Jack Movie Review: జాక్ మూవీ రివ్యూ.. సిద్దూ జొన్నలగడ్డ మరోసారి హిట్టు కొట్టాడా.. ?
డిజే టిల్లు, టిల్లు స్క్వేర్ లాంటి బ్లాక్బస్టర్ సినిమాల తర్వాత సిద్ధూ జొన్నలగడ్డ నటించిన సినిమా జాక్. బొమ్మరిల్లు భాస్కర్ తన రూట్ మార్చుకుని ఈ సినిమాను తెరకెక్కించాడు. మరి ఈ స్పై థ్రిల్లర్ ఎలా ఉంది..? ఆడియన్స్ను ఆకట్టుకుందా లేదా అనేది పూర్తి రివ్యూలో చూద్దాం..
మూవీ రివ్యూ: జాక్
నటీనటులు: సిద్ధూ జొన్నలగడ్డ, వైష్ణవి చైతన్య, ప్రకాశ్ రాజ్, వికే నరేష్, రాజేష్ కట్టర్, రాహుల్ దేవ్, బ్రహ్మాజీ తదితరులు
ఎడిటర్: నవీన్ నూలి
సినిమాటోగ్రఫీ: విజయ్ కే చక్రవర్తి
నిర్మాత: బివిఎస్ఎన్ ప్రసాద్
దర్శకుడు: బొమ్మరిల్లు భాస్కర్
డిజే టిల్లు, టిల్లు స్క్వేర్ లాంటి బ్లాక్బస్టర్ సినిమాల తర్వాత సిద్ధూ జొన్నలగడ్డ నటించిన సినిమా జాక్. బొమ్మరిల్లు భాస్కర్ తన రూట్ మార్చుకుని ఈ సినిమాను తెరకెక్కించాడు. మరి ఈ స్పై థ్రిల్లర్ ఎలా ఉంది..? ఆడియన్స్ను ఆకట్టుకుందా లేదా అనేది పూర్తి రివ్యూలో చూద్దాం..
కథ:
పాబ్లో నెరేడా అలియాస్ జాక్ (సిద్ధూ జొన్నలగడ్డ)కు చిన్నప్పటి నుంచి రా ఏజెంట్ అయ్యి దేశాన్ని కాపాడాలని కలలు కంటుంటాడు. అందుకే ఇంటర్వ్యూకు కూడా వెళ్తాడు. కానీ అక్కడ్నుంచి రిజల్ట్ రాకముందే దేశం కోసం రంగంలోకి దిగిపోతాడు. అయితే తన కొడుకు ఏం చేస్తున్నాడో తెలుసుకోడానికి ఓ డిటెక్టివ్ ఏజెన్సీని అప్రోచ్ అవుతాడు జాక్ తండ్రి (నరేష్). అలా భానుమతి (వైష్ణవి చైతన్య) జాక్ జీవితంలోకి వస్తుంది. అప్పట్నుంచి మనోడి ప్రతీ మూవెంట్ ఫాలో అవుతుంటుంది భాను. ఈ సమయంలోనే ఇండియాపై టెర్రర్ అటాక్స్ చేయడానికి నుజీఫర్ రెహమాన్ (రాహుల్ దేవ్) ప్లాన్ చేస్తుంటాడు. తన దగ్గర్నుంచి నలుగురు టెర్రరిస్టులను ఇండియాకు పంపిస్తాడు. మరోవైపు ఆ టెర్రరిస్టులను పట్టుకోడానికి రా ఆఫీసర్ మనోజ్ (ప్రకాశ్ రాజ్) రంగంలోకి దిగుతాడు. కానీ జాక్ రావడంతో వాళ్ల ప్లాన్ అంతా పాడవుతుంది. అక్కడ్నుంచి కథ ఏం జరిగింది..? ఎలాంటి మలుపులు తీసుకుంది అనేది స్క్రీన్ మీదే చూడాలి..
కథనం:
క్యారెక్టరైజేషన్తో ఆడే సినిమాలు కొన్ని మాత్రమే ఉంటాయి. డిజే టిల్లు, టిల్లు స్క్వేర్ లాంటి సినిమాలు ఇలాంటివే. ఇందులో కథ ఉన్నా లేకపోయినా కేవలం సిద్దూ లాంగ్వేజ్కు, మనోడి వన్ లైనర్స్కు పడిపోయారు ఆడియన్స్. అందుకే అవి అంత పెద్ద హిట్ అయ్యాయి. కానీ అన్ని సినిమాలు అలా ఆడతాయ్ అనుకుంటే పొరపాటే. అందులోనూ స్పై బ్యాక్డ్రాప్ సినిమా అంటే స్క్రీన్ ప్లే పకడ్బందీగా ఉండాలి. ఓ టెర్రరిజం గ్రూప్.. ఇండియాపై అటాక్స్.. రా ఏజెంట్స్ వాళ్ళను అడ్డుకోవడం.. ప్రతీ స్పై థ్రిల్లర్లోనూ కామన్ కథ ఇదే.. కానీ దాన్నెలా తెరకెక్కించామనేదే కదా స్క్రీన్ ప్లే. అందులో జాక్ పూర్తిగా ఫెయిల్ అయ్యాడేమో అనిపించింది. బేసిక్ కథ రాసుకున్న బొమ్మరిల్లు భాస్కర్.. అంతకంటే బేసిక్ స్క్రీన్ ప్లేతో ఈ సినిమాను తీసాడు. వాళ్లు రా ఏజెంట్సా లేదంటే అటు ఇటు పరిగెత్తే రన్నర్సా అనేది అర్థం కాలేదు కాసేపు. మరోవైపు జులాయిలో అల్లు అర్జున్లా రా వాళ్ల కంటే ముందే హీరో అన్నీ కనిపెట్టేస్తుంటాడు. అదేంట్రా అంటే ప్యాషన్, దేశం అసలే క్లిష్ట పరిస్థితుల్లో ఉందంటాడు. మినిమమ్ లాజిక్ లేని సన్నివేశాలు ఈ సినిమాలో చాలానే ఉన్నాయి. ఉదాహారణకు తుపాకి సినిమా చాలా మంది చూసే ఉంటారు కదా.. అందులో టెర్రరిస్టులు అందరినీ ఒకేసారి కాల్చే సీన్ ఉంటుంది.. దాన్ని మురుగదాస్ ఎంత బాగా డిజైన్ చేసాడు. కానీ అలాంటి సీన్ ఒకటి జాక్లో ఉంటుంది.. అదేదో పిట్టల్ని కాల్చేసినట్లు చాలా కామెడీగా డిజైన్ చేసారు సీన్. అలాంటి సీన్స్ చాలానే ఉన్నాయి ఈ సినిమాలో. కమర్షియల్ రూట్లోకి వచ్చాననుకున్నాడు కానీ పరమ రొటీన్ సినిమా తీసాడు బొమ్మరిల్లు భాస్కర్. ఎంత డైజెస్ట్ చేసుకోవాలనుకున్నా కూడా ఇలాంటి స్క్రీన్ ప్లేతో జాక్ సినిమాను చూడలేం. అయినా కూడా అక్కడక్కడా తన ఎనర్జీతో సినిమాను కాపాడటానికి చాలా ట్రై చేసాడు సిద్ధూ.
నటీనటులు:
సిద్ధూ జొన్నలగడ్డ గురించి ఏం చెప్పాలి.. మనోడు ఇంకా టిల్లు క్యారెక్టర్లోనే ఉన్నాడు. కథ మారినా.. క్యారెక్టరైజేషన్ మాత్రం అక్కడే ఆగిపోయింది. సిచ్యువేషన్తో సంబంధం లేకుండా సింగిల్ లైనర్స్ వేస్తూనే ఉన్నాడు. నటన పరంగా బాగానే చేసాడు కానీ అన్నిసార్లు అదే అంటే వర్కవుట్ అవ్వదు కదా. కొన్నిసార్లు అవి పేలాయి.. కొన్నిసార్లు అస్సలు పేలలేదు. ప్రకాశ్ రాజ్ పర్లేదు.. వైష్ణవి చైతన్యకు మరో కన్ఫ్యూజింగ్ క్యారెక్టర్ పడింది. ఇక నరేష్ను పెద్దగా యూజ్ చేసుకోలేదు. రాహుల్ దేవ్, రాజేష్ ఖట్టర్, రవిప్రకాశ్, సుబ్బరాజు లాంటి నటులు తమ పాత్రలకు న్యాయం చేసారు.
టెక్నికల్ టీం:
జాక్ సినిమాకు ముగ్గురు సంగీత దర్శకులు పని చేసారు. పాటలైతే పెద్దగా ఎక్కవు. బ్యాగ్రౌండ్ స్కోర్ మాత్రం బాగానే ఉంది. నవీన్ నూలీ ఎడిటింగ్ బాగానే చేసాడు కానీ ఆయనకు కథ సహకరించలేదు. సినిమాటోగ్రఫీ వర్క్ చాలా రిచ్గా ఉంది. నిర్మాణ విలువలు చాలా ఉన్నతంగా ఉన్నాయి. కథకు తగ్గట్లు ఖర్చు చేసారు. దర్శకుడు బొమ్మరిల్లు భాస్కర్ మాత్రం తనకు వచ్చిన అవకాశం యూజ్ చేసుకోలేదు. రొటీన్ కథతోనే మరోసారి వచ్చారు ఈయన.
పంచ్ లైన్:
ఓవరాల్గా జాక్.. కొంచెం కాదు వీడు చాలా పెద్ద క్రాక్..!