Happy Birthday Thalaiva: బస్ కండక్టర్ నుంచి సూపర్ స్టార్ స్థాయికి.. రజినీకాంత్ 75 ఏళ్ల ప్రస్థానం!

సినిమా పరిశ్రమలో స్టార్స్‌ ఉంటారు, మెగాస్టార్స్‌ ఉంటారు. కానీ సూపర్ స్టార్ రజినీకాంత్ మాత్రం ఒక్కరే. ఆయన కేవలం నటుడు కాదు, దశాబ్దాలుగా కోట్లాది మంది అభిమానులకు ఆరాధ్య దైవం. ఆయన స్క్రీన్‌పై కనిపించినా, కనిపించకపోయినా ఆ పేరుకు ఉన్న క్రేజ్, వైబ్రేషన్ వేరు. ఒక సామాన్య బస్ కండక్టర్ నుంచి ప్రపంచంలోనే అత్యధిక పారితోషికం తీసుకునే నటులలో ఒకరిగా, ఆరాధ్య దైవంగా ఎలా ఎదిగారు? ఆయన జీవితం ఒక కథ కాదు.. మహత్తర చరిత్ర. సూపర్​స్టార్​ రజినీకాంత్​ 75వ పుట్టినరోజు సందర్భంగా ప్రత్యేక కథనం..

బస్ కండక్టర్ నుంచి బెస్ట్ యాక్టర్‌గా..

బెంగుళూరులో ఒక సాధారణ మరాఠీ కుటుంబంలో జన్మించిన శివాజీ రావ్ గైక్వాడ్… బస్ కండక్టర్‌గా పనిచేసిన సమయంలో తనలోని నటనపై మక్కువతో చెన్నైకి చేరుకున్నారు. అక్కడ కేవలం తన స్టైల్, నటనతో దర్శకుడు కె. బాలచందర్ కంట్లో పడ్డారు. 1975లో వచ్చిన ‘అపూర్వ రాగంగళ్’ సినిమాతో ఆయన ప్రయాణం మొదలైంది. మొదట్లో విలన్‌గా, సహాయ పాత్రల్లో నటించినా, రజినీకాంత్ ఉన్న ప్రత్యేకమైన మేనరిజమ్స్, స్టైల్ ప్రేక్షకులను మైమరిపించాయి. కేవలం 100 రోజుల్లోనే ఆయన అంచెలంచెలుగా ఎదిగి, తమిళ సినిమాను శాసించే స్థాయికి చేరుకున్నారు.

స్క్రీన్ పై ఒక మెరుపు..

రజినీకాంత్ సినిమా అంటే కేవలం కథ కాదు, థియేటర్లో ఒక పండగ వాతావరణం. ఆయన సిగరెట్ వెలిగించే స్టైల్, కళ్లజోడు తిప్పే స్టైల్, నడిచే స్టైల్… ఇవన్నీ సినిమా భాషకు కొత్త నిఘంటువును అందించాయి. ‘ముత్తు’, ‘బాషా’, ‘పడయప్పా’ వంటి చిత్రాలు రజినీకాంత్ కి దక్షిణ భారతదేశంలో అపారమైన అభిమానుల్ని సంపాదించి పెట్టాయి. ‘శివాజీ: ది బాస్’, ‘రోబో’, ‘కబాలి’, ‘పెటా’, ‘జైలర్’ వంటి చిత్రాలు ఆయనను, భారతీయ సినిమా ఖ్యాతిని ప్రపంచానికి చాటిచెప్పాయి. 70 ఏళ్లు దాటినప్పటికీ, యువ హీరోలకు కూడా సాధ్యం కాని బాక్సాఫీస్ రికార్డులను ఆయన సృష్టిస్తూనే ఉన్నారు.

నిజమైన ‘తలైవా’..

రజినీకాంత్ తెరపై ఒక సూపర్ స్టార్ అయితే, తెర వెనుక ఆయన వినయం, ఆధ్యాత్మికత, దయ ఆయనని ప్రత్యేకంగా నిలబెట్టాయి. ఎంత ఎత్తుకు ఎదిగినా, తెల్లటి దుస్తులు, సాధారణమైన రూపంలో కనిపించే రజినీకాంత్ నిరాడంబరత అందరికీ ఆదర్శం. హిమాలయాల్లో ఆయన చేసే ప్రయాణాలు, యోగా, ధ్యానం… ఆయన వ్యక్తిత్వానికి ఉన్న లోతును, ప్రశాంతతను తెలియజేస్తాయి. తన అభిమానుల పట్ల, ప్రజల పట్ల ఆయన చూపించే అపారమైన ప్రేమ, సేవా కార్యక్రమాల్లో పాల్గొనే విధానం… ఆయనను నిజమైన ‘తలైవా’గా మార్చాయి.

రజినీకాంత్ ఒక సినిమా శకం. ఆయన జీవితం, ఆయన సినీ ప్రయాణం… ఏదైనా సాధించవచ్చు, ఎంత ఎత్తుకు ఎదిగినా ఒదిగి ఉండవచ్చు అని నిరూపించిన ఒక స్ఫూర్తిదాయక సందేశం. పుట్టినరోజు సందర్భంగా ఆయనకు మరిన్ని విజయాలు, మంచి ఆరోగ్యం కలగాలని కోరుకుందాం.