క‌రోనా ఎఫెక్ట్ః సొంత‌వైద్యంతో దంప‌తులు మృతి

క‌రోనా వైర‌స్ విజృంభిస్తోన్న నేప‌థ్యంలో ప్ర‌పంచ‌దేశాలు దానికి వ్యాక్సిన్ క‌నుగోనే ప్ర‌య‌త్నంలో ఉన్నారు. ఈ క్ర‌మంలోనే క‌రోనా వైర‌స్ సోకిన బాధితుల‌కు ప‌లు ర‌కాల మందుల‌తో వైద్య‌చికిత్స‌లు అంద‌జేస్తున్నారు. అందులో భాగంగానే కొంద‌రికి ఎయిడ్స్ రోగుల‌కు ఇచ్చే మందులు ఇస్తున్న‌ట్లుగా కూడా ప్ర‌చారం జ‌రిగింది. మ‌రికొంద‌రికీ మ‌లేరియా నివార‌ణ‌కు వాడే క్లోరోక్విన్ మెడిసిన్ కూడా క‌రోనాను అరిక‌డుతుంద‌నే ప్ర‌చారం జ‌రిగింది. పైగా అమెరికా అధ్యక్షుడు డొనాల్డ్ ట్రంప్ కూడా ఒక‌ ప్ర‌క‌ట‌న‌లో ఇదే అంశాన్ని వెల్ల‌డించారు. అయితే, ట్రంప్ చేసిన ఆ ప్ర‌క‌ట‌నే ఓ కుటుంబాన్ని బ‌లితీసుకుంద‌నే విమ‌ర్శ‌లు వ‌స్తున్నాయి. వివ‌రాల్లోకి వెళితే…

కరోనా వైరస్‌ని అడ్డుకోవడానికి క్లోరోక్విన్ ఫాస్పేట్ చక్కగా ఉపయోగపడుతోందని ప్ర‌క‌టించారు అమెరికా అద్య‌క్షుడు డోనాల్డ్ ట్రంప్. దేశాధ్య‌క్షుడే చెప్ప‌డంతో అరిజోనాలో… ఇద్దరు దంపతులు తమకు వచ్చిన కరోనా వైరస్‌ని పోగొట్టుకునేందుకు సొంతంగా ఆ మందును వాడారు. ఫలితంగా అతను చనిపోగా… ఆమె ఆస్పత్రిలో కొన ఊపిరితో కొట్టుమిట్టాడుతోంది. చేపల తొట్టెలను శుభ్రం చేసేందుకు వాడే మందును వాళ్లు తీసుకున్నట్లు వైద్యులు వెల్ల‌డించారు. దాదాపు 60 ఏళ్లు దాటిన ఆ దంపతులు… క్లోరోక్విన్ ఫాస్పేట్ తీసుకున్న అరగంటలో మరింత అనారోగ్యం పాలయ్యార‌ని, ఆ మందు వారిపై అత్యంత నెగెటివ్ ప్రభావం చూపింద‌ని చెప్పారు.

ఇలా ఎవరికి తోచినట్లు వాళ్లు ఏది బడితే ఆ మందులు వాడేయవద్దంటున్న డాక్టర్లు… కరోనా వైరస్ లక్షణాలు ఉంటే… మరో మాట ఆలోచించకుండా… టోల్ ఫ్రీ నంబర్లకు కాల్స్ చెయ్యమంటున్నారు. లేదా దగ్గర్లోని డాక్టర్లకు కాల్ చెయ్యమంటున్నారు. అంతే తప్ప మందుల షాపుల్లో ఇష్టమొచ్చిన మందులు కొనుక్కొని వాడితే… ప్రాణాలకే ప్రమాద‌మ‌ని హెచ్చ‌రిస్తున్నారు.