కోలీవుడ్‌లోకి టాలీవుడ్ టాలెంటెడ్ బ్యూటీ.. అరంగేట్రంలోనే ఏకంగా ఫిమేల్ ఓరియెంటెడ్ సినిమా చాన్స్

ఆమె.. ఇప్పుడు ఏకంగా ఒక పవర్ ఫుల్ ఫిమేల్ ఓరియెంటెడ్ సినిమాతో కోలీవుడ్ అరంగేట్రం చేస్తోంది. కేవలం గ్లామర్ పాత్రలకే పరిమితం కాకుండా, నటనకు ఎంతో ప్రాధాన్యత ఉన్న సూపర్ నేచురల్ క్రైమ్ థ్రిల్లర్ కథతో ఆమె ప్రేక్షకుల ముందుకు రాబోతోంది. తన కెరీర్‌లోనే అత్యంత కీలకమైన మైలురాయిగా భావిస్తున్న ఈ సినిమా షూటింగ్ కూడా ఇప్పటికే ప్రారంభమైపోయింది. ఇంతకీ ఆ టాలెంటెడ్ నటి ఎవరు?

కోలీవుడ్ ఎంట్రీ..

టాలీవుడ్ నటి కోమలి ప్రసాద్ ఇప్పుడు తమిళ చిత్ర పరిశ్రమలోకి అడుగుపెట్టారు. శరణ్ రాజ్ సెంథిల్ కుమార్ దర్శకత్వంలో రూపొందుతున్న ‘మండవెట్టి’ అనే సినిమాతో ఆమె కోలీవుడ్ అరంగేట్రం చేస్తున్నారు. టస్కర్స్ డెన్ పిక్చర్స్ బ్యానర్‌పై తెరకెక్కుతున్న ఈ సినిమా లాంఛనంగా పూజా కార్యక్రమాలు పూర్తి చేసుకుని, ప్రస్తుతం షూటింగ్ జరుపుకుంటోంది. తన కెరీర్‌లో ఈ సినిమా ఒక కొత్త అధ్యాయమని కోమలి ఇన్‌స్టాగ్రామ్‌లో ఎమోషనల్ పోస్ట్ చేశారు. ప్రేక్షకుల ఆశీస్సులు తనకు ఎప్పుడూ ఉండాలని ఆమె కోరుకున్నారు.

Komalee Prasad

ప్రస్తుతం తమిళనాడులోని మదురై జిల్లా ఉసిలంపట్టి ప్రాంతంలో ఈ సినిమా చిత్రీకరణ శరవేగంగా జరుగుతోంది. ‘మండవెట్టి’ ఒక సూపర్ నేచురల్ క్రైమ్ థ్రిల్లర్ అంశాల నేపథ్యంలో సాగే బలమైన మహిళా ప్రధాన కథ. ఇందులో మిస్టిసిజం, ఎమోషన్స్‌ను అద్భుతంగా మేళవించినట్లు తెలుస్తోంది. మనకు కావాల్సిన దానిని కోల్పోవడం వల్ల కలిగే బాధ, గుర్తింపు కోసం చేసే పోరాటం వంటి హృద్యమైన అంశాలను ఈ సినిమాలో చూపించనున్నారు. నటనకు మంచి స్కోప్ ఉన్న ఈ కథ మొత్తం కోమలి ప్రసాద్ పాత్ర చుట్టూనే సాగనుంది.

‘వెల్ల కుదిర’ వంటి సైకలాజికల్ సినిమాతో విమర్శకుల ప్రశంసలు అందుకున్న శరణ్ రాజ్ సెంథిల్ కుమార్ ఈ సినిమాను రొటీన్‌కు భిన్నంగా తెరకెక్కిస్తున్నారు. పాత్రల అంతర్గత భావాలు, భావోద్వేగాలను తెరపై సహజంగా ఆవిష్కరించడంపై ఆయన ప్రత్యేక దృష్టి పెట్టారు. ఈ సినిమాలో తేనప్పన్, గజరాజ్, అమృత కీలక పాత్రల్లో కనిపిస్తున్నారు. సినిమాటోగ్రాఫర్ ప్రకాశ్, ఎడిటర్ కునా, సంగీత దర్శకుడు దీపక్ వేణుగోపాల్ వంటి ప్రతిభావంతులైన సాంకేతిక నిపుణులు ఈ ప్రాజెక్ట్ కోసం పనిచేస్తున్నారు.

కోమలి ప్రసాద్ ఇప్పటికే తెలుగు సినిమాల్లో తనకంటూ ఒక గుర్తింపును సొంతం చేసుకున్నారు. ‘నెపోలియన్’, ‘రౌడీ బాయ్స్’, ‘సెబాస్టియన్ P.C. 524’, ‘హిట్ – సెకండ్ కేస్’, ‘శశివదనే’ వంటి సినిమాలతో ప్రేక్షకులను మెప్పించారు. వెండితెరపైనే కాకుండా డిజిటల్ ప్లాట్‌ఫాంలలో ‘లూజర్’, ‘మోడర్న్ లవ్ హైదరాబాద్’ వంటి వెబ్ సిరీస్‌లతో విమర్శకుల ప్రశంసలు పొందారు. గ్లామర్ పాత్రలతో పాటు పెర్ఫార్మెన్స్ ఓరియెంటెడ్ రోల్స్ ఎంచుకుంటూ తన సత్తా నిరూపించుకుంటున్న కోమలి.. ‘మండవెట్టి’తో తమిళంలో కూడా పాగా వేయడం ఖాయమని ట్రేడ్ వర్గాలు భావిస్తున్నాయి. కోమలి ప్రసాద్ వంటి టాలెంటెడ్ నటీమణులు ఇతర భాషల్లోకి వెళ్లి తమ సత్తా చాటడం తెలుగు సినిమాకు గర్వకారణం. ఒక గ్రిప్పింగ్ సూపర్ నేచురల్ థ్రిల్లర్‌తో తమిళ ప్రేక్షకులను ఆమె ఎలా మెప్పిస్తారో చూడాలి.