ప్రయోగానికి సిద్దమవుతున్న యంగ్ హీరో.. ఆ సినిమాలో చెవిటి మూగ యువకుడి పాత్రలో కనిపించనున్న నాగశౌర్య

ప్రయోగాలు చేయడానికి టాలీవుడ్ హీరోలు ఎప్పుడు సిద్దంగానే ఉంటారు. స్టార్ డమ్ ను పక్కన పెట్టి కథను నమ్మి సినిమాలు చేస్తుంటారు. ఇలా చాలా సినిమాలు తెలుగులో వచ్చాయి. అయితే వచ్చిన సినిమాలన్నీ విజయం సాధించకపోయిన నటులకు మాత్రం మంచి గుర్తింపు తెచ్చిపెట్టాయి. ఇటీవల ‘నిశబ్దం’ సినిమాలో అనుష్క చెవిటి మూగ పాత్రలో నటించి మెప్పించిన విషయం తెలిసిందే. తాజాగా ఓ యంగ్ హీరో కూడా ఇలాంటిపాత్రలోనే నటించడానికి సిద్ధమవుతున్నాడని తెలుస్తుంది. ‘ఊహలు గుసగుసలాడే’ సినిమాతో హీరోగా ఎంట్రీ ఇచ్చిన నాగశౌర్య. ‘ఛలో’ సినిమాతో మంచి విజయాన్ని సొంతం చేసుకున్నాడు. త్వరలో నటించే సినిమాలో చెవిటి మూగ పాత్రలో కనిపించనున్నాడని తెలుస్తుంది.

ఇక శౌర్య వరుసగా సినిమాలను పట్టాలెక్కిస్తున్నాడు. ఇప్పటికే రెండు సినిమాలు షూటింగ్ దశలో ఉన్నాయి. ఈ సినిమాల తర్వాత మరో మూడు సినిమాలకు సైన్ చేసాడు ఈ యంగ్ హీరో. నాగశౌర్య నటిస్తున్న ఓ సినిమాలో నందమూరి బాలకృష్ణ అతిధి పాత్రలో  కనిపించనున్నారని ప్రచారం జరుగుతుంది. అయితే ఈ సినిమాలోనే శౌర్య చెవిటి మూగ యువకుడిగా కనిపించనున్నాడని అంటున్నారు. శౌర్య పాత్ర చాలా ఆహ్లాదకరంగా వినోదాత్మకంగా ఉంటుందట. ఈ మూవీకి శ్రీమాన్ వేముల దర్శకత్వం వహించనున్నారని తెలుస్తుంది. త్వరలోనే ఈ సినిమా అప్డేట్స్ ను ఇవ్వనున్నారని, వచ్చే ఏడాది ప్రారంభంలో రెగ్యులర్ షూటింగ్ ను ప్రారంభించనున్నారని ఫిలిం నగర్లో టాక్ నడుస్తుంది.