నిరుద్యోగులకు గుడ్ న్యూస్ అంటే ఇది కదా.. ఈ ఏడాది ముందుందిలే మంచికాలం

ఈ సర్వేలో 1,200కి పైగా కంపెనీలు పాల్గొని తమ నియామక ప్రణాళికలను తెలియజేశాయి. 58% కంపెనీలు కొత్త ఉద్యోగాలను సృష్టించడంతో పాటు.. ప్రస్తుతం ఖాళీగా ఉన్న స్థానాలను భర్తీ చేయడానికి ప్రణాళికలు రచిస్తున్నాయి. గత ఏడాది ఈ శాతం 48% మాత్రమే. మరో 18% కంపెనీలు పూర్తిగా కొత్త ఉద్యోగాల సృష్టికి ప్రాధాన్యం ఇస్తాయి. 20% కంపెనీలు భర్తీ చేయాల్సిన ఖాళీలకే ప్రాధాన్యత ఇస్తున్నాయి.

ఉద్యోగులను తొలగించే ప్రణాళికలు తగ్గుముఖం పడుతున్నాయి. 2025లో 2% కంపెనీలు మాత్రమే ఉద్యోగులను తొలగించాలని భావిస్తున్నాయి. గత ఏడాది ఇది 3%.

2025లో ఐటీ రంగం నియామకాల్లో ముందంజలో ఉంటుంది. 37% కంపెనీలు ఐటీ ఉద్యోగాలకు అధిక ప్రాధాన్యం ఇస్తున్నాయి. ఇది 2024లో 24% మాత్రమే. ఐటీ ఉద్యోగాల్లో 42% కంపెనీలు అధిక ఉద్యోగ మార్పు (అట్రిషన్) ఉంటుందని భావిస్తున్నాయి.

3-8 సంవత్సరాల అనుభవం ఉన్నవారు ఎక్కువ డిమాండ్‌ లో ఉంటారు. 58% నియామకాలు ఈ అనుభవం గల అభ్యర్థులను లక్ష్యంగా చేసుకుంటున్నాయి, గతేడాది ఇది 53% మాత్రమే.

ఉద్యోగులను ఆకర్షించేందుకు, నిలుపుకోవడానికి కంపెనీలు వేతనాలను పెంచేందుకు సిద్ధంగా ఉన్నాయి. 54% కంపెనీలు 10%కంటే ఎక్కువ వేతన పెంపు ఇవ్వనున్నాయి. 39% కంపెనీలు 5-10% వేతన పెంపు ఇవ్వాలని భావిస్తున్నాయి.

కొత్తగా గ్రాడ్యుయేట్ అయినవారికి ఉత్తమ అవకాశాలు లభించనున్నాయి. 34% కంపెనీలు క్యాంపస్ నియామకాలను కొనసాగిస్తామని ప్రకటించాయి. ఇది 2024లో 30% మాత్రమే.

ఉద్యోగాలపై సానుకూల ధోరణి ఉన్నప్పటికీ.. కొన్ని సవాళ్లు ఉన్నాయి. 25% కంపెనీలు సరైన టాలెంట్ దొరకడం కష్టం అని చెబుతున్నాయి. 27% కంపెనీలు బడ్జెట్ పరిమితుల వల్ల నియామకాల్లో ఇబ్బందులు ఎదుర్కొంటున్నాయి. 22% కంపెనీలు అభ్యర్థులు అవసరమైన నైపుణ్యాలకు సరిపోరని భావిస్తున్నాయి.

2025లో ఉద్యోగ మార్పు పెరిగే సూచనలు ఉన్నాయి. 5% కంటే తక్కువ ఉద్యోగ మార్పును ఊహిస్తున్న కంపెనీలు 23% నుంచి 17%కి తగ్గాయి. 5-10% ఉద్యోగ మార్పు ఉంటుందని భావిస్తున్న కంపెనీలు 34%.

3-5 సంవత్సరాల అనుభవం గల ఉద్యోగులు (33%) ఎక్కువగా కొత్త ఉద్యోగాల కోసం చూస్తున్నారు. 1-3 సంవత్సరాల అనుభవం గల ఉద్యోగులు (26%) ఉద్యోగ మార్పు చేసేందుకు ఆసక్తిగా ఉన్నారు.

2025లో భారతీయ ఉద్యోగ మార్కెట్ మరింత వేగంగా అభివృద్ధి చెందే అవకాశం ఉంది. అధిక సంఖ్యలో ఉద్యోగాలు, మంచి వేతనాలు, కొత్త నియామక విధానాలు ఉద్యోగ మార్కెట్‌ను మరింత బలపరిచే అవకాశముంది.