Tollywood : అప్పుడు ఒకే సినిమాలో..ఇప్పుడు ఒకే పాత్రలో..

Tollywood : నటసింహం నందమూరి బాలయ్య, రాకింగ్ స్టార్ మంచు మనోజ్ గతంలో ‘ఊ.. కొడతారా ఉలిక్కిపడతారా’ మూవీలో కలిసి నటించారు. ఆ సినిమా అనుకున్న స్థాయిలో ఆడలేదు. తాజాగా వీరిద్దరూ ఒకే మూవీలో కాదు గానీ..ఒకే తరహా పాత్రలో కనిపించబోతున్నారని ఫిల్మ్ నగర్‌లో చర్చ జరుగుతోంది. అది కూడా అఘోరా వేషంలో. ప్రజంట్ బాలయ్య ..మాస్ డైరెక్టర్ బోయపాటి శ్రీను డైరెక్షన్‌లో మూవీ చేస్తున్నారు. ఈ సినిమాలో ఆయన రెండు గెటప్పుల్లో కనిపిస్తారని ప్రచారం జరుగుతోంది. అందులో ఒకటి అఘోరా పాత్ర అని సమాచారం. బాలయ్య గుండు చేయించుకుంది కూడా ఆ పాత్ర కోసమేనట. ఇక ఈ మూవీలో  బాలయ్యను బోయపాటి ఏ రేంజ్‌లో చూయిస్తారా అని ఫ్యాన్స్ ఎంతగానే వెయిట్ చేస్తున్నారు.

ఇక మంచు మనోజ్ కూడా కాస్త డిఫరెంట్ హీరో. ఎప్పుడూ ఏదో ఒక కొత్తదనాన్ని ప్రేక్షకులకు అందించాలని ఆరాటపడుతూ ఉంటారు. వివిధ కారణాల వల్ల దాదాపు 3 ఏళ్ల పాటు సినిమాలకు దూరమైన మనోజ్.. ‘అహం బ్రహ్మాస్మి’ అనే మూవీని రిసెంట్‌గా అనౌన్స్ చేశాడు. ఈ సినిమాలో మంచువారబ్బాయి అఘోరాగా దర్శమివ్వనున్నాడనే టాక్ నడుస్తోంది. ప్రజంట్ బాలకృష్ణ సినిమా షూటింగ్ వడివడిగా జరుగుతుండగా..మనోజ్ మూవీ త్వరలో సెట్స్‌పైకి వెళ్లనుంది. ఏది ఏమైనా పాత్రకు ప్రాధాన్యమిస్తూ మన కథానాయకులు ముందుకు వెళ్లడం మంచి పరిణామమే. కాగా ఈ రెండు సినిమాలు కూడా రోజుల వ్యవధిలోనే రిలీజ్ కావచ్చని తెలుస్తుంది. మరి అఘోరాగా ఈ ఇద్దరు హీరోలు ఎలా మెస్మరైజ్ చేస్తారో చూడాలి.