Unstoppable With NBK: మహేష్ నా చిన్న తమ్ముడు.. పవన్ వాటికోసం మా ఇంటికి వచ్చేవాడు.. బాలయ్య షోలో వెంకీ కబుర్లు

నందమూరి బాలకృష్ణ హోస్ట్ గా వ్యవహరిస్తున్న అన్ స్టాపబుల్ షో ఫుల్ స్వింగ్ లో దూసుకుపోతుంది. ఇప్పటికే మూడు సీజన్స్ పూర్తి చేసుకున్న ఈ టాక్ షో ఇప్పుడు సీజన్ 4 తో అలరిస్తుంది. ఇక బాలయ్య గురించి ప్రత్యేకంగా చెప్పాల్సిన అవసరం లేదు. సినిమాల్లో ఎంత పవర్ ఫుల్ రోల్స్ చేస్తారో.. ఈ టాక్ షోలో అంత జోవియల్ గా ఉంటారు. సరదా ముచ్చట్లు, నిమిషానికో పంచ్, సెటైర్లు , ఆటపట్టించడం అబ్బో బాలయ్యతో ఎంటర్టైన్మెంట్ మాములుగా ఉండదు. తాజాగా అన్ స్టాపబుల్ షోకు విక్టరీ వెంకటేష్ గెస్ట్ గా హాజరయ్యారు. తన జనరేషన్ హీరో కావడంతో ఆనాటి రోజులను గుర్తు చేసుకున్నారు ఈ ఇద్దరు స్టార్ హీరోలు. అలాగే వీరి మధ్య ఎన్నో సరదా సంభాషణలు జరిగాయి.

ఈ క్రేజీ ఎపిసోడ్ లో బాలయ్య, వెంకీ కలిసి భలే సందడి చేశారు. తన సినిమాల గురించి అలాగే తన పర్సనల్ లైఫ్ గురించి కూడా ఎన్నో విషయాలను పంచుకున్నారు వెంకటేష్. బాలకృష్ణ చిలిపి ప్రశ్నలు, వెంకీ మామ ఫన్నీ సమాధానాలు ప్రేక్షకులను ఆకట్టుకున్నాయి. ఈ క్రమంలోనే వెంకటేష్ మహేష్ బాబు, పవన్ కళ్యాణ్ గురించి ఆసక్తికర కామెంట్స్ చేశారు. ఈ టాక్ షోలో సీతమ్మ వాకిట్లో సిరిమల్లెచెట్టు సినిమాలో వెంకటేష్.. మహేష్ బాబుని పూలకుండీ ఎందుకు తన్నావురా .? అనే సీన్ ప్లే చేసి దాని గురించి అడిగారు బాలయ్య.

దీనికి వెంకటేష్ బదులిస్తూ.. రీసెంట్ గానే మహేష్ కు మెసేజ్ కూడా చేశాను పూలకుండీ ఎందుకు తన్నావు.? అని కానీ రిప్లై ఇవ్వలేదు అని నవ్వుతూ అన్నారు. మహేష్ నా చిన్న తమ్ముడు. మహేష్ అందరికి గౌరవమిస్తాడు. మేమిద్దరం సీతమ్మ వాకిట్లో సిరిమల్లెచెట్టు సినిమా టైం లో బాగా దగ్గరయ్యాం. నిజమైన అన్న తమ్ముడులానే ఆ సినిమా చేశాం. ఇప్పుడు కూడా ఎప్పుడైనా కలిస్తే నా చిన్న తమ్ముడిలా అనిపిస్తాడు అని అన్నారు వెంకటేష్. అలాగే పవన్ కళ్యాణ్ గురించి మాట్లాడుతూ.. సినిమాలకంటే ముందు నుంచే నాకు పవన్ తెలుసు. మా ఇంటికి ఎక్కువ వస్తుండేవాడు. నా దగ్గర లేజర్ డిస్క్ లు ఉండేవి వాటి కోసం ఎక్కువగా వచ్చే వాడు. ఇద్దరం సైలెంట్ గా ఉంటాం.. అలాగే ఇద్దరికీ భక్తి భావం ఎక్కువ.. మేమిద్దరం భక్తి భావంతో కనెక్ట్ అయ్యాం. సైలెంట్ గా ఉంటూనే ఒకరికొకరు అర్ధం చేసుకుంటాం.. అని వెంకటేష్ అన్నారు. ఈ కామెంట్స్ ఇప్పుడు సోషల్ మీడియాలో వైరల్ గా మారాయి.

మరిన్ని సినిమా వార్తల కోసం ఇక్కడ క్లిక్ చేయండి