Eye Problems: స్క్రీన్ బానిసలకు శుభవార్త.. కంటి సమస్యలకు అడ్డుకట్ట వేయండిలా!

ఆధునిక జీవనశైలి.. ముఖ్యంగా ఐటీ రంగంలో పని చేసే నిపుణులకు అనేక ఆరోగ్య సవాళ్లు తెస్తుంది. ఇందులో కంటి ఆరోగ్యం ఒక ప్రధాన ఆందోళన. ఎక్కువ స్క్రీన్ సమయం, నిరంతర దృష్టితో కూడిన పని వాతావరణం వల్ల అర్బన్ నిపుణులు పలు కంటి సమస్యలు ఎదుర్కొంటారు. ఈ సమస్యలు రాకుండా తీసుకోవలసిన జాగ్రత్తలు ఏమిటో తెలుసుకుందాం.

సాధారణ కంటి సమస్యలు:

1. వక్రీకరణ లోపాలు:

ఇవి కంటికి చాలా సాధారణ సమస్యలు. దగ్గరి చూపు (మయోపియా), దూరపు చూపు (హైపర్‌మెట్రోపియా), ఆస్టిగ్మాటిజం వంటివి దీనిలో ఉంటాయి. ఎక్కువ సమయం కంప్యూటర్లు, మొబైల్ ఫోన్లు వాడకం వల్ల కంటిపై ఒత్తిడి పెరుగుతుంది. ఇది కంటి దృష్టిలో మార్పులు తెస్తుంది. అద్దాలు లేదా కాంటాక్ట్ లెన్సులు ధరించడం ద్వారా ఈ సమస్య సరిదిద్దుకోవచ్చు. కొందరికి లేజర్ సర్జరీలు కూడా ప్రత్యామ్నాయంగా ఉంటాయి.

2. పొడి కళ్ళు :

పొడి కళ్ళు అనేది అర్బన్ ప్రొఫెషనల్స్ ఎదుర్కొనే మరో ప్రధాన సమస్య. ఎయిర్ కండిషన్డ్ ఆఫీసులు, స్క్రీన్‌లు చూస్తూ ఎక్కువ సమయం గడపడం వల్ల కళ్ళు తగినంత తేమ ఉత్పత్తి చేయలేవు. కళ్ళు పొడిగా, మంటగా అనిపించడం, దురద, ఎరుపుదనం, చూపు మసకబారడం వంటి లక్షణాలు కనిపిస్తాయి. కంటి చుక్కలు వాడటం, తరచుగా కనురెప్పలు ఆర్పడం, స్క్రీన్ సమయం మధ్య విరామాలు తీసుకోవడం, పని వాతావరణంలో తేమ ఉండేలా చూసుకోవడం వంటివి సహాయపడతాయి.

3. కంటి శుక్లం :

కంటిశుక్లం అనేది కంటిలోని సహజ లెన్స్ మసకబారడం. ఇది దృష్టిని మసకబారుస్తుంది. రంగు, కాంట్రాస్ట్ సెన్సిటివిటీ తగ్గిపోతుంది. ఇతర దృశ్యపరమైన సమస్యలు తెస్తుంది. అర్బన్ ప్రొఫెషనల్స్‌లో కంటి అలసట, తలనొప్పి వంటివి కంటిశుక్లం ప్రారంభ లక్షణాలు కావచ్చు. వయస్సు పెరగడం, మధుమేహం, కంటి గాయాలు, అతినీలలోహిత కాంతికి అధికంగా గురికావడం వంటివి కంటిశుక్లం రావడానికి కారణాలు. ప్రారంభ దశలో దృష్టిని మెరుగుపరచడానికి అద్దాలు సహాయపడతాయి. అయితే, లక్షణాలు తీవ్రమైతే శస్త్రచికిత్స ద్వారా మసకబారిన లెన్స్ తొలగించి, కృత్రిమ లెన్స్‌ను అమరుస్తారు.

4. డిజిటల్ ఐ స్ట్రెయిన్ / కంప్యూటర్ విజన్ సిండ్రోమ్:

ఇది ఎక్కువ స్క్రీన్ సమయం వల్ల వచ్చే సమస్య. కళ్ళు పొడిబారడం, అలసట, తలనొప్పి, మెడ నొప్పి, దృష్టి మసకబారడం దీని లక్షణాలు. దీనిని నివారించడానికి 20-20-20 నియమం పాటించాలి. అంటే, ప్రతి 20 నిమిషాలకు, 20 సెకన్ల పాటు 20 అడుగుల దూరంలోని వస్తువును చూడాలి. స్క్రీన్ బ్రైట్‌నెస్, కాంట్రాస్ట్ సరిచేసుకోవడం, యాంటీ-గ్లేర్ స్క్రీన్‌లు ఉపయోగించడం కూడా సహాయపడతాయి.

నివారణ చర్యలు:

ప్రతి గంటకు కనీసం 5-10 నిమిషాల విరామం తీసుకోవాలి.

20-20-20 నియమం: కంటి అలసట తగ్గించగలదు.

పని చేసే ప్రాంతంలో సరైన కాంతి ఉండేలా చూసుకోండి. స్క్రీన్ నుండి కాంతి కళ్ళపై నేరుగా పడకుండా చూసుకోండి.

కంప్యూటర్ స్క్రీన్ కంటి స్థాయికి కొద్దిగా దిగువన, 20-24 అంగుళాల దూరంలో ఉండేలా చూసుకోండి.

విటమిన్ ఎ, సి, ఇ, జింక్ అధికంగా ఉండే పండ్లు, కూరగాయలు, ఆకుకూరలు ఆహారంలో చేర్చుకోండి.

కంటి సమస్యలు గుర్తించడానికి, నివారించడానికి కంటి నిపుణుడిని క్రమం తప్పకుండా సంప్రదించడం ముఖ్యం.