మ్యూజిక్‌తో కాదు..నటనతో మ్యాజిక్ చేయడానికి రెడీ అవుతున్న స్టార్ మ్యూజిక్ డైరెక్టర్‌‌

దాదాపు మూడు దశాబ్దాలుగా కోట్లాది మంది హృదయాలను తన మ్యూజిక్‌తో అలరించారు. ఆయన ట్యూన్ చేస్తున్నారంటే అభిమానులు ఫిదా కావాల్సిందే. ఈసారి కూడా అభిమానులను అలరించడానికి రెడీ అయ్యారు. కానీ మ్యూజిక్‌తో కాదు. నటనతో. అవును మీరు వింటున్నది నిజమే. కొన్ని సినిమాల్లో ఇలా కనిపించి అలా మాయమైన ఈ మ్యూజిక్ లెజెండ్ పూర్తి స్థాయి నటుడిగా వెండితెరపై కనిపించబోతున్నారు. అప్పట్లో కొన్ని సాంగ్స్ లో అలా మెరిసి ఇలా మాయమైనా, ఇప్పుడు మాత్రం ఒక పవర్ ఫుల్ పాత్రతో మన ముందుకు వస్తున్నారు.

ప్రభుదేవా సినిమాలో క్రేజీ రోల్..

ఇండియన్ సినిమా హిస్టరీలో ఎన్నో ఐకానిక్ సాంగ్స్ ఇచ్చిన ఈ మ్యూజికల్ లెజెండ్, ఇప్పుడు మరో లెజెండ్ ప్రభుదేవా నటిస్తున్న చిత్రంలో కీలక పాత్ర పోషిస్తున్నారు. ‘మూన్‌వాక్’ అనే టైటిల్‌తో వస్తున్న ఈ మూవీలో ఆయన ఒక ‘ఫన్నీ అండ్ యాంగ్రీ యంగ్ డైరెక్టర్’గా కనిపించనుండడం విశేషం. ఈ విషయాన్ని దర్శకుడు మనోజ్ ఎన్.ఎస్ సోషల్ మీడియా వేదికగా వెల్లడించారు. మ్యూజిక్ తో మేజిక్ చేసిన ఆయన, ఇప్పుడు కెమెరా ముందు యాక్టింగ్ తో ఎలాంటి మాయ చేస్తారో అని అభిమానులు ఆసక్తిగా ఎదురుచూస్తున్నారు.

Ar Rahman & Moon Walk Poster

ఇంట్రో అదిరిపోయింది..

మొదట ఈ సినిమాలో కేవలం ఒక పాటలో కనిపిస్తారని అందరూ అనుకున్నారు. కానీ షూటింగ్ సమయంలో ఆయన నటన చూసి ముగ్ధుడైన దర్శకుడు, ఒక ముఖ్యమైన సీన్ కోసం అడగగా ఏఆర్ రెహమాన్ వెంటనే ఓకే చెప్పారట. “రెహమాన్ కి ఈ రోల్ చెప్పగానే చాలా ఉత్సాహంగా అంగీకరించారు. సెట్స్ లో ఆయన నటన చూసి అందరూ ఆశ్చర్యపోయారు” అని చిత్ర యూనిట్ చెబుతోంది. ఈ మూవీలో ఆయన కేవలం నటనకే పరిమితం కాకుండా, మొత్తం ఐదు పాటలను పాడటం మరో విశేషం. ఏఆర్ రెహమాన్ పాడిన ఈ సాంగ్స్ సినిమాకి హైలెట్ కానున్నాయి.

రామ్ చరణ్ సినిమాతో టాలీవుడ్ లో బిజీ..

ఒకపక్క నటుడిగా మారుతూనే.. మరోపక్క తన ప్రధాన రంగమైన సంగీతంలోనూ జోరు చూపిస్తున్నారు. ప్రస్తుతం టాలీవుడ్ గ్లోబల్ స్టార్ రామ్ చరణ్ హీరోగా, బుచ్చిబాబు సాన దర్శకత్వంలో తెరకెక్కుతున్న ‘పెద్ది’ సినిమాకు ఈయనే సంగీతం అందిస్తున్నారు. 2026 మార్చిలో ఈ సినిమా విడుదల కాబోతోంది. సంగీత దర్శకుడిగా, గాయకుడిగా, రచయితగా, నిర్మాతగా తన సత్తా చాటిన ఈ లెజెండ్.. ఇప్పుడు నటుడిగా తన కొత్త ఇన్నింగ్స్ లో ఎలాంటి రికార్డులు క్రియేట్ చేస్తారో చూడాలి. మే 2026లో విడుదల కానున్న ‘మూన్‌వాక్’ రెహమాన్ సినీ కెరీర్‌లో ఒక మైలురాయిగా నిలిచిపోనుంది. ఆయన స్క్రీన్ ప్రెజెన్స్ కోసం ప్రపంచవ్యాప్తంగా ఉన్న అభిమానులు వేయికళ్లతో ఎదురుచూస్తున్నారు.