వ్యక్తం చేశారు. ఈ యూనివర్సిటీ వీసీ బిద్యుత్ చక్రవర్తిని ఆమె బీజేపీ రబ్బర్  స్టాంప్ గా దుయ్యబట్టారు. కోల్ కతాకు 150 కి.మీ. దూరంలోని ఈ యూనివర్సిటీ వద్ద నేడు నాలుగు కి.మీ. పొడవునా సాగిన రోడ్ షో లో ఆమె పాల్గొన్నారు.