చైనా కంపెనీతో భారత రైల్వే ఒప్పందం రద్దు

చైనా దొంగ దెబ్డకు సరిహద్దులో జరిగిన హింసాత్మక ఘర్షణల్లో 20 మంది భారతీయ సైనికులు మృతి చెందారు. దీంతో దేశ వ్యాప్తంగా చైనా ఉత్పత్తులు, వస్తువులు, కంపెనీలపై నిషేధం విధించాలని నిరసన వ్యక్తమవుతోంది. ఈ నేపథ్యంలో భారత్ రైల్వే శాఖ సంచలన నిర్ణయం తీసుకుంది. ఇండియన్ రైల్వే శాఖ ఒక కాంట్రాక్టును రద్దు చేసుకుంది. కాన్పూర్- దీన్‌దాయాల్ ఉపాధ్యాయ (మొఘల్ సరాయ్) సెక్షన్ల మధ్య 417 కిలోమీటర్ల మేర టెలీకమ్యునికేషన్స్, సిగ్నలింగ్ ప్రాజెక్టు చేపట్టింది. ఇందుకుగానూ 2016లో చైనాకు చెందిన బీజింగ్ నేషనల్ రైల్వే రీసెర్చ్ అండ్ డిజైనింగ్ ఇన్‌స్టిట్యూట్ ఆఫ్ సిగ్నల్ అండ్ కమ్యునికేషన్ సంస్థకు కేటాయించింది. ఈ మేరకు ఈ కాంట్రాక్టు రద్దు చేసినట్లు ఇండియన్ రైల్వేకు చెందిన డెడికేటెడ్ ఫ్రైట్ కారిడార్ కార్పొరేషన్ ఆఫ్ ఇండియా లిమిటెడ్ ఒక ప్రకటనలో తెలిపింది. మరోవైపు చైనా కంపెనీలతో భారతీయులకు ఉన్న ఒప్పందాలు రద్దు చేసుకోవాలని దేశ వ్యాప్తంగా డిమాండ్లు పెరుగుతున్నాయి.