Actress Prathyusha Death: నా బిడ్డ దుస్తులను ఆస్పత్రి వాళ్లు కాల్చేశారు: ప్రత్యూష తల్లి

నటి ప్రత్యూష మృతి కేసులో సుప్రీంకోర్టు ఇటీవల వెలువరించిన తీర్పుపై ప్రత్యూష తల్లి సరోజిని కన్నీళ్లు పెట్టుకున్నారు. నిందితుడు సిద్ధార్థ్ రెడ్డిని ప్రత్యూష ఆత్మహత్యకు ప్రేరేపించినందుకు దోషిగా నిర్ధారిస్తూ, హైకోర్టు విధించిన రెండేళ్ల శిక్షను సుప్రీంకోర్టు ధర్మాసనం సమర్థించింది. సిద్ధార్థ్ రెడ్డి నాలుగు వారాల్లోగా లొంగిపోవాలని ఆదేశించింది. జస్టిస్ రాజేష్ బిందాల్, జస్టిస్ మన్మోహన్ ధర్మాసనం ఈ తీర్పును ఇచ్చింది. ఈ తీర్పును తాను గౌరవిస్తున్నానని, స్వాగతిస్తున్నానని సరోజిని పేర్కొన్నారు. అయితే, తన కుమార్తెకు పూర్తి న్యాయం జరగలేదని ఆమె తీవ్ర ఆవేదన వ్యక్తం చేశారు. తన కుమార్తె అత్యాచారానికి గురై, హత్య చేయబడిందని ఆమె గట్టిగా నమ్ముతున్నారు. నిందితుడికి జీవిత ఖైదు విధించాలని 24 ఏళ్లుగా తాను పోరాటం చేస్తున్నానని, కానీ ఆ న్యాయం దక్కలేదని ఆమె వాపోయారు. సుప్రీంకోర్టు కూడా హైకోర్టు ఇచ్చిన తీర్పునే కొనసాగించిందని, దీనివల్ల తనకు న్యాయం జరగలేదని సరోజిని అభిప్రాయపడ్డారు. ప్రత్యూష మరణించిన తర్వాత సాక్ష్యాలన్నీ తారుమారు అయ్యాయని సరోజిని ఆరోపించారు. తనకు అధికారం, ఆర్థిక బలం లేకపోవడంతో సాక్ష్యాలపై పోరాడే శక్తి లేకుండా పోయిందని తెలిపారు. న్యాయస్థానాలు మునిస్వామి పోస్ట్‌మార్టం నివేదికను ఎందుకు పరిగణనలోకి తీసుకోలేదో తనకు అర్థం కాలేదన్నారు. 2002లో ప్రత్యూష మరణం తర్వాత, కేసుకు సంబంధించిన ఆధారాలు ప్రారంభ దశలోనే నీరుగార్చబడ్డాయని ఆమె ఆరోపించారు. పోస్ట్‌మార్టం నివేదికలో ప్రత్యూషపై ఒకరి కంటే ఎక్కువ మంది అత్యాచారం చేశారని, ఇది హత్య అని స్పష్టంగా ఉన్నప్పటికీ, దానిని పక్కన పెట్టి త్రిసభ్య కమిటీ నివేదిక ఆధారంగానే న్యాయ ప్రక్రియ జరిగిందని ఆమె వివరించారు. ఈ కమిటీ సభ్యులు ప్రత్యూష మృతదేహాన్ని చూడకుండానే నివేదికలు ఇచ్చారని సరోజిని ఆరోపించారు. ప్రత్యూష మృతదేహంపై తొడలు, ఛాతీ, గొంతు వద్ద గాట్లు ఉన్నాయని, వాటిని ఆసుపత్రి సిబ్బంది వైద్య చికిత్స కోసం పెట్టిన క్లిప్పింగ్స్‌గా పేర్కొన్నారని, అయితే అవి చికిత్సా పద్ధతులకు విరుద్ధంగా ఉన్నాయని సరోజిని తెలిపారు. ఆసుపత్రిలో ప్రత్యూష దుస్తులను ధ్వంసం చేశారని, సాక్ష్యాలను మాయం చేశారని ఆమె ఆరోపించారు. మెడికో-లీగల్ కేసులలో ఎలాంటి వస్తువులనూ ధ్వంసం చేయకూడదని, కానీ ఆసుపత్రి సిబ్బంది అలా చేశారని ఆమె అన్నారు. ప్రత్యూష మరణించిన తొలినాళ్లలో తనకు బెదిరింపు కాల్స్ వచ్చాయని, కేసును విడిచిపెట్టకపోతే తన కుమారుడికి కూడా ప్రమాదమని హెచ్చరించారని సరోజిని వెల్లడించారు. సిద్ధార్థ్ రెడ్డి ఇంతటి క్రూరమైన మనస్తత్వం కలవాడని తాను ఊహించలేదని అన్నారు. 24 ఏళ్లుగా తాము నరకం అనుభవిస్తున్నామని, ఈ న్యాయ పోరాటంలో ఏ ప్రభుత్వాలు, రాజకీయ నాయకులు, సినీ రంగం, సమాజం తమకు మద్దతు ఇవ్వలేదని ఆమె కన్నీటి పర్యంతమయ్యారు. భూమిపై న్యాయస్థానాల్లో తప్పించుకున్నా, దైవ న్యాయస్థానం నుండి ఎవరూ తప్పించుకోలేరని, తన కుమార్తెకు అన్యాయం చేసిన వారందరూ సర్వనాశనమవుతారని సరోజిని తీవ్ర ఆవేదనతో పలికారు. తన కుమార్తె ఆత్మహత్య చేసుకునేంత బలహీనమైన మనసున్న వ్యక్తి కాదని, ఆమె మరణం వెనుక ఏదో ఉందని ఆమె బలంగా విశ్వసిస్తున్నారు.